15 વર્ષની એક યુવતીએ તેના પિતાને સાયકલ પર બેસાડીને ગુરુગ્રામથી બિહાર સુધીની યાત્રા કરી છે. લગભગ એક અઠવાડિયા સુધી તેના પિતાને સાયકલ પર પાછળ બેસાડીને આખરે યુવતી બિહારના દરભંગા પહોંચી હતી.
લગભગ એક અઠવાડિયામાં, યુવતીએ 1200 કિમીની સફર પૂર્ણ કરી. આ યુવતીનું નામ જ્યોતિ કુમારી છે. પિતા મોહન પાસવાન ઘાયલ હોવાને કારણે જ્યોતિએ તેમને પાછળ બેસાડીને આખા રસ્તે સાઈકલ ચલાવવી પડી હતી.
જ્યોતિ સાતમા ધોરણમાં ભણે છે. તેણે કહ્યું કે, મુસાફરી દરમિયાન તેને માત્ર એક જ ડર રહેતો હતો કે પાછળથી કોઈ અન્ય વાહન આવીને ટક્કર ન મારી જાય.
જ્યોતિ કહે છે કે તેને રાત્રે હાઇવે પર સાયકલ ચલાવવાનો ડર નહોતો કારણ કે સેંકડો પરપ્રાંતિય શ્રમિકો પણ રસ્તા પરથી પસાર થઈ રહ્યા હતા. જો કે, તે રસ્તા પર કાર કે અન્ય વાહન સાથે ટકરાઈ ન જાય તેનો ડર રહેતો હતો.
પિતા અને પુત્રીએ 10 મેએ ગુરુગ્રામથી યાત્રા શરૂ કરી હતી. 16 મેના રોજ, તે તેના ગામ ગામ પહોંચ્યા હતાં. મુસાફરી માટે તેણે 500 રૂપિયામાં સાયકલ ખરીદી. દરભંગા પહોંચાડવા માટે એક ટ્રક ચાલકે 6 હજાર રૂપિયા માંગ્યા, જે જ્યોતિના પિતા આપી શક્યા નહીં.
જ્યોતિના પિતા ગુરુગ્રામમાં ઇ-રિક્ષા ચલાવતા હતા. પરંતુ લોકડાઉનને કારણે તેણે ઇ-રિક્ષા માલિકને જમા કરાવવી પડી હતી. આ સમય દરમિયાન તેને પગમાં પણ ઈજા થઈ હતી.
દરભંગા તેના ગામમાં પહોંચ્યા પછી, જ્યોતિને ઘરમાં ક્વૉરન્ટાઈન કરવામાં આવી છે, જ્યારે પિતાને ક્વોરેન્ટાઇન સેન્ટરમાં રાખવામાં આવ્યા છે. જ્યોતિએ કહ્યું કે પિતા પાસે પૈસા બચ્યાં ન હતા અને મકાનમાલિક મકાન ખાલી કરવા માટે દબાણ કરી રહ્યાં હતાં. બસ ત્યાર બાદ જ્યોતિએ પિતાને સાઈકલથી ઘરે લાવવાનો નિર્ણય કરી લીધો હતો.