અરજી / ટેલિકોમ કંપનીઓને સુપ્રીમ કોર્ટથી મોટો ઝટકો, કેન્દ્ર સરકારને આપવા પડશે 92000 કરોડ રૂપિયા

• AGRના મુદ્દા પર ટેલીકોમ કંપનીઓની પુનર્વિચાર અરજી કોર્ટે ફગાવી
• કંપનીઓને હવે કેન્દ્ર સરકારને 92000 કરોડ રૂપિયા ચૂકવવા પડશે
• 23 જાન્યુઆરી સુધીમાં ટેલીકોમ કંપનીઓએ બાકી 92 હજાર કરોડ રૂપિયા રૂપિયા ચૂકવવાના છે

એડજેસ્ટેડ ગ્રોસ રેવેન્યૂ (AGR)ના મુદ્દા પર ટેલીકોમ કંપનીઓએ સુપ્રીમ કોર્ટમાં પુનર્વિચાર અરજી દાખલ કરી હતી. ભારતી એરટેલ, વોડા-આઇડિયા અને ટાટા ટેલી સર્વિસિઝે આ અરજી દાખલ કરી હતી. અરજીમાં દંડ, વ્યાજ અને પેનલ્ટી પર લગાવવામાં આવેલા વ્યાજ પર છુટ આપવાનો અનુરોધ કરવામાં આવ્યો હતો. 

ટેલિકોમ કંપનીઓએ લગાવામાં આવેલા દંડની રાશિને લઇને કોર્ટમાં અરજી દાખલ કરી હતી. અરજીમાં કોર્ટથી AGRમાં બિન દૂરસંચાર આવકને સામેલ કરવાના નિર્ણય પર ફરી વિચાર કરવા અનુરોધ કરાયો હતો. 

નોંધનીય છે કે, 24 ઓક્ટોબર 2019એ ટેલીકોમ કંપનીઓને સુપ્રીમ કોર્ટથી ખુબ જ મોટો ઝટકો લાગ્યો હતો. કોર્ટે ટેલીકોમ કંપનીઓને 92 હજાર કરોડથી વધારે બાકી રૂપિયા અને લાઇસન્સ ફી કેન્દ્ર સરકારને આપવા કહ્યું હતું. દૂરસંચાર વિભાગ (DoT)ની અરજી મંજૂર કરતા સુપ્રીમ કોર્ટે કહ્યું કે, આ બાકી નાણા ત્રણ મહીનામાં આપવામાં આવશે. 

સુપ્રીમ કોર્ટે કહ્યું કે, AGR એટલે કે સમાયોજિત કુલ આવકમાં લાઇસેન્સ ફી અને સ્પેક્ટ્રમ ઉપયોગ ઉપરાંત અન્ય આવક પણ સામેલ છે. તેમા કેપિટલ અસેસ્ટના વેચાણ પર લાભ અને વીમા ક્લેમ AGRનો હિસ્સો હશે નહીં.

ટેલીકોમ કંપનીઓએ તેના માટે 6 મહીનાનો સમય માંગ્યો હતો. સરકાર દ્વારા ટેલીકોમ કંપનીઓ દ્વારા ચૂકવવા પાત્ર લાઇસન્સ ફી અને સ્પેક્ટ્રમ ઉપયોગ શુલ્કની ગણતરી AGR એટલે કે સમાયોજિત કુલ આવકના ટકાવારીના રૂપે કરવામાં આવે છે. દૂરસંચાર વિભાગે ભારતી, વોડા-આઇડિયા, આર કૉમ વગેરે કંપનીઓ પર કુલ લગભગ 1.33 લાખ કરોડ રૂપિયા બાકી હોવાનો દાવો કર્યો છે. તેમા લાઇસન્સ ફીના રુપે 92000 કરોડ, સ્પેક્ટ્રમ ઉપયોગ ફીના રૂપે 41000 કરોડ સામેલ છે.