ડર ગાયબ / સુરતના ખોલવડમાં અસામાજિક તત્વોએ સોસાયટી માથે લીધી, ખુલ્લી તલવાર, લાકડીઓ દેખાડી રૌફ જમાવ્યો, ઘરના કાચ તોડયા

• સુરતના ખોલવડમાં અસામાજિક તત્વોનો આતંક
• ખુલ્લી તલવાર, લાકડી લઈને ધસી આવ્યા
• સોસાયટીના રહીશ સાથે બબાલ થઈ હતી

સુરતમાં દિવસે ને દિવસે કાયદો અને વ્યવસ્થા કથળી રહ્યા હોય તેવી સ્થિતિનું નિર્માણ થઈ રહ્યું છે. ક્રાઇમનું હબ બની રહેલું સિટી હવે સભ્ય સમાજના નાગરિકો માટે ભય અને ત્રાસ ઊભો કરી રહ્યું હોય તેવી લાગી રહ્યું છે. ચોરી લૂંટફાટ ,હત્યા, દુષ્કર્મ, વ્યાજ ખોરી, ખનીજ માફિયાઓની દાદાગીરી, મારામારીની ઘટનાઓ બાદ અસમાજીક તત્વોએ સુરત માથે લીધું છે.

અસામાજિક તત્વોએ કોઈ કારણોસર સોસાયટીના રહીશ સાથે બબાલ થતા કરી ધમાલ 
સુરતના ખોલવડમાં કોઈ કારણસર સોસાયટીના રહીશ સાથે અસામાજિક તત્વોએ બબાલ કરી રહી હતી. ખુલ્લી તલવાર, લાકડી લઈને ધસી આવેલા લોકોએ ખુલ્લેઆમ ધાક ધમકીઓ આપી એક ઘરના બારીના કાચ પણ તોડી નાખ્યા હતા. સોસાયટીના લોકોની આપવીતી મુજબ અગાઉ પણ આ લુખ્ખા તત્વો આ રીતે દાદાગીરી કરતા હતા. હથિયારો લઈને આવતા સ્થાનિકો ડરી ગયા હતા. તાત્કાલિક તેમણે કામરેજ પોલીસને ઘટનાની જાણ કરી હતી. મામલો થાળે પડતાં પોલીસની એન્ટ્રી થઈ હતી. પોલીસે હજુ સુધીમાં કોઈ પણ અસામાજિક તત્વની અટક કરી હોય તેવા સમાચાર મળ્યા નથી. 

VTV ગુજરાતીના સળગતા સવાલ
સુરતમાં અસામાજિક તત્વોને કોનું પીઠબળ છે? શહેરના અલગ-અલગ વિસ્તારોમાં અસામાજિક તત્વોનો આતંક! સુરત પોલીસના હાથ કોણે બાંધ્યા છે? અસામાજિક તત્વોને આતંક મચાવતા કોણ અટકાવશે? સુરતના લોકોની પરેશાની કોણ સમજશે? કેમ અસામાજિક તત્વો ખુલ્લેઆમ મચાવી રહ્યાં છે આતંક? વેપારી અને સ્થાનિકોને કેમ થઇ પરેશાન કરવામાં આવે છે? શું સુરતમાં કોઇ ગેંગ સક્રિય થઇ છે? અસામાજિક તત્વોને કોઇ મોટી ગેંગનું પીઠબળ મળ્યું છે? સુરતને ક્રાઇમ સિટી બનતી કોણ અટકાવશે? શું સુરત પોલીસ નિષ્ક્રિય છે?