વર્તમાન ટેસ્ટ રેન્કિંગમાં નંબર-1 સ્થાન હાંસલ કરનાર ભારતીય ટીમે એક ઉપલબ્ધિ પોતાના નામે કરી લીધી છે. ટીમ ઈન્ડિયાએ સૌથી સફળ ટીમ તરીકે એક દાયકો પૂરો કર્યો છે. રમતની સૌથી લાંબી ટેસ્ટ ક્રિકેટમાં 2010-2019 દરમિયાન ટીમ ભારતીય ટીમે ટેસ્ટ ક્રિકેટમાં ખૂબ જ શાનદાર પ્રદર્શન કર્યું અને જીત હાંસલ કરીને ટોચ પર પહોંચી ગઈ છે.
સૌથી સફળ ભારતીય ટીમ તરીકે દાયકો પૂરો કર્યો
2010-19 દરમિયાન ભારતે સૌથી વધુ જીત હાંસલ કરી
વિરાટની કેપ્ટન્સી હેઠળ મેળવી સૌથી વધુ જીત
2010થી 2019 સુધીના 10 વર્ષ દરમિયાન ભારતે 52.34 ટકા જીત હાંસલ કરી છે. જ્યારે આ એક દાયકામાં ઓસ્ટ્રેલિયા (5૦.89) અને દક્ષિણ આફ્રિકા (50.00) ટકા સાથે અનુક્રમે બીજા અને ત્રીજા સ્થાને છે. ઈંગ્લેન્ડની ટીમ 45.23 ટકા સાથે ચોથા સ્થાને છે. બાંગ્લાદેશની ટીમ 17.56% જીત સાથે સૌથી પાછળ રહી હતી. એક સમયે વિશ્વ ક્રિકેટમાં ધૂમ મચાવનાર વેસ્ટ ઇન્ડીઝની ટીમે 26.51 જીત હાંસલ કરી હતી અને તેની સાથે જ તે 8મા સ્થાન પર છે.
2010થી 2019 સુધીની ટેસ્ટ ક્રિકેટમાં ભારતીય ટીમના પ્રદર્શનની વાત કરીએ તો, પહેલા પાંચ વર્ષ (2010-2014)માં ટીમ ઈન્ડિયાની જીતની ટકાવારી 39.62 હતી અને ટી ઈન્ડિયાએ 21 જીત મેળવી હતી, પરંતુ છેલ્લા પાંચ વર્ષમાં (2015-2019) શ્રેષ્ઠ પ્રદર્શન કરીને 35 ટેસ્ટ મેચ પોતાના નામે કરી લીધી હતી. આ સમય દરમિયાન તેમની જીતની ટકાવારી 64.81 રહી હતી.
ઉલ્લેખનીય છે કે, વિરાટ કોહલીની કેપ્ટન્સી હેઠળ ટીમ ઈન્ડિયાએ વિશ્વ ક્રિકેટમાં વર્ચસ્વ જમાવ્યું હતું. નોંધનીય છે કે, ડિસેમ્બર 2014માં ધોનીએ અચાનક ઓસ્ટ્રેલિયા સામેની શ્રેણીની વચ્ચે જ અચાનક ટેસ્ટ કેપ્ટન્સી છોડી દીધી હતી. આટલું જ નહીં તેણે ટેસ્ટ ક્રિકેટમાંથી તત્કાળ નિવૃત્તિ લેવાની પણ જાહેરાત કરી હતી. વિરાટ 2014-2019 દરમિયાન ભારતનો સૌથી સફળ કેપ્ટન બન્યો હતો. વિરાટની સુકાની હેઠળ ભારતે અત્યાર સુધીમાં 53માંથી 33 ટેસ્ટમાં જીત મેળવી છે.
ઓસ્ટ્રેલિયા અને ઈંગ્લેન્ડ પણ પાછળ નથી
પરંતુ 2010થી 2019 દરમિયાન સૌથી વધુ ટેસ્ટ જીતવાની વાત કરીએ તો ટીમ ઈન્ડિયાએ 56 ટેસ્ટ જીતી હતી અને તે બીજા સ્થાન પર છે. ઓસ્ટ્રેલિયા અને ઈંગ્લેન્ડ 57 ટેસ્ટ જીત્યા બાદ સંયુક્ત રીતે બીજા સ્થાને છે જ્યારે દક્ષિણ આફ્રિકા 54 ટેસ્ટ જીતીને ત્રીજા સ્થાન પર છે.