જમ્મૂ-કશ્મીરમાં સુરક્ષા જવાનો ફરી એકવાર અલર્ટ થઈ ગયા છે. પોતાના વાહન બંકર અને જવાનોના રક્ષા કવચને વધુ મજબૂત કર્યા છે. કારણ છે સ્ટીલની ગોળી.
વાહન, બંકર અને જવાનોના રક્ષા કવચ કર્યા વધુ મજબૂત
જૈશના આતંકી પાસેથી વધુ એકવાર મળી સ્ટીલની ગોળીઓ
સ્ટીલની ગોળી સામાન્ય બુલેટ પ્રૂફ કવચને ભેદવાની રાખે છે ક્ષમતા
તાજેતરમાં સેનાએ રાવલપોરામાં જૈશ કમાન્ડર વિલાયત હુસૈન ઉર્ફે સજ્જાદ અફગાનીને ઠાર માર્યો હતો. જેની પાસેથી ચીન નિર્મિત સ્ટીલની 36 ગોળી મળી આવી હતી. આ સ્ટીલની ગોળીસામાન્ય બુલેટ પ્રૂફ કવચને ભેદવાની ક્ષમતા રાખે છે.
ચીનમાં બનેલી આ ગોળીનો ફરી એકવાર આતંકીઓએ ઉપયોગ શરૂ કર્યો છે. જેથી સેનાએ પોતાના બુલેટ પ્રૂફ વાહનોની સુરક્ષામાં વધારો કર્યો છે. 2017માં પ્રથમવાર આતંકીઓએ સ્ટીલની ગોળીનો ઉપયોગ કર્યો હોવાનું સામે આવ્યું હતું. જેમાં જૈશ આતંકીઓએ પુલવામાના લેથપોરામાં CRPF કેમ્પ પર હુમલો કર્યો હતો. જેમાં 5 જવાન શહીદ થઈ ગયા હતા.
આ તમામ જવાનોએ બુલેટ પ્રૂફ જેકેટ પહેર્યા હોવા છતાં તેમના જીવ ગયા હતા. ત્યારબાદ આતંકીઓએ અનેકવાર સ્ટીલની ગોળીનો ઉપયોગ કર્યો હતો. છેલ્લે 2019માં આતંકીઓએ સ્ટીલની ગોળીનો ઉપયોગ કર્યો હતો. ત્યારબાદ ફરી એકવાર તાજેતરમાં ઠાર કરાયેલા આતંકી પાસેથી સ્ટીલની ગોળી મળી આવી છે.