અમેરિકાના રાષ્ટ્રપતિ ડોનાલ્ડ ટ્રમ્પ તારીખ 24 અને 25 અમદાવાદ પ્રવાસે આવી રહ્યાં છે. ત્યારે હાલ અમદાવાદમાં તેમની વ્યવસ્થા માટે ભારે તડામાર ચાલી રહી છે. અને મોટેરા સ્ટેડીયમમાં હાઉડી મોદી જેવો કાર્યક્રમ યોજાશે.
ડોનાલ્ડ ટ્રમ્પ આગામી દિવસે અમદાવાદની મુલાકાત
મોટેરા, સાબરમતી સહિતના વિસ્તારમાં રખડતાં કૂતરાં અને ગાય જોવા નહીં મળે
મ્યુનિ. તંત્ર દ્વારા કૂતરાં-ગાય પકડવાં ૧૦ ટીમ કામે લગાવાઈ
ડોનાલ્ડ ટ્રમ્પની અમદાવાદની મુલાકાત માટે મ્યુનિ. સત્તાવાળા દ્વારા તડામાર તૈયારી શરૂ થઇ ચૂકી છે. મોટેરા સ્ટેડિયમ ખાતેના કેમ છો ટ્રમ્પ કાર્યક્રમમાં વડા પ્રધાન નરેન્દ્ર મોદી સહિતના મહાનુભાવો હાજર રહેશે. ચીનના રાષ્ટ્રપતિ જિનપિંગની અમદાવાદ યાત્રાની જેમ ડોનાલ્ડ ટ્રમ્પની યાત્રાને ઝાકમઝોળભરી બનાવવા માટે તંત્ર કોઇ કસર બાકી રાખવાનું નથી, જેના કારણે અમદાવાદને ગોકુળિયું ગામ બનાવનાર રખડતી ગાય કે શેરીએ શેરીએ જોવા મળતાં રખડતાં કૂતરાં ડોનાલ્ડ ટ્રમ્પના રૂટ પર લોકોને જોવા નહીં મળે.
અમેરિકાના પ્રમુખ ડોનાલ્ડ ટ્રમ્પ આગામી તા.ર૪ ફેબ્રુઆરીએ અમદાવાદ આવી રહ્યા છે. ટ્રમ્પની મુલાકાતના પગલે રાજ્યનું બજેટ પણ બે દિવસ મોડું મુકાશે. કેમ છો ટ્રમ્પ કાર્યક્રમ માટે મ્યુનિ. કોર્પોરેશનમાં પણ જોરદાર તૈયારી શરૂ થઇ ગઇ છે. રૂ.૩૦ કરોડના ખર્ચે ટ્રમ્પના રૂટ પરના રસ્તાને નવાં રંગરૂપ અપાઇ રહ્યાં છે. રૂ.પ કરોડના ખર્ચે નવા ફૂલછોડના રોપા વવાઇ રહ્યા છે. આ બધા આયોજનની સાથે-સાથે એક પણ વિદેશી મહાનુભાવને અમદાવાદની ખાસિયત તરીકે ઓળખાતી રખડતી ગાય કે કૂતરું નજરે ન પડે તે માટે પણ તંત્રએ અત્યારથી કવાયત આરંભી છે.
મ્યુનિ. ઢોર ત્રાસ અંકુશ વિભાગના ઉચ્ચ અધિકારીઓ સવારથી મોટેરા સ્ટેડિયમ અને તેની આસપાસના વિસ્તારમાં રાઉન્ડ લઇ રહ્યા છે તેમજ આ વિસ્તારમાં નજરે પડતી રખડતી ગાયને બહેરામપુરાના ઢોરવાડામાં પુરાઇ રહી છે. ઉપરાંત રખડતાં કૂતરાંને પણ જબ્બે કરી અન્ય ગ્રામીણ વિસ્તારમાં છોડાઇ રહ્યાં છે. આ માટે તંત્ર દ્વારા અત્યારથી ૧૦ ટીમ અને છથી સાત ટ્રેક્ટર ટ્રોલી કામે લગાડાઇ છે. આગામી દિવસોમાં ટીમની સંખ્યામાં વધારો થઇ શકે છે.