મુખ્ય 4 માંગો સાથે એક થઈ શિક્ષકો સરકારને કાને વાત નાખી રહ્યા છે. આજે કાળી પટ્ટી ધારણ કરી મૌન ઠેર ઠેર મૌન ધરણાં કરવામાં આવ્યા.
ગુજરાતમાં મોટા આદોલનના વરતારા
ડોકટરો બાદ હવે શિક્ષકો પડતર પ્રશ્ને રસ્તા પર
4 મુદ્દાઓ સાથે અનેક શહેરો કરી રહ્યા છે વિરોધ
રાજ્યમાં વધુ એક આંદોલનના એંધાણ વર્તાઈ રહ્યા છે.સરકાર સામે હવે શિક્ષકોએ પોતાની પડતર માગોને લઈને બાયો ચડાવી છે.રાજ્યના જુદા જુદા જિલ્લાઓમાં આજે શિક્ષકોએ કાળી પટ્ટી ધારણ કરી મૌન ધરણા યોજયા હતા.
શિક્ષકોની માગ શું છે?
શિક્ષકોએ 7માં પગારપંચના બાકી હપ્તા,પાંચ વર્ષની ફિક્સ પગારની નોકરી તમામ હેતુઓ માટે સળંગ રાખવી,7માં પગારપંચનું એરિયર્સ,ફાજલ શિક્ષકોનું કાયમી રક્ષણ,જૂની પેન્શન યોજનાનો અમલ જેવી ચાર મહત્વની માગોને લઈને રાજ્યભરના શિક્ષકોએ કાળી પટ્ટી ધારણ કરી મૌન ધરણા યોજ્યા હતા.ઉલ્લેખનીય છે કે એક બાજુ રૂપાણી સરકારના 5 વર્ષ પૂર્ણ થવા પર વિવિધ દિવસોની ઉજવણી કરી રહી છે ને બીજી બાજુ જૂનિયર તબીબો,શિક્ષકો સહિત અનેક લોકોએ પોતાની માગોને લઈ સરકાર સામે આંદોલન માંડ્યા છે.
મોરબીમાં મૌન ધરણા
મોરબી જિલ્લા માધ્યમિક શિક્ષકસંઘ અને મોરબી જિલ્લા ઉચ્ચતર માધ્યમિક શિક્ષકસંઘ દ્વારા મૌન ધરણાંનો કાર્યક્રમ યોજાયો હતો.જિલ્લા શિક્ષણાધિકારીની કચેરી ખાતે જિલ્લાના આશરે 100 થી 150 જેટલા શિક્ષકો આ ધરણાં પ્રદર્શનમાં જોડાયા હતા.
સુરેન્દ્રનગર કાળી પટ્ટી બાંધી વિરોધ
સુરેન્દ્રનગર બહુમાળી ભવન ખાતે જીલ્લા માધ્યમિક શિક્ષક સંઘ દ્વારા પડતર પ્રશ્નો અંગે ધરણાં યોજવામાં આવ્યા હતા. માધ્યમિક શિક્ષકોના પડતર પ્રશ્નો જેમ કે પાંચ વર્ષની ફિક્સ પગારની નોકરી, સાતમા પગાર પંચનુ એરિયર્સ, ફાજલ શિક્ષકોનુ કાયમી રક્ષણ,જુની પેન્શન યોજનાનો અમલ કરવો સહીતની માંગો પુરી ન થતાં શિક્ષકોએ કાળી પટ્ટી બાંધી મૌન ધરાણા કર્યા હતા.
નડિયાદના શિક્ષકો પણ મેદાને
ખેડા જિલ્લાના નડિયાદના 100થી 125 જેટલા શિક્ષકો રાજ્ય વ્યાપી આંદોલનમાં જોતરાયા છે. અહી પણ શિક્ષકોએ કાળી પટ્ટી પહેરી મૌન ધરણા કરી વિરોધ પ્રગટ કર્યો, અને જીલ્લા શિક્ષણાધિકારીની કચેરીની બહાર ત્રણ કલાક સુધી ધરણા આ કાર્યક્રમ યોજવામાં આવ્યો હતો. સરકાર દ્વારા કોઈ નિર્ણય નહી લેવામાં આવતાં શિક્ષકોએ સરકાર સામે બાયો ચઢાવી છે.
તાપીમાં પણ શિક્ષકો બેઠા ધરણાં પર
તાપીમાં પણ સેવા સદન બહાર શિક્ષકોએ પડતર પ્રશ્નો બાબતે મૌન ધરણા કર્યા, તાપી માધ્યમિક અને ઉચ્ચતર માધ્યમિક શિક્ષક સંઘ આ કાર્યક્રમ કરી સરકાર સમક્ષ શિક્ષકોની માગ મૂકવામાં આવી. ત્યારે શિક્ષકો પણ પોતાની માગણીના મુદ્દે અડગ દેખાઈ રહ્યા છે, આવનાર સમયમાં જો સરકાર તરફથી માગણી ન સંતોષાય તો મોટા આંદોલનના વરતારા દેખાઈ રહ્યા છે.