પાકિસ્તાન સરહદેથી ઘૂસણખોરી કરીને ભારતમાં આવેલા ખૂંખાર આતંકવાદીઓ આ વખતે સૌથી ઘાતક ગણાતી સ્નાઈપર રાઈફલ એમ-24 લઈને આવ્યા હોવાના ઈનપુટ્સ મળ્યા બાદ સુરક્ષા એજન્સીઓ સતર્ક બની છે અને તેમણે નવો એક્શન પ્લાન બનાવ્યો છે. ઉલ્લેખનીય છે કે, આ અગાઉ અમરનાથ યાત્રાના રૂટ ઉપરથી પણ અમેરિકામાં નિર્મિત સ્નાઈપર રાઈફલ એમ-24 મળી આવવાની ઘટનાએ મોટા આતંકી હુમલાના ષડ્યંત્રને ખુલ્લું પાડ્યું હતું.
સામાન્ય રીતે સ્નાઈપર રાઈફલનો ઉપયોગ લાંબા અંતર પર રહેલા લક્ષ્યને વીંધવા માટે કરવામાં આવે છે. સ્નાઈપર રાઈફલ કોઈ પણ બંદુકબાજ ચલાવી શકતો નથી. તેના માટે ખાસ અઘરી તાલીમ લેવી પડે છે. સ્નાઈપર રાઈફલમાં દૂરની વસ્તુ કે વ્યક્તિને જોવા માટે સ્કૉપની સુવિધા પણ હોય છે. અત્યાધુનિક ટેક્નોલોજીથી કામ કરતી સ્નાઈપર રાઈફલના અચૂક નિશાનથી બચવું મુશ્કેલ છે. પાકિસ્તાનની સેના પણ અમેરિકામાં બનેલી સ્નાઈપર રાઈફલનો જ ઉપયોગ કરે છે, જ્યારે ભારતીય સેના વર્ષોથી જર્મનીમાં નિર્મિત હેક્લર એન્ડ કૉચ સ્નાઈપર રાઈફલ વાપરતી આવી છે.
ક્યા ક્યા દેશ પાસે છે એમ-24 સ્નાઈપર રાઈફલ?
અમેરિકા પાસેથી ખરીદીને એમ-24 સ્નાઈપર રાઈફલનો ઉપયોગ હાલ પાકિસ્તાન ઉપરાંત અફઘાનિસ્તાન, બ્રાઝિલ, હંગેરી, જ્યોર્જિયા, જાપાન, લેબેનૉન, ફિલીપાઈન્સની સેનાઓ કરી રહી છે. ખાસ કરીને પાકિસ્તાનની સૌથી ખતરનાક અને ક્રૂર ગણાતી બૉર્ડર એક્શન ટીમ (BAT)ના ‘હત્યારા’ સૈનિકોને એમ-24 સ્નાઈપર રાઈફલ આપવામાં આવે છે. સરહદ પર BAT દ્વારા થોડા સમય પહેલાં જ ભારતીય સૈનિકો પર પહેલી વખત સ્નાઈપર રાઈફલથી ફાયરિંગ કરવામાં આવ્યું હતું.
આ ખાસિયતોના કારણે સૌથી ઘાતક ગણાય છે એમ-24
અમેરિકામાં બનાવવામાં આવતી સ્નાઈપર રાઈફલ એમ-24 રેમિંગ્ટન મૉડલ 700નું અપડેટેડ અને અત્યાધુનિક વર્ઝન છે. આ રાઈફલને ખાસ અમેરિકાની સેના માટે સ્નાઈપર વેપન સિસ્ટમના રૂપમાં વર્ષ 1980માં બનાવવામાં આવી હતી. 1988માં સેનાના પ્રોગ્રામમાં તેનો સમાવેશ કરાયો હતો. એમ-24 એક કિલોમીટરના અંતર સુધી અચૂક નિશાન સાધી શકે છે. ખાસ કરીને 800 મીટરના અંતર સુધીમાં તે સૌથી વધુ ઘાતક નીવડે છે. 5.4 કિલોગ્રામ વજનની આ રાઈફલની લંબાઈ 1092 મિમી હોય છે, જ્યારે તેનાં બેરલની લંબાઈ 660થી 686 મિમી સુધી હોય છે.
વ્હિટવર્થ : દુનિયાની સૌથી પહેલી સ્નાઈપર રાઈફલ
લાંબા અંતર સુધી અચૂક વાર કરવામાં સક્ષમ વ્હિટવર્થ રાઈફલ દુનિયાની સૌથી પહેલી સ્નાઈપર રાઈફલ ગણાય છે. તેને બ્રિટિશ એન્જિનિયર સર જોસેફ વ્હિટવર્થે ડિઝાઈન કરી હતી. 1857માં તેનું પહેલી વખત પરીક્ષણ કરવામાં આવ્યું હતું. 1.4 કિમીની ઘાતક મારક ક્ષમતા ધરાવતી આ રાઈફલનો અમેરિકન સિવિલ વૉરમાં પહેલી વખત ઉપયોગ કરવામાં આવ્યો હતો. 1.2 મીટરની આ રાઈફલની બેરલ 840 મિમીની હોય છે.