તાજેતરમાં જ સંયુક્ત રાષ્ટ્ર (યુએન) તરફથી જારી કરવામાં આવેલા એક રિપોર્ટમાં ખતરનાક આતંકી સંગઠન અલ-કાયદા વિશે અનેક આંચકાજનક તથ્યો સામે આવ્યા છે. રિપોર્ટ અનુસાર, વિશ્વનું સૌથી શક્તિશાળી અને ખતરનાક ગણાતું આતંકી સંગઠન અલ-કાયદા જરા પણ નબળું પડ્યું નથી.
પાકિસ્તાનના સમર્થનવાળા લશ્કર-એ-તોઈબા અને હક્કાની નેટવર્ક જેવા આતંકી સંગઠનો સાથે અલ-કાયદાનું ગઠબંધન પહેલા કરતા ઘણું વધુ મજબૂત બન્યું છે અને આ સૌથી ચિંતાજનક વાત છે. રિપોર્ટમાં કહેવાયું છે કે, અલ-કાયદા સાથે જોડાયેલા આતંકવાદીઓ તાલિબાન માટે સૈન્ય અને ધાર્મિક આદેશો અનુસાર નિયમિતરૂપે કામ કરી રહ્યા છે. ઈસ્લામના નામે આ આતંકીઓ બેફામ કત્લેઆમ કરી રહ્યા છે અને તેઓ સંગઠનમાં સતત નવી ભરતી કરી રહ્યા છે.
આ તમામ ચોંકાવનારી જાણકારી સંયુક્ત રાષ્ટ્ર સુરક્ષા પરિષદની અલ-કાયદા પ્રતિબંધ સમિતિને આ મહિને સોંપવામાં આવેલા એનાલિટિકલ સપોર્ટ એન્ડ સેંક્શન્સ મોનિટરિંગ ટીમના 24મા રિપોર્ટમાં સામે આવી છે. ઉલ્લેખનીય છે કે, આતંકી સંગઠનો પર બાજનજર રાખનારી ટીમ ઈસ્લામિક સ્ટે (આઈએસ), અલ-કાયદા અને સંબંધિત વ્યક્તિઓ, જૂથો અને સંસ્થાઓ પર સુરક્ષા પરિષદને દર છ મહિને એક સ્વતંત્ર રિપોર્ટ સોંપે છે.
અલ-કાયદાનું લીડર કોણ? જવાહિરી કે પછી હમજા-બિન-લાદેન?
રિપોર્ટ અનુસાર, અલ-કાયદાના ચીફ અયમન મુહમ્મદ રબી અલ-જવાહિરીની તબિયત હાલ બહુ ખરાબ છે. આથી જવાહિરીના મૃત્યુ બાદ સંગઠન સામે નેતૃત્વને લઈને મોટું સંકટ ઊભું થવાનું છે. જોકે, ઓસામા-બિન-લાદેનનો પુત્ર હમજા-બિન-લાદેન સંગઠનનો નવો આક્રમક ચીફ બનીને ઉભર્યો છે. અમેરિકા હમજાને બે વર્ષ પહેલા વૈશ્વિક આતંકી (ગ્લોબલ ટેરરિસ્ટ) જાહેર કરી ચૂક્યું છે. સૂત્રોનો દાવો માનીએ તો હાલ જવાહિરી નહીં પરુંત હમજા જ અલ-કાયદા ચલાવી રહ્યો છે અને તેનો આદેશ જ અંતિમ માનવામાં આવે છે.
1988માં લાદેને આતંકી સંગઠનનો પાયો નાખ્યો હતો
આતંકી સંગઠન અલ-કાયદાની સ્થાપના વર્ષ 1988માં ઓસામા-બિન-લાદેન અને અબ્દુલ્લાહ આઝમે સાથે મળીને સોવિયત-અફઘાન યુદ્ધ દરમિયાન કરી હતી. સંયુક્ત રાષ્ટ્ર સુરક્ષા પરિષદ, નાટો(નોર્થ એટલાન્ટિક ટ્રીટી ઓર્ગેનાઈઝેશન), યુરોપીય યુનિયન, અમેરિકા, બ્રિટન, ભારત, રશિયા અને અન્ય કેટલાક દેશો દ્વારા અલ-કાયદાને વૈશ્વિક આતંકવાદી સંગઠન જારી કરવામાં આવ્યું છે. અલ-કાયદા અફઘાનિસ્તાનને તેનું સૌથી સલામત ‘ઘર’ માને છે. તાલિબાનના સહયોગથી તે બદખ્શાં પ્રાંત ખાસ કરીને તજાકિસ્તાનની સરહદ પર આવેલા શિગનાન ક્ષેત્રની સાથે સાથે પકતિકા પ્રાંતના બારમલમાં સંગઠનને મજબૂત બનાવવા મથી રહ્યું છે.