ભારતીય ક્રિકેટ ટીમના સ્ટાર ઓલરાઉન્ડર હાર્દિક પંડ્યા અત્યારે ફિટનેસને પગલે રાષ્ટ્રીય ટીમથી બહાર છે. પરંતુ તેઓ ઘણા મહિનાથી સતત પોતાની ફિટનેસ પર કાર્ય કરી રહ્યાં છે. ક્રિકેટથી દૂર રહેલા હાર્દિક પંડ્યાએ પોતાના પરિવાર સાથે થોડો સમય વિતાવ્યો છે અને જેને પગલે તેમણે સોશિયલ મીડિયામાં ચાલી રહેલા ટ્રેન્ડિંગ 'Srivalli' ગીતના ડાન્સ સ્ટેપનો વીડિયો ઈન્સ્ટાગ્રામ પર શેર કર્યો છે.
હાર્દિક પંડ્યા ફિટનેસને પગલે ટીમમાંથી બહાર
હાર્દિક પંડ્યાએ તેની નાની સાથે કર્યો ડાન્સ
ટ્રેન્ડિંગ સોન્ગ 'Srivalli'ના હુક સ્ટેપ કર્યા
હાર્દિક પંડ્યાએ ફિલ્મ પુષ્પા-ધ રાઈઝના આ હિટ ગીતનો હુક સ્ટેપ કર્યો
આ વીડિયોમાં તેમની સાથે તેમની નાનીએ ડાન્સ કર્યો. જેણે અલ્લૂ અર્જૂનની ફિલ્મ પુષ્પા-ધ રાઈઝના આ હિટ ગીતનો હુક સ્ટેપ કર્યો છે. હાર્દિક પંડ્યાએ પોતાની નાની સાથે કરેલો આ ડાન્સનો વીડિયો અપલોડ કર્યો અને કેપ્શનમાં લખ્યું કે અમારી પોતાની પુષ્પા નાની. આ સાથે જ તેમણે અલ્લૂ અર્જુનને પણ આ વીડિયોમાં ટેગ કર્યા. જેના પર સુપરસ્ટાર અલ્લૂ અર્જુને પણ કોમેન્ટ કરતા લખ્યું કે ખૂબ જ પ્રેમાળ અને હૃદયને સ્પર્શી જાય તેવો વીડિયો. મારો પ્રેમ અને સન્માન તેના માટે. ક્રિકેટ જગતથી પણ આ વીડિયો પર ઘણા ખેલાડીઓએ કોમેન્ટ કરી. ભારતીય ટીમના યુવાન બેટ્સમેન ઈશાન કિશને આ વીડિયોના ખૂબ વખાણ કર્યા.
ઘણા ક્રિકેટરોએ 'Srivalli'ના ગીત પર હુક સ્ટેપ કર્યા
મહત્વનું છે કે, હાર્દિક પંડ્યાને હાલમાં અમદાવાદ ફ્રેન્ચાઈઝીમાં સામેલ કરવામાં આવ્યાં અને તેમને કેપ્ટન પણ બનાવવામાં આવ્યાં છે. હાર્દિક પંડ્યાની સાથે રાશિદ ખાન અને શુભમન ગિલને પણ આઈપીએલની નવી ટીમમાં સ્થાન મળ્યું છે. ભારતીય ટીમના પૂર્વ દિગ્ગજ બેટ્સમેન સુરેશ રૈના, ઓસ્ટ્રેલિયાના હાલના બેટ્સમેન ડેવિડ વોર્નર, વેસ્ટ ઈન્ડીઝના ડ્વેન બ્રાવોએ હાલમાં સુપરસ્ટાર અલ્લૂ અર્જુનની ફિલ્મ પુષ્પાના એક ટ્રેન્ડિંગ 'Srivalli'ના ગીત પર હુક સ્ટેપ કર્યો અને ઈન્સ્ટાગ્રામ પર વીડિયો પણ પોસ્ટ કર્યો. આ ઉપરાંત ભારતીય ટીમના બેટ્સમેન સૂર્યકુમાર યાદવ અને ઈશાન કિશને પણ આ ગીત પર ડાન્સ કર્યો.