આણંદમાં રખડતા ઢોરે એક દિવસમાં 10 લોકોને અડફેટે લેતા હાહાકાર મચી ગયો છે આ મામલે વળતરની માંગ સાથે કાનૂની લડત લડવાની ચીમકી ઉચ્ચારાઈ છે.
આણંદમાં રખડતા ઢોરના ત્રાસમાં વધારો
રખડતા ઢોરે એક દિવસમાં 10 લોકોને લીધા અડફેટે
પાલિકાએ રખડતા ઢોર વિરુદ્ધ કાર્યવાહી નહીં કરતા સ્થાનિકોમાં રોષ
આણંદમાં રખડતા ઢોરના ત્રાસે તમામ હદ વટાવી દીધી છે. આજે આણંદની એક પણ શેરી એવી નહિ હોય જ્યાં રખડતાં ઢોરનું અસ્તિત્વ ન હોય. આ મામલે સ્થાનિકોએ અનેક વખત રજૂઆત કરી હોવા છતા જવાબદાર તંત્ર દ્વારા કાર્યવાહી ન કરતા હાલ લોકોને બજારમાંથી પસાર થવામાં મોઢે ફીણ આવી જાય તેવી સ્થિતિ છે. એટલું જ નહિ આણંદમાં રખડતા ઢોરે રેકોર્ડ સર્જ્યો હોય તેમ એક દિવસમાં 10 લોકોને અડફેટે શહેરભરમાં ઉહાપોહ મચી ગયો છે. આથી રસ્તે જાણે મોત ભટકી રહ્યું હોય તેવી પરિસ્થિતિ જન્મી છે.
રખડતા ઢોરની ઢીંકે ચડેલા લોકોને વળતર ચૂકવવા માંગ
આવી સ્થિતિ વચ્ચે પાલિકાએ રખડતા ઢોરને પકડવા સહીતની કાર્યવાહી નહીં કરતા સ્થાનિકોમાં રોષ ફેલાયો છે. ઢોરના હુમલામાં કોઈ નિર્દોષ શહેરીજનોને જીવ જાશે તો જવાબદાર કોણ? શું આવી અઘટીત ઘટનાની જવાબદારી પાલિકા લેશે? તે સહીતના લૉકોમાં સવાલો ઊભા થયા છે. વધુમાં આ મામલે વોર્ડ નંબર 4ના કાઉન્સિલરે પાલિકા તંત્રને પત્ર લખ્યો છે. જેમાં રખડતા ઢોરની ઢીંકે ચડેલા ઈજાગ્રસ્ત થયેલા લોકોને તાત્કાલિક વળતર ચૂકવવા માંગ ઉઠાવી છે. જો આ દિશામાં તંત્ર દ્વારા કાર્યવાહી ન કરી વળતર નહીં આપવામાં આવે તો તંત્ર સામે કાનૂની લડત છેડવાની પણ અંતમાં ચીમકી ઉચ્ચારાઈ છે. જેને લઇને તંત્ર દોડતું થયું છે.
થોડા સમય પહેલાહિંસક બનેલ ગાયની ચૂંગલમાંથી મહીલા માંડ બચી હતી
થોડા સમય પહેલા આણંદ શહેરમાં ગામડી વડ વિસ્તારમાં આવેલ આઇસ ફેકટરી નજીક આજે એક રખડતી ગાયે ત્યાંથી પસાર થતી મહિલા ઉપર અચાનક હુમલો કર્યો હતો. આ દરમિયાન જમીન પર પટકાયેલ મહિલાએ બચાવો બચાવોની બુમો પડતા સ્થાનિક લોકોએ મહામહેનતે વૃદ્ધ મહિલાને હિંસક બનેલ ગાયની ચૂંગલમાંથી બચાવી હતી. ઇજાગ્રસ્ત વૃદ્ધ મહિલાને સારવાર આપ્યા બાદ ઘરે લાવવામાં આવ્યા હતા. આમ લોકોએ મહિલાને મોતના મુખમાંથી ઉગારી લીધી હતી. આવી ઘટનાઑમાંથી પણ તંત્ર શીખ ન લેતું હોવાથી ઢોરનો ત્રાસ અટકવાનું નામ લેતો નથી. જેને લઇને હવે લોકો આકરા પાણીએ થયા છે અને તંત્ર સામે બાયો ચડાવી કાનૂની લડતની ચીમકી પણ ઉચારી છે.