જો ડે નાઈટ ટેસ્ટમાં ફાસ્ટ બોલર્સ કરતા સ્પિનર્સ પર વધારે ભાર મુકવામાં આવશે તો અંગ્રેજોમાં સસ્તામાં પેવિલિયન ભેગા કરી શકાશે, દુબઈમાં યોજાયેલ ડે નાઈટ મેચોમાં સ્પિનર્સની બોલબાલા હતી.
ભારતમાં રમાનાર બીજી ડે નાઇટ ટેસ્ટ મેચ
યુએઈ જેવી ઘાસવાળી પીચ જોવા મળશે મોટેરામાં
ડે નાઇટ મેચમાં બેટ્સમેન વધારે વખત મેન ઓફ ધ મેચ બન્યા છે
કોલકાતામાં રમાઈ હતી ડે નાઈટ ટેસ્ટ
ભારત-ઈંગ્લેન્ડ વચ્ચે ૨૪ ફેબ્રુઆરીથી ત્રીજી ટેસ્ટનો પ્રારંભ થઈ રહ્યો છે. અમદાવાદના મોટેરા સ્ટેડિયમમાં રમાનારી આ મેચ ડે-નાઇટ છે. આ ભારતમાં રમાનારી માત્ર બીજી ડે-નાઇટ ટેસ્ટ છે. આ પહેલાં નવેમ્બર-૨૦૧૯માં કોલકાતામાં ભારત અને બાંગ્લાદેશ વચ્ચે ડે-નાઇટ ટેસ્ટ રમાઈ હતી. ઘાસવાળી પીચ પર રમાયેલી એ ટેસ્ટ મેચ ત્રીજા દિવસે જ પૂરી થઈ ગઈ હતી. કોલકાતા ટેસ્ટમાં ફાસ્ટ બોલર્સને ૧૯ વિકેટ મળી હતી. જોકે હાલની ભારતીય ટીમ ઘાસવાળી પીચ પર ઈંગ્લેન્ડ સામે રમવા નહીં ઇચ્છે. શક્ય છે કે વિરાટ સેના એવી જ પીચ ઇચ્છશે, જેવી યુએઈમાં રમાયેલી બે ડે-નાઇટ ટેસ્ટ મેચ દરમિયાન હતી.
ડે નાઈટ ટેસ્ટમાં સ્પિનર્સ વધારે વિકેટ ઝડપે છે
૨૦૧૬ અને ૨૦૧૭માં રમાયેલી એ ડે-નાઇટ ટેસ્ટમાં સ્પિનર્સે ફાસ્ટ બોલરની સરખામણીએ વધુ સારું પ્રદર્શન કર્યું હતું. ડે-નાઇટ ક્રિકેટમાં સામાન્ય રીતે સ્પિનર કરતાં ફાસ્ટ બોલરે વધુ સારું પ્રદર્શન કર્યું છે, પરંતુ દુબઈમાં એવું નથી હોતું. દુબઈમાં બે ડે-નાઇટ ટેસ્ટ રમાઈ છે. એક પાકિસ્તાન-વિન્ડીઝ વચ્ચે અને બીજી પાકિસ્તાન-શ્રીલંકા વચ્ચે. આ બંને ટેસ્ટમાં ફાસ્ટ બોલર્સે ૨૫ અને સ્પિનર્સે ૪૬ વિકેટ ઝડપી હતી. દુબઈમાં રમાયેલી બે ડે-નાઇટ ટેસ્ટ મેચમાં પાકિસ્તાનના લેગ સ્પિનર યાસિર શાહે કુલ ૧૫ વિકેટ ઝડપી હતી. એ ઉપરાંત વિન્ડીઝના દેવેન્દ્ર બિશુએ એક જ ટેસ્ટ મેચમાં ૧૦ વિકેટ ઝડપી હતી. બિશુ પણ યાસિર શાહની જેમ લેગ સ્પિનર છે. શ્રીલંકાના લેફ્ટ આર્મ સ્પિનર રંગના હેરાથે દુબઈમાં ડે-નાઇટ ટેસ્ટમાં રમતા પાંચ િવકેટ ઝડપી છે.
ડે નાઈટ ટેસ્ટ લાંબી નથી ચાલતી
કેટલીક ડે-નાઇટ ટેસ્ટ ત્રણ દિવસમાં જ સમાપ્ત થવાને કારણે એવી ધારણા બંધાઈ રહી છે કે પિન્ક બોલ ટેસ્ટ લાંબી નથી ચાલતી, જ્યારે હકીકત કંઈ અલગ જ તસવીર રજૂ કરે છે. અત્યાર સુધી દુનિયાભરમાં જે ૧૫ ડે-નાઇટ ટેસ્ટ રમાઈ છે, તેમાંથી નવ ટેસ્ટ ચાર દિવસ કે તેનાથી વધુ ચાલી છે. આમાંની પાંચ ટેસ્ટ પાંચમા દિવસે ખતમ થઈ છે. ૧૫માંથી માત્ર પાંચ ટેસ્ટ જ ત્રણ દિવસમાં પૂરી થઈ છે. એક માત્ર ડે-નાઇટ ટેસ્ટ એવી રહી છે, જે માત્ર દિવસમાં પૂરી થઈ ગઈ હતી. દુબઈમાં રમાયેલી બને ડે-નાઇટ ટેસ્ટ પાંચમા દિવસે પૂરી થઈ હતી.
સૌથી વધુ બેટ્સમેન જ પ્લેયર ઓફ ધ મેચ રહ્યાા છે
અત્યાર સુધી રમાયેલી ૧૫ પિન્ક બોલ ટેસ્ટમાં સૌથી વધુ નવ વાર બેટ્સમેન જ પ્લેયર ઓફ ધ મેચ જાહેર થયા છે. ત્યાર બાદ ફાસ્ટ બોલર્સનો નંબર આવે છે, જેઓ પાંચ વાર આ ખિતાબ જીતી ચૂક્યા છે. એક વાર ઓલરાઉન્ડર જેસન હોલ્ડરને પ્લેયર ઓફ ધ મેચ જાહેર કરાયો હતો. ડે-નાઇટ ટેસ્ટમાં સ્પિનર અત્યાર સુધીમાં આ સન્માન હાંસલ કરી શક્યા નથી. અત્યાર સુધીમાં કોઈ ક્રિકેટર એકથી વધુ વાર પ્લેયર ઓફ મેચનો ખિતાબ જીતી શક્યો નથી.
ટીમ ઇન્ડિયાની ત્રીજી અને ઈંગ્લેન્ડની ચોથી ડે-નાઇટ ટેસ્ટ
અમદાવાદમાં ઈંગ્લેન્ડ સામે ભારતની કુલ ત્રીજી ડે-નાઇટ ટેસ્ટ હશે. ટીમ ઇન્ડિયાએ અત્યાર સુધીમાં રમેલી બે ડે-નાઇટમાંથી એક બાંગ્લાદેશ સામે જીતી છે અને એકમાં ઓસ્ટ્રેલિયા સામે પરાજય થયો છે, જ્યારે ઈંગ્લેન્ડની આ ચોથી ડે-નાઇટ ટેસ્ટ હશે. ઈંગ્લેન્ડની ટીમે ઘરઆંગણે એક ડે-નાઇટ ટેસ્ટ રમી છે, જેમાં તેનો વિજય થયો હતો. ઈંગ્લિશ ટીમે બે ડે-નાઇટ ટેસ્ટ વિદેશી ધરતી પર રમી છે અને એ બધામાં હારનો સામનો કરવો પડ્યો છે.
મોટેરામાં હાર્દિક-ઉમેશ શર્ટલેસ બન્યા
બુધવારથી શરૂ થઈ રહેલી ડે-નાઇટ ટેસ્ટ માટે ભારત-ઈંગ્લેન્ડની ટીમો મોટેરામાં આકરી પ્રેક્ટિસ કરી રહી છે. પ્રેક્ટિસ સેશન દરમિયાન હાર્દિક પંડ્યા અને ઉમેશ યાદવની એક તસવીર સોશિયલ મીડિયામાં વાઇરલ થઈ રહી છે. આ તસવીરમાં હાર્દિક પોતાના સિક્સ પેક્સ એબ્સ દેખાડતો નજરે પડી રહ્યો છે. જોકે આ તસવીરમાં એક ખાસ વાત એ છે કે હાર્દિકની સાથે ઉમેશ યાદવ પણ પોતાની ફિટનેસ દેખાડતો નજરે પડી રહ્યો છે. બંને ખેલાડી શર્ટલેસ થઈને સિક્સ પેક્સ એબ્સને ફલોન્ટ કરી રહ્યા છે.