મારૂતિ સુઝુકી બાદ ટાટા મોટર્સે નવા વર્ષમાં પણ પેસેન્જર કારના ભાવ વધારવાની જાહેરાત કરી છે. નવી કિંમતો બુધવાર 19 જાન્યુઆરી 2022થી લાગુ થઇ જશે.
ટાટા મોટર્સ પણ નવા વર્ષમાં પેસેન્જર કારના ભાવ વધારશે
કાર પર નવી કિંમતો 19 જાન્યુઆરી 2022થી લાગુ થશે
કંપનીએ સરેરાશ 0.9 ટકા પેસેન્જર ગાડીઓની કિંમત વધારી
ટાટા મોટર્સ પેસેન્જર ગાડીઓની વધારી રહી છે કિંમત
ટાટા મોટર્સે જાહેરાત કરી છે કે કંપની 19 જાન્યુઆરીથી સરેરાશ 0.9 ટકા પોતાના પેસેન્જર ગાડીઓની કિંમત વધારી રહી છે. કઈ કારની કિંમતમાં કેટલો વધારો થશે તે મોડલ વેરિએન્ટ પર નિર્ભર કરશે. જો કે, ટાટા મોટર્સે કહ્યું છે કે જે ગ્રાહકોએ 18 જાન્યુઆરી 2022 પહેલા કાર ખરીદવા માટે બુક કરી છે તેના પર કિંમતમાં વધારાની કોઈ અસર થશે નહીં. તો ટાટા મોટર્સે ગ્રાહકના ફીડબેકના આધારે કેટલાંક વેરિએન્ટની કિંમતોમાં 10,000 રૂપિયા કાપવાનો પણ નિર્ણય કર્યો છે.
મારૂતિ સુઝુકી ઈન્ડિયાએ ઘણા મોડલના ભાવ 4.3 ટકા સુધી વધાર્યા
ટાટા મોટર્સે એક નિવેદનમાં કહ્યું છે કે ખર્ચ વધવાને પગલે કંપનીએ ભાવ વધારવાનો નિર્ણય લેવો પડ્યો છે. કંપની વધારે ખર્ચનો મોટો ભાગ પોતે વહન કરી રહી છે. પરંતુ કેટલાંક ભાગમાં વધારો કરી તેને પુરૂ કરાઈ રહ્યું છે. ટાટા મોટર્સે પોતાની કોમર્શિયલ કારની કિંમત 1 જાન્યુઆરી 2022થી વધારી છે. આની પહેલા મારૂતિ સુઝુકી ઈન્ડિયાએ પોતાના ઘણા મૉડલના ભાવ 4.3 ટકા સુધી વધાર્યા છે. ઉત્પાદન ખર્ચમાં થયેલા વધારાના ભારને આંશિક રીતે ઘટાડવા માટે આ પગલું ઉપાડવામાં આવ્યું છે. કંપનીએ પોતાના અલગ-અલગ મૉડલની કિંમતમાં 0.1 થી 4.3 ટકા સુધીનો વધારો કર્યો છે.