PHOTO / ગર્વથી છાતી ફૂલી જશે! ટીમ ઈન્ડિયાની જર્સીમાં મોટો ફેરફાર, વિરાટ-રોહિતનું સપનું પૂર્ણ

ભારત અને શ્રીલંકા વચ્ચે 27 જુલાઈથી T20 સિરીઝ શરૂ થવાની છે. ટીમ ઈન્ડિયા શ્રીલંકા સામેની ટી-20 શ્રેણીમાં ખાસ જર્સી પહેરીને ઉતરશે. આ જર્સીમાં બે સ્ટાર્સ હશે જે માત્ર ટીમ ઈન્ડિયા માટે જ નહીં પરંતુ તેના ફેન્સ માટે પણ ખૂબ જ ખાસ છે. ટીમ ઈન્ડિયાની જર્સીમાં બે સ્ટાર્સ ટીમ ઈન્ડિયા બે વખત T20 વર્લ્ડ ચેમ્પિયન બનવાનું પ્રતીક છે. T20 વર્લ્ડ કપ 2024 પહેલા ટીમ ઈન્ડિયાની જર્સીમાં માત્ર એક જ સ્ટાર હતો, પરંતુ 29 જૂને ફરી એકવાર વર્લ્ડ ચેમ્પિયન બનવાની સાથે ટીમની જર્સીમાં વધુ એક સ્ટારનો ઉમેરો થયો છે. દુઃખની વાત એ છે કે વિરાટ અને રોહિત આ જર્સી ક્યારેય પહેરી શકશે નહીં કારણ કે બંનેએ ટી20 ફોર્મેટને અલવિદા કહી દીધું છે.

ટીમ ઈન્ડિયાની ખાસ જર્સી

શ્રીલંકા સામેની શ્રેણી ટીમ ઈન્ડિયા અને તેના ચાહકો માટે ખૂબ જ ખાસ છે કારણ કે આ શ્રેણી તેના નવા મુખ્ય કોચ ગૌતમ ગંભીરના કાર્યકાળની શરૂઆત પણ કરશે. નવા હેડ કોચ કઈ રણનીતિ સાથે મેદાનમાં આવે છે તેના પર સૌની નજર છે. જો કે શ્રીલંકા સીરીઝ ટીમ ઈન્ડિયા માટે પણ ખાસ છે કારણ કે આ સીરીઝમાં બ્લુ બ્રિગેડ નવી જર્સી સાથે મેદાનમાં ઉતરવા જઈ રહી છે. આ જર્સી ખૂબ જ ખાસ હશે કારણ કે તેને હાંસલ કરવા માટે વિરાટ કોહલી, રોહિત શર્મા જેવા દિગ્ગજોએ જમીન આસમાન એક કર્યા હતા. રોહિત શર્માની નિવૃત્તિ સાથે ટીમ ઈન્ડિયાના કેપ્ટનમાં પણ બદલાવ આવ્યો છે. હવે ટીમ ઈન્ડિયાની કમાન સૂર્યકુમાર યાદવના હાથમાં છે. શુભમન ગિલને વાઇસ કેપ્ટન બનાવવામાં આવ્યો છે. હાર્દિક પંડ્યા તેની ખરાબ ફિટનેસના કારણે કેપ્ટન બની શક્યો નથી.

વધુ વાંચો : IND vs SL: હાર્દિકને કેપ્ટન્સી ન સોંપવા પર પાકિસ્તાની ક્રિકેટરે કહ્યું,'આ તો માત્ર બહાનું છે...'

પ્રથમ T20 મેચ 27 જુલાઈએ રમાશે

ભારત અને શ્રીલંકા વચ્ચે પ્રથમ T20 મેચ 27 જુલાઈએ રમાશે. બીજી T20 મેચ 28 જુલાઈએ અને ત્રીજી T20 મેચ 29 જુલાઈએ રમાશે. ત્રણેય મેચ પલ્લેકેલેમાં રમાશે. આ પછી કોલંબોમાં ODI શ્રેણી યોજાશે, જેની પ્રથમ મેચ 2જી ઓગસ્ટથી શરૂ થશે. બીજી વનડે 4 ઓગસ્ટે અને ત્રીજી વનડે 7 ઓગસ્ટે રમાશે.