તાપસી પન્નૂની ફિલ્મ રિલીઝ થઈ ચૂકી છે. ઘરેલૂ હિંસા પર બનેલી આ ફિલ્મને ખૂબ જ સારો રિસ્પોન્સ મળી રહ્યો છે. ફિલ્મ થપ્પડ અને તેના ડિરેક્ટર અનુભવ સિન્હાની ખૂબ પ્રસંશા થઈ રહી છે. બસ એક થપ્પડ હી તો થા, ક્યા કરું, હો ગયા ના. પણ એનાથી વધારે જરૂરી સવાલ છે કે આવું થયું જ કેમ. બસ આ જ કેમનો જવાબ શોધે છે અનુરાગની ફિલ્મ થપ્પડ. તમે ટ્રેલરમાં જોયું જ હશે કે અમૃતા (તાપસી પન્નૂ) કઈ રીતે તેના પતિ પ્રત્યે સમર્પિત હોય છે. એ તેના પતિના સપના પૂરા કરવા માટે જાન લગાવી દે છે અને પછી એક પાર્ટીમાં બધાંની સામે અચાનક તેનો પતિ તેને થપ્પડ મારી દે છે અને તેના બધાં જ સપના તૂટી જાય છે અને પછી એક પતિ સામે સ્ત્રીનો જંગ શરૂ થાય છે.
પતિ થપ્પડ માર્યા બાદ કહે છે કે, પતિ-પત્નીમાં તો આવું બધું થાય જ છે. એટલું મોટું કંઈ થયું નથી. લોકો શું વિચારશે મારા માટે કે મારી પત્ની કેમ ભાગી ગઈ. અમૃતાની સાસુ, મા તેના તલાક લેવાના નિર્ણયનો વિરોધ કરે છે કે આવી નાની બાબતમાં આટલો મોટો નિર્ણય ન લેવાય, સ્ત્રીને જ બધું ચલાવવું પડે છે પણ અમૃતા આ વાત સ્વીકારતી નથી અને અંત સુધી લડે છે. જોકે, ફિલ્મનો અંત શું છે તેનો અંદાજો લગાવવો ખૂબ જ મુશ્કેલ છે.
સ્ટોરી
ફિલ્મનું નામ સાંભળીને એવું લાગતું હશે કે, આ ફિલ્મમાં બહુ વધારે પ્રમાણમાં હિંસા બતાવવામાં આવી છે પણ એવું નથી. ફિલ્મની વાર્તા બસ આટલી જ લાગે છે પરંતુ છે નહીં. અનુભવે આ ફિલ્મને હિંસક બનાવ્યા વિના જ તેનું ખૂબ જ સુંદર અંત દર્શાવ્યું છે. જેને વિચારવાની ક્ષમતા આપણાં ભારતીય પુરૂષોમાં હજી સુધી નથી. ફિલ્મમાં એવું પણ કહેવાય છે કે જો એક થપ્પડમાં અલગ થવાની વાત આવી જાય તો 50 ટકા મહિલાઓ તેમના પિયરમાં જ બેઠી હોય.
પતિ દ્વારા થપ્પડ માર્યા બાદ સેકન્ડ હાફમાં અમૃતા કઈ રીતે પોતાનું જીવન અને દ્રષ્ટિકોણ બદલે છે તે દર્શાવ્યું છે. આ ફિલ્મમાં અનુભવે તાપસી સહિત અન્ય અલગ-અલગ તકલીફોથી પરેશાન મહિલાઓ અંગે પણ ખૂબ જ સરસ રીતે દર્શાવ્યું છે અને પડદાં પર ઉતાર્યું છે. ફિલ્મની શરૂઆત પુરુષ તથા સ્ત્રીઓના સંબંધોને દર્શાવે છે.
ડિરેક્શન
મહિલાઓની વ્યથાને જે રીતે અનુભવે દર્શાવી છે તે કાબિલે તારીફ છે. મહિલાઓની લાગણીઓને ખૂબ જ સારી રીતે ફિલ્મમાં દર્શાવી છે. ફિલ્મમાં ઓછું બોલીને પણ તાપસીએ જબરદસ્ત હાજરી નોંધાવી છે. તેનો રોલ પોતાના જીવનમાં બધું ભૂલીને અને ચલાવીને પોતાના સપનાઓને મારીને જીવતી દરેક સ્ત્રીને વિચારવા પર મજબૂત કરી દેશે. આ ફિલ્મ દરેક મહિલા માટે એક પ્રેરણા સમાન છે. પવૈલ પણ અમૃતાના પતિના રોલમાં જામે છે. તમામ કલાકારોએ ફિલ્મમાં ખૂબ જ સારી રીતે પોતાનો રોલ નિભાવ્યો છે. ફિલ્મમાં કોઈ મેલોડ્રામા નથી. ફિલ્મનું મ્યુઝિક પણ ફિલ્મ અનુરૂપ જ છે.
ફિલ્મ જોવી કે નહીં
આ ફિલ્મની ગતિ થોડી ધીમી છે પણ ફિલ્મ કંટાળાજનક લાગશે નહીં અને તમને પકડી રાખશે. ફિલ્મનું અંત પણ જોવા જેવી છે. જો તમે એવું વિચારતા હોવ કે લગ્નમાં બધું જ ચાલી જાય તો એકવાર આ ફિલ્મ અચૂક જોવા જજો.