બેદરકારી / એક શૌચાલયના કારણે 2 વર્ષથી બંધ છે ટેનિસ કોર્ટ, અધિકારીઓની બુદ્ધિને 'સલામ' કરાય તેવું કામ

• શૌચાલયના અભાવે ટેનિસ કોર્ટ બંધ
• 2 વર્ષથી પાલડીનું ટેનિસ કોર્ટ બંધ
• હેરિટેજ બાંધકામને કારણે નહીં બને શૌચાલય

અમદાવાદએ મહાનગર પાલિકા છે પરંતુ પાલિકામાં કામ કરતા અધિકારીઓની બુદ્ધિ પગની પાનીએ હોય એમ લાગી રહ્યુ છે. એક તરફ વિકાસના કાર્યો કરવા માટે કરોડોનો ખર્ચ કરવામાં આવે છે. કરોડોના ટેન્ડર પાસ કરવામાં આવે છે તો બીજી તરફ ક્યાંક પ્લાનિંગમાં ખામીને લીધે કરોડો રૂપિયા માથે પડે છે. ત્યારે આવી જ એક ઘટના બની છે અમદાવાદના પાલડીમાં. પાલડીમાં આવેલી ટેનિસ કોર્ટ છેલ્લા બે વર્ષથી બંધ હાલતમાં છે. કારણ એ છે કે અહીં શૌચાલય નથી.  શૌચાલય ન બનાવી શક્યા હોવાથી ટેનિસ કોર્ટ શોભાના ગાંઠીયા સમાન જોવા મળી રહી છે.  ટેનિસમાં રસ ધરાવતા લોકો છેલ્લા ઘણા સમયથી ટેનિસ કોર્ટ શરૂ થાય તેની રાહ જોઇ રહ્યા છે પરંતુ આ સ્થિતિ જોતા લાગી રહ્યુ છે કદાચ પાલડીમાં ટેનિસ કોર્ટ શરૂ થશે જ નહી.

કેમ શૌચાલય નથી બનાવ્યું ?

જે જગ્યાએ હેરિટેજ બાંધકામ કરવામાં આવ્યુ હોય તેના ખાસ નિયમો હોય છે. તે નિયમો અનુસાર, જ્યાં હેરિટેજ બાંધકામ હોય તેની આસપાસ 100 મીટરની અંદર ખોદકામ કરવાની મનાઇ છે. પાલડીની ટેનિસ કોર્ટ જ્યાં આવેલી છે તેના 100 મીટરના અંતરે હેરિટેજ બાંધકામ આવેલુ છે. જેથી ટેનિસ કોર્ટમાં ખોદકામ શક્ય નથી. પરિણામે અહીં શૌચાલય બનાવી શકાતુ નથી.

તો શું ટેનિસકોર્ટ શરૂ નહી થાય ?

અમદાવાદ મ્યુનિસિપલ કોર્પોરેશને ટેનિસકોર્ટ બનાવવા માટે કરોડો રૂપિયાનો ખર્ચ કર્યો હતો. પરંતુ સમય જતા AMCએ તેની કામગીરી ખાનગી સંસ્થાને સોંપી દીધી. હવે તે કોન્ટ્રાક્ટરે શૌચાલયના બાંધકામ માટે એએમસીની મંજૂરી માગી પરંતુ AMCએ શૌચાલય બનાવવા હજુ સુધી મંજૂરી આપી નથી.

2019માં પાલડી ટેનિસ કોર્ટનું ઉદ્ઘાટન

મહત્વનુ છે કે પાલડીમાં ટેનિસ કોર્ટનું વર્ષ 2019માં કેન્દ્રીય ગૃહમંત્રી અમિત શાહના હસ્તે ઉદ્ઘાટન કરવામાં આવ્યુ હતું.  ત્યાર બાદ AMCએ ટેનિસકોર્ટને ચલાવવા અને તેની જાળવણી રાખવા માટે ટેન્ડર બહાર પાડ્યા હતા. ટેન્ડર ભરવામાં ખાનગી પક્ષોને પણ આવકારવામાં આવ્યા હતા.  જે દરમિયાન બે એજન્સીઓએ ટેનિસકોર્ટની જાળવણી કરવા માટેની તૈયારી દર્શાવી હતી.

10 કરોડના ખર્ચે 20 ટેનિસકોર્ટનું નિર્માણ

અમદાવાદ મ્યુનિસિપલ કોર્પોરેશન દ્વારા માત્ર પાલડીમાં જ નહી પરંતુ શહેરના વિવિધ વિસ્તારોમાં 20 ટેનિસકોર્ટનું નિર્માણ કરવામાં આવ્યુ છે. વર્ષ
2018-19માં ચાંદલોડિયા, મેમનગર, પાલડી, ચાંદખેડા, રામોલમાં ટેનિસકોર્ટનું નિર્માણ કરવામાં આવ્યુ હતું.  લાંભા, મણિનગર, થલતેજ, ગોતા, જોધપુર, સરખેજ, વાસણા, નિકોલ, નરોડા અને બોડકદેવમાં ટેનિસ કોર્ટ બનાવવામાં આવી હતી. જો કે પ્રથમ તબક્કામાં રૂ. 30 કરોડના ખર્ચે 40 કોર્ટની દરખાસ્ત કરવામાં આવી હતી પરંતુ બાદમાં તેની સંખ્યા ઘટીને 20 કરવામાં આવી હતી. કરોડોના ખર્ચે 20 જગ્યાએ ટેનિસકોર્ટ બનાવવામાં આવી પરંતુ માત્ર 
 ચાંદખેડા અને ચાંદલોડિયામાં જ કોર્ટ કાર્યરત છે.

સળગતા સવાલ

• નાગરિકોએ ક્યાં સુધી ટેનિસકોર્ટ માટે જોવી પડશે રાહ ?
• કરોડોનો ખર્ચ કર્યા પછી શૌચાલય ન બનાવી શકાય તે યાદ આવ્યુ ?
• ક્યાં સુધી આવી રીતે પ્રજાના પૈસા વેડફશો ?
• AMCના નેતાઓ એક શૌચાલય બનાવવા સમર્થ નથી ?
• ખોદકામ કરી ન શકતા હોવ તો પોર્ટેબલ ટોયલેટ મુકાવો ?
• શું પોર્ટેબલ ટોયલેટ મૂકાવા સમર્થ નથી AMC?
• 10 કરોડના ખર્ચે 20 ટેનિસકોર્ટનું નિર્માણ, પણ 2જ ટેનિસકોર્ટ કાર્યરત કેમ ?
• અધિકારીઓ પ્લાનિંગ વિના જ કરોડોની લ્હાણી કરી દે છે ?
• વિકાસના બણગા ફૂંકતા અધિકારીઓ શૌચાલય બનાવી ન શકે ?