કાશ્મીર ખીણ વિસ્તારમાં આતંકી ગતિવિધિઓને ઉત્તેજન આપવા માટે પાકિસ્તાન સ્થિત આતંકી આકાઓએ એક નવું કારસ્તાન રચ્યું હોવાનો ખુલાસો થયો છે.
ઝડપાયેલા આતંકીઓએ સુરક્ષા એજન્સીઓને નવા એપ્સની માહિતી આપી
કાશ્મીર ખીણને લોહિયાળ બનાવવા આતંકીઓ 2 જી સ્પીડે ચાલતા તુર્કી એપ્સનો ઉપયોગ કરી રહ્યાં છે
સુરક્ષા એજન્સીઓ એલર્ટ મોડ પર આવી
વોટ્સએપની પ્રાઈવેસી પોલિસી અંગે મચેલી બબાલની વચ્ચે પાકિસ્તાનમાં આતંકી અને તેમના આકાઓ એકબીજા સાથે ચેટિંગ માટે હવે અજ્ઞાત મોબાઈલ એપ્સ તરફ વળી રહ્યાં છે. આતંકવાદીઓ તેમની આતંકી ગતિવિધિઓને છૂપાવવા માટે નવા એપ્સનો ઉપયોગ શરૃ કરી દીધો હોવાનું સામે આવતાં સુરક્ષા એજન્સીઓ એલર્ટ મોડ પર આવી છે. આ મોબાઈલ એપ તુર્કિની એક કંપની દ્વારા બનાવાયું હોવાનું જાણવા મળ્યું છે.
વોટ્સએપ, ફેસબુક નહીં તુર્કી એપ્સનો ઉપયોગ
અધિકારીઓએ જણાવ્યું કે એન્કાઉન્ટર્સ પછી આતંકીઓ પાસેથી મળેલા પુરાવા અને સેનાની સામે આત્મસમર્પણ કરનાર આતંકીઓની માહિતીને આધારે ત્રણ નવા મોબાઈલ એપ્સનું કારસ્તાન બહાર આવ્યું છે. આ નવા એપ્સ દ્વારા આતંકીઓ પાકિસ્તાનમાં તેમના આકાઓ સાથે વાતચીત કરે છે અને તેમની પાસેથી આતંકી ગતિવિધિઓ અંગેની માહિતી મેળવી રહ્યાં છે.
સુરક્ષાના કારણોસર આ એપ્સના નામ જાહેર કરાયા નથી. આ એપ્સમાં એક અમેરિકી કંપની તો બીજી યુરોપીય છે. સૌથી લેટેસ્ટ એપ તુર્કીની કંપનીનું છે. આતંકીઓ તુર્કીની કંપનીના એપ્સના માધ્યમ દ્વારા તેમના આકાઓ સાથે વાતચીત કરીને કાશ્મીર ખીણમાં આતંકી ગતિવિધિઓને ઉત્તેજન આપી રહ્યાં છે.
સ્લો ઈન્ટરનેટ સ્પીડમાં પણ આ એપ્સ ચાલી શકે છે
3 નવા અજ્ઞાત એપ્સ સ્લો ઈન્ટરનેટ સ્પીડ 2G માં ચાલી શકે છે. કાશ્મીર ખીણમાં હાલમાં 2G સર્વિસ ચાલી રહીછે. સંરક્ષણ મંત્રાલયના એક અધિકારીએ જણાવ્યું કે આતંકવાદી જૂથોએ વોટ્સએપ અને ફેસબુક મેસેન્જરનો ઉપયોગ કરવાનું બંધ કરી દીધું છે પરંતુ પછીથી ખબર પડી કે આતંકીઓએ ઈન્ટરનેટ પર ઉપલબ્ધ બીજા મેસેજિંગ એપનો ઉપયોગ કરવાનું શરૃ કરી દીધું હતું. આ એપ્સમાં તમામ એક્રિપ્શન અને ડિક્રિપ્શન (કોડિંગ એન્ડ ડિકોટિંગ) ,સીધા ડિવાઈસ પર થાય છે તેથી કોઈ પણ પોઈન્ટ પર થર્ડ પાર્ટીના હસ્તક્ષેપને સીમિત કરે છે.
નામ ન જાહેર કરવાની શરતે એક અધિકારીએ એવુ જણાવ્યું કે ખીણમાં આતંકીઓને આતંકી માર્ગે ધકેલવા માટે ઉપયોગ કરાઈ રહેલા આ એપ્સમાંથી એક તો ફોન નંબર અથવા ઈમેઈલ આઈડીની પણ માગ કરતા નથી જેથી કરીને યુઝર્સની ગોપનીયતા ગુપ્ત રહી શકે. આ એપ્સને બ્લોક કરવાના પ્રયાસો થઈ રહ્યાં છે. પાકિસ્તાનમા પોતાના આકાઓ સાથે જોડાવવા માટે આતંકી જૂથો તેનો ઉપયોગ વધારી રહ્યાં છે.