એડજસ્ટેડ ગ્રોસ રેવન્યુ (એજીઆર) ને બાકી ચૂકવણી અંગે સુપ્રીમ કોર્ટે કરેલ ઠપકો બાદ ટેલિકોમ વિભાગે જણાવ્યું હતું કે એરટેલ અને વોડાફોન આઈડિયા કંપનીઓએ આજે મધ્યરાત્રિ પહેલા બાકીની રકમ ચૂકવવી પડશે. એરટેલ, વોડાફોન આઇડિયા અને ટાટા ટેલિસર્વિસિસ વગેરેના 1.47 લાખ કરોડ રૂપિયા ચૂકવવાના બાકી છે.
ટેલિકોમ વિભાગે જણાવ્યું હતું કે એરટેલ અને વોડાફોન આઈડિયા કંપનીઓએ એડજસ્ટેડ ગ્રોસ રેવન્યુ (એજીઆર) ને બાકી ચૂકવણી આજે રાતે 11:59 પહેલાં ચૂકવવી પડશે.
ટેલિકોમ વિભાગે કંપનીઓને ચૂકવણી માટે નોટિસ મોકલવાનું શરૂ કર્યું છે. અગાઉ સુપ્રીમ કોર્ટે સુનાવણી કરતાં એજીઆરની બાકી રહેલી ચૂકવણી અંગેના તેના અગાઉના આદેશનું પાલન નહીં કરવા અંગે નારાજગી વ્યક્ત કરી હતી. ટેલિકોમ કંપનીઓની સાથે સાથે કોર્ટે ટેલિકોમ વિભાગને પણ ઠપકો આપ્યો હતો.
એરટેલની પ્રતિક્રિયા
ભારતી એરટેલે શુક્રવારે સાંજે માહિતી આપી છે કે તેણે સરકારને 20 ફેબ્રુઆરી સુધીમાં બાકીના 10,000 કરોડ રૂપિયાના ચૂકવવાનું કહ્યું છે. કંપનીએ જણાવ્યું છે કે સુપ્રીમ કોર્ટમાં આગામી સુનાવણી પહેલાં તે બાકીની ચૂકવણી કરી દેશે.
સુપ્રીમ કોર્ટે આ કંપનીઓને ઠપકો આપ્યો
આજે એજીઆર કેસમાં સુનાવણી દરમિયાન સુપ્રીમ કોર્ટે કહ્યું કે સરકારી અધિકારી સુપ્રીમ કોર્ટથી ઉપર છે તેમ લાગી રહ્યું છે. સુપ્રીમ કોર્ટની અવમાનની નોટિસ ફટકારીને 17 માર્ચે ટેલિકોમ કંપનીઓના MDsને કોર્ટમાં સમન્સ પાઠવવામાં આવ્યા છે.
MDsને કોર્ટમાં હાજર રહેવા અને તેમની કંપનીઓએ અત્યાર સુધીમાં એજીઆર લેણાં કેમ જમા કરાવ્યા નથી તેનો ખુલાસો કરવા જણાવ્યું છે. એરટેલ, વોડાફોન આઇડિયા અને ટાટા ટેલિસર્વિસિસ વગેરેના રૂ. 1.47 લાખ કરોડ રૂપિયા બાકી છે.
કોર્ટે ટેલિકોમ વિભાગ ઉપર કંપનીઓ સામે કુણું વલણ દાખવ્યા બદલ સવાલ ઉભા કર્યા છે. જસ્ટિસ મિશ્રાએ જણાવ્યું છે કે ટેલિકોમ વિભાગે તાત્કાલિક એજીઆર ન ભરવા વાળી કંપનીઓ સામે કડક પગલાં નહિ લેવાય એવું નોટિફિકેશન કોના પૂછવાથી જાહેર કર્યું?
શું છે AGR?
ટેલિકોમ કંપનીઓએ સ્પેક્ટ્રમ વપરાશ ચાર્જ (એસયુસી) અને લાઇસન્સ ફી જેવા સ્પેક્ટ્રમ ફીના રૂપમાં આવકનો એક ભાગ સરકારને ચૂકવવો પડે છે. ટેલિકોમ કંપનીઓનો ડિપાર્ટમેન્ટ ઓફ ટેલિકમ્યુનિકેશન્સ (ડીઓટી) સાથે લાઇસન્સ કરાર હોય છે. આ કરારમાં એજીઆર સાથે સંકળાયેલ શરતો શામેલ હોય છે.