વિરાટ કોહલી સેનામાં 3 ફાસ્ટ બોલરો અને 1 સ્પિનર છે. જસપ્રીત બુમરાહ, મહોમ્મદ શમી, ઉમેશ યાદવ ટીમમાં ફાસ્ટ બોલર તરીકે છે જ્યારે અશ્વિન એકમાત્ર સ્પિનર છે.
આ સાથે ટીમ ઇન્ડિયામાં 6 બેટ્સમેન છે અને સાહાને વિકેટ કિપરની જવાબદારી સોંપવામાં આવી છે. મયંક અગ્રવાલ સાથે ઓપનિંગમાં શુભમન ગિલને બદલે પૃથ્વી શૉને સ્થાન અપાયું છે.
નિષ્ણાતોમાં શૉને સ્થાન આપવા મુદ્દે તર્ક વિતર્ક
નોંધનીય છે કે શુભમન ગિલે બંને પ્રેક્ટિસ મેચમાં સારું પ્રદર્શન કર્યું હતું. તેની સામે શૉની સુનિલ ગાવસ્કર, એલન બોર્ડર જેવા ધુરંધર ખેલાડીઓ ટીકા કરી ચુક્યા છે. તેમના મતે ક્રિકેટના સૌથી ધીમા ફોર્મેટમાં પણ શૉ અલગ અલગ પ્રકારના શોટ અજમાવવાનો પ્રયત્ન કરે છે.
યુવાઓ સારું પ્રદશન કરવા થનગની રહ્યા છે: કોહલી
પ્રેસ કોન્ફરન્સ દરમિયાન કોહલીએ કહ્યું હતું કે શુભમન ગિલ અને પૃથ્વી શૉ જેવા યુવા ખેલાડીઓ ટેસ્ટમાં સારું પ્રદર્શન કરવા તત્પર છે. શુભમનને હજુ સુધી ટેસ્ટમાં રમવાની તક મળી નથી પણ જયારે પણ તેને તક મળશે ત્યારે તેના પ્રદર્શન ઉપર સૌની નજર રહેશે. પૃથ્વી શૉ ઓસ્ટ્રેલિયાની ધરતી ઉપર પ્રથમ વખત રમવા જઈ રહ્યો છે. મયંકે પણ 2018-19ની શ્રેણીમાં અહીં સારું પ્રદર્શન કર્યું હતું. યુવા ખેલાડીઓને અહીં પોતાની સ્કિલ્સ પ્રદર્શિત કરવી ખૂબ ગમે છે.
નોંધનીય છે કે આવતી કાલ એટલે કે 17 ડિસેમ્બરથી પિંક બોલ ટેસ્ટની શરૂઆત થવા જઈ રહી છે.