કોરોનાના કેસો ઘટતાં તેલંગાણા સરકારે આવતીકાલથી લોકડાઉન સંપૂર્ણપણે ઉઠાવી લેવાની જાહેરાત કરી દીધી છે.
તેલંગાણામાં કોરોનાની બીજી લહેર નબળી પડી
આવતીકાલથી લોકડાઉન હટાવવાનો રાજ્ય સરકારનો નિર્ણય
નાઈટ કર્ફ્યુ પણ હટાવાયો, લોકોને મોટી રાહત
આવતીકાલથી નાઈટ કર્ફ્યુ સહિતના તમામ પ્રતિબંધો હટી જશે
કોરોનાની બીજી લહેર ખૂબ નબળી પડતા તેલંગાણા સરકારે આવતીકાલથી રાજ્યને સંપૂર્ણપણે ઓપન કરવાનો નિર્ણય કર્યો છે. સરકારના આદેશ બાદ આવતીકાલથી રાજ્યમાં લાગુ કોરોનાના તમામ પ્રતિબંધો હટી જશે અને જનજીવન પહેલાથી જેમ રાબેતા મુજબ ધમધમતું થઈ જશે. રાજ્યમાં હવેથી નાઈટ કર્ફ્યુ પણ ચાલુ નહીં રહે. આખા રાજ્યમાંથી લોકડાઉન ઉઠાવનાર તેલંગાણા દેશનું પહેલું રાજ્ય બન્યું છે.
રાજ્યમાં બીજી લહેર અત્યંત નબળી પડી એટલે લોકડાઉન હટાવાયું
ચીફ મિનિસ્ટર કે.ચંદ્રશેખર રાવ દ્વારા બોલાવેલી કેબિનેટની બેઠકમાં લોકડાઉન હટાવવાનો નિર્ણય લેવાયો હતો. સીએમઓની ઓફિસ દ્વારા ફેસબુક પર એવું જણાવાયું કે રાજ્ય સરકારે લોકડાઉન સંપૂર્ણપણે હટાવવાનો નિર્ણય કર્યો છે. કોરોના કેસોની સંખ્યા, પોઝિટીવિટીની ટકાવારીમાં મોટો ઘટાડો થયો હોવાનો મેડિકલ ઓથોરિટીના રિપોર્ટની ચકાસણી કર્યા બાદ તથા રાજ્યમાં કોરોના સંપૂર્ણપણે કાબમાં આવ્યો હોવાથી લોકડાઉન હટાવવાનો નિર્ણય લેવાયો છે.
દેશમાં કોરોના વાયરસના 38 કરોડથી પણ વધારે સેમ્પલ ટેસ્ટ થઈ ચૂક્યા છે. તેમાંથી ફક્ત 28 હજારની જીનોમ સિક્વન્સિંગ થઈ શકી છે. આ સ્ટડીમાં સામે આવ્યું છે કે કોરોના વાયરસના 120 થી પણ વધારે મ્યુટેશન અત્યારસુધી ભારતમાં મળ્યા છે. તેમાંથી 8 સૌથી વધારે ખતરનાક છે. વૈજ્ઞાનિકો હજુ 14 મ્યુટેશનની તપાસમાં લાગ્યા છે.
60 દિવસમાં 76 ટકા સેમ્પલમાં ચોકાવનારા પરિણામ
WHOએ જે ખતરનાક વેરિઅન્ટના નામ આપ્યા છે તેમાં આલ્ફા, બીટા, ગામા, ડેલ્ટા પ્લસ, કાપા, ઈટા અને લોટા છે. આ દરેક વેરિઅન્ટ દેશમાં મળી ચૂક્યા છે. આ વેરિઅન્ટમાં કોઈના પણ કેસ વધારે છે તો કોઈના ઓછા છે. દેશના 28 લેબમાં તેનું સિક્વન્સિંગ ચાલી રહ્યું છે. વેરિઅન્ટની પ્રારંભિક રિપોર્ટના રિઝલ્ટ ચોંકાવનારા છે. મળતી માહિતી અનુસાર ભારતમાં ડેલ્ટાની સાથે કાપા વેરિઅન્ટ પણ છે. છેલ્લા 60 દિવસમાં 76 ટકા સેમ્પલમાં તેની પુષ્ટિ થઈ છે. જીનોમ સિક્વન્સિંગની મદદથી વૈજ્ઞાનિક કોરોના વાયરસમાં થનારા બદલાવને સમજી શકે છે.