શેકાવા તૈયાર રહેજો / ગરમીએ તો ગાભા કાઢી નાંખ્યા! 121 વર્ષનો તૂટ્યો રૅકોર્ડ, ઘરની બહાર નીકળતા પહેલાં વાંચી લેજો આ આગાહી

• આ વર્ષે માર્ચ મહિનાની ગરમીએ સર્જ્યો નવો રેકોર્ડ
• 121 વર્ષમાં માર્ચ મહિનો સૌથી ગરમ મહિનો રહ્યો
• માર્ચ 2022 માં દેશનું સરેરાશ મહત્તમ તાપમાન 33.10 ડિગ્રી નોંધાયું

દેશભરમાં આ વર્ષે હોળી પહેલાં જ તાપમાનમાં વધારા સાથે ગરમીએ પોતાનો રંગ દેખાડવાનું શરૂ કરી દીધું છે. ત્યારે હવામાન વિભાગે જણાવ્યું કે, આ વર્ષે દેશમાં તાપમાનમાં થયેલા વધારાએ 121 વર્ષનો ગરમીનો રેકોર્ડ તોડી નાખ્યો છે.માર્ચના મધ્ય ભાગથી, રાજસ્થાન, ગુજરાત અને મધ્યપ્રદેશ સહિત ભારતના અનેક રાજ્યોમાં ગરમ પવન (લૂ) સાથે ગરમીએ હાહાકાર મચાવવાનું શરૂ કરી દીધું છે. દેશમાં માર્ચ મહિનામાં સરેરાશ તાપમાન 33.10 ડિગ્રી સેલ્સિયસ હતું જે સામાન્ય કરતા 1.86 ડિગ્રી સેલ્સિયસ વધારે છે.

સમગ્ર દેશમાં સરેરાશ વરસાદ પણ પાછલાં મહિનાની સરેરાશ કરતાં 71% ઓછો

ભારતીય હવામાન વિભાગ (IMD) ના ડેટા અનુસાર, દેશમાં 1901 બાદથી માર્ચ મહિનો એ સૌથી ગરમ મહિનો રહ્યો છે, જે દરમિયાન મહત્તમ તાપમાન સામાન્ય કરતા 1.86 ડિગ્રી સેલ્સિયસ વધારે હતું. રિપોર્ટમાં એમ પણ કહેવામાં આવ્યું છે કે, સમગ્ર દેશમાં સરેરાશ વરસાદ પણ પાછલાં મહિનાની સરેરાશ કરતાં 71% ઓછો હતો.

રિપોર્ટ અનુસાર, દેશમાં માર્ચ મહિનામાં સરેરાશ તાપમાન 33.10 ડિગ્રી સેલ્સિયસ હતું કે જે સામાન્ય કરતા 1.86 ડિગ્રી સેલ્સિયસ વધારે છે. આ સમયગાળા દરમિયાન સરેરાશ લઘુત્તમ તાપમાન 20.24 ડિગ્રી સેલ્સિયસ નોંધાયું હતું. ઉત્તર-પશ્ચિમ વિસ્તારમાં સૌથી વધારે તાપમાન નોંધાયું હતું, જે સામાન્ય કરતાં 3.91 ડિગ્રી સેલ્સિયસ વધારે હતું. તો મધ્ય વિસ્તારમાં પણ માર્ચ મહિનો સામાન્ય કરતાં 1.62 ડિગ્રી સેલ્સિયસ વધુ ગરમ હતો.

ગયા મહિને આ વર્ષે 1901 પછીનો ત્રીજી વાર સૌથી ઓછો વરસાદ નોંધાયો

ભારતમાં માર્ચ મહિનામાં સરેરાશ 8.9 મીમી વરસાદ નોંધાયો હતો, જો કે લોંગ પીરિયડ એવરેજ (LPA) ના 30.4 MM કરતા 71 ટકા ઓછો છે. માર્ચ 1909 માં 7.2 મીમી અને 1908માં 8.7 મીમી વરસાદ નોંધાયો હતો. આવી સ્થિતિમાં ગયા મહિને આ વર્ષે 1901 પછીનો ત્રીજી વાર સૌથી ઓછો વરસાદ નોંધાયો હતો.

હવામાન શાસ્ત્રીઓએ ચેતવણી આપતા જણાવ્યું છે કે, આગામી વર્ષોમાં હીટવેવની તીવ્રતા વધશે. છેલ્લાં કેટલાંક વર્ષોમાં એવાં દિવસો વધુ આવ્યાં છે કે જ્યારે વરસાદ નથી પડ્યો. કેટલાંક કિસ્સાઓમાં ભારે વરસાદ થયો છે અને ગરમી પણ ઘણી વધી ગઇ છે.

ગરમી (લૂ) થી નહીં મળે રાહત

હવામાન વિભાગે જણાવ્યું કે, ઉત્તર અને મધ્ય ભારતમાં હાલ લૂ અને ગરમીથી કોઈ જ રાહત નહીં મળે. હવામાન વિભાગની આગાહી મુજબ સમગ્ર એપ્રિલ મહિનો શુષ્ક રહેવાની શક્યતા છે. રાષ્ટ્રીય રાજધાની દિલ્હી, પંજાબ, હરિયાણા, રાજસ્થાન, મધ્યપ્રદેશ અને આસપાસના વિસ્તારોમાં એપ્રિલના પ્રથમ સપ્તાહમાં હીટ વેવની સ્થિતિ યથાવત રહેશે.