ટાટા મોટર્સે દેશની સૌથી સસ્તી ઇલેક્ટ્રિક કાર ટાટા ટિઆગો ઇવી લોન્ચ કરી છે. કંપનીએ આ કારમાં ખૂબ જ ઓછી કિંમતમાં ઘણા શાનદાર ફીચર્સ આપ્યા છે.
ટાટા મોટર્સે વધુ એક નવી EV લોન્ચ કરી
પોતાની ત્રીજી EV ટાટા ટિઆગો માર્કેટમાં લોન્ચ
ઓછા ભાવમાં મળશે વધુ શાનદાર ફીચર્સ
ટાટા મોટર્સે બુધવારે દેશની સૌથી સસ્તી ઇલેક્ટ્રિક કાર ટાટા ટિઆગો ઇવી લોન્ચ કરી છે, જેનાથી તહેવારોની સિઝન માટે તેની તૈયારીઓને નવો વેગ મળ્યો છે. ટાટા મોટર્સ પહેલેથી જ સ્થાનિક ઇલેક્ટ્રિક કાર બજારમાં પ્રભુત્વ ધરાવે છે અને હવે પ્રથમ હેચબેક ઇલેક્ટ્રિક વાહનના લોન્ચિંગ સાથે, કંપનીનો દબદબો વધુ વધવાની ધારણા છે. આ સાથે જ ગ્રાહકોની રાહ જોવાના મહિનાઓનો આજે અંત આવ્યો હતો. કંપનીએ આ કારમાં ખૂબ જ ઓછી કિંમતમાં ઘણા શાનદાર ફીચર્સ આપ્યા છે.
આ સુવિધાઓથી સજ્જ છે ટિયાગો ઇવી
કંપનીએ પોતાની નવી ઇલેક્ટ્રિક કારમાં ઘણા નવા ફીચર્સ આપ્યા છે. તેમાં 24kWhની બેટરી પેક આપવામાં આવી છે, જે એકવાર ફુલ ચાર્જ થયા બાદ 315 કિમીની રેન્જ આપવામાં સક્ષમ છે. તે જ સમયે, 19.2 kWh બેટરી પેક વિકલ્પ સિંગલ ચાર્જ પર 250 કિલોમીટર સુધી ચાલી શકે છે. કંપનીએ તેમાં એ જ ઇલેક્ટ્રિક મોટર અને ફ્રન્ટ-વ્હીલ ડ્રાઇવ સેટઅપ આપ્યું છે, જે આપણે ટિગોર ઇવીમાં જોઇ ચૂક્યા છીએ.
આ મોટર 74.7PS પાવર અને 170Nm ટોર્ક જનરેટ કરવામાં સક્ષમ છે. આ ઉપરાંત કંપનીએ ટિયાગો ઇવીમાં ક્રૂઝ કંટ્રોલ, મલ્ટીપલ રિ-જેન મોડ જેવા ફીચર્સ પણ આપ્યા છે. કંપનીનો દાવો છે કે તેની બેટરી લગભગ 57 મિનિટમાં 80 ટકા સુધી ચાર્જ થાય છે. આ કાર માત્ર 5.7 સેકન્ડમાં શૂન્યથી 60 કિલોમીટર પ્રતિ કલાકની સ્પીડ પકડવામાં સક્ષમ છે.
કિંમત જાણીને ચોંકી જશો
કિંમતની વાત કરીએ તો પહેલેથી જ એવી આશા હતી કે તે દેશની સૌથી સસ્તી ઇલેક્ટ્રિક કાર તો હશે જ, પરંતુ તેની કિંમત 10 લાખ રૂપિયાની આસપાસ પણ હોઇ શકે છે. કંપનીએ કિંમતોની જાહેરાત કરીને બધાને ચોંકાવી દીધા હતા. કંપનીએ જણાવ્યું કે, આ કારની એક્સ શોરૂમ કિંમત પહેલા 10 હજાર ગ્રાહકો માટે 8.49 લાખ રૂપિયા રાખવામાં આવી છે. તે જ સમયે, તેના ટોપ વેરિઅન્ટની એક્સ-શોરૂમ કિંમત 11.79 લાખ રૂપિયા છે.
તેમાંથી 2000 કાર કંપનીના જૂના ગ્રાહકો માટે રિઝર્વ રહેશે. ટાટા ટિયાગોનું બુકિંગ 10 ઓક્ટોબરથી શરૂ થશે અને તેની ડિલિવરી જાન્યુઆરી 2023થી શરૂ થશે. ટાટા ટિગોર ઇવી અત્યાર સુધીની સૌથી સસ્તી ઇલેક્ટ્રિક કાર હતી, જેની એક્સ-શોરૂમ કિંમત 12.49 લાખ રૂપિયાથી શરૂ થાય છે. અન્ય કંપનીઓની વાત કરીએ તો કોઈ પણ કંપની 20 લાખ રૂપિયાથી ઓછી રેન્જમાં ઇલેક્ટ્રિક વાહનો ઓફર કરતી નથી.
ટાટાની ત્રીજી ઇલેક્ટ્રિક કાર
ટાટા મોટર્સે એસયુવી અને સેડાન કેટેગરીમાં ઇલેક્ટ્રિક વાહનો લોન્ચ કરી દીધા છે. એસયુવી સેગમેન્ટમાં ટાટા નેક્સન ઇવીને પણ ખૂબ પસંદ કરવામાં આવી છે અને ઇવી માર્કેટમાં ટાટા મોટર્સ પર આનો દબદબો રહ્યો છે. આ સાથે જ કંપનીએ થોડા સમય પહેલા ટાટા ટિગોર ઇવીને સેડાન કેટેગરીમાં રજૂ કરી હતી. હવે હેચબેકમાં કંપનીએ ગ્રાહકોને ઇલેક્ટ્રિક વાહનોનો વિકલ્પ આપ્યો છે. કિંમતની વાત કરીએ તો આ નવા ઇલેક્ટ્રિક વ્હીકલને પણ હાથોહાથ લેવામાં આવે તેવી આશા છે.
હવે લોન્ચ થશે 7 ઇલેક્ટ્રિક કાર
તમને જણાવી દઈએ કે ટાટા મોટર્સે વર્ષ 2026 સુધીમાં 10 ઈલેક્ટ્રિક કાર લોન્ચ કરવાનો ટાર્ગેટ રાખ્યો છે. ટાટા નેક્સન ઇવી અને અને ટાટા ટિગોર ઇવી બાદ હવે ટાટા ટિયાગો ઇવીના લોન્ચિંગ સાથે જ ટાટાની ત્રણ ઇલેક્ટ્રિક કાર બજારમાં આવી ગઇ છે. એટલે કે આવનારા 3-4 વર્ષ દરમિયાન ટાટા મોટર્સ વધુ 7 ઈલેક્ટ્રિક કાર લોન્ચ કરશે. દેશની સૌથી મોટી ઇલેક્ટ્રિક કાર કંપની ટાટા મોટર્સે સૌથી પહેલા ટિયાગો ઇવીને યુકેમાં કોન્સેપ્ટ વ્હીકલ તરીકે પ્રદર્શિત કરી હતી. ત્યાર બાદ તે 2018ના ઓટો એક્સપોમાં પણ જોવા મળી હતી.
ભારતીય ઇવી માર્કેટમાં ટાટાનો દબદબો
ટાટા મોટર્સને અત્યાર સુધી ઇલેક્ટ્રિક વ્હીકલ સેગમેન્ટમાં શાનદાર રિસ્પોન્સ મળ્યો છે. કંપનીની ટાટા નેક્સન ઇવી ભારતની સૌથી વધુ વેચાતી ઇલેક્ટ્રિક કાર છે. ટાટા મોટર્સ ભારતીય ઇલેક્ટ્રિક કાર બજારમાં 88 ટકા હિસ્સો ધરાવે છે. ઓગસ્ટ 2022 માં, કંપનીએ નેક્સન ઇવી પ્રાઇમ, નેક્સન ઇવી મેક્સ અને ટિગોર ઇવી સહિત કુલ 3,845 ઇલેક્ટ્રિક કારનું વેચાણ કર્યું હતું. આ પહેલા કંપનીએ જુલાઈ 2022માં 4,022 ઈલેક્ટ્રિક કાર વેચી હતી. હવે ટિયાગો ઈવીના આવવાથી વેચાણ હજુ વધવાની આશા છે.