વિરોધની છાવણી / ભણશે ગુજરાત પણ ભણાવશે કોણ? 2018-19ના TAT પાસ ઉમેદવારોનો ગાંધીનગરમાં મોરચો, રામધૂન ગજવી કરી આ માંગ

• TAT પાસ ઉમેદવારોનો ગાંધીનગરમાં વિરોધ
• 2018-19ના TAT પાસ ઉમેદવારો દ્વારા વિરોધ
• ઉમેદવારોને વધુ એક ભરતીમાં તક આપવા રજૂઆત

ગાંધીનગરમાં ફરી વિરોધ શરૂ થયો છે. ગુજરાતભરમાંથી TAT પાસ ઉમેદવારો ગાંધીનગર ખાતે પહોંચ્યા છે. 2018-19ના TAT પાસ ઉમેદવારો દ્વારા ગાંધીનગર ખાતે વિરોધ કરવામાં આવવી રહ્યો છે, તેઓ પોતાની પડતર માંગણીઓને લઈને વિરોધ કરી રહ્યા છે.

2018-19ના TAT પાસ ઉમેદવારોનો વિરોધ
ગાંધીનગર સત્યાગ્રહ છાવણી પાસે 2018-19ના TAT પાસ ઉમેદવારો દ્વારા વિરોધ કરવામાં આવી રહ્યો છે. TAT પાસ ઉમેદવારોને વેલેડિટી પ્રમાણે બાકી રહેલું એક વર્ષ આપવા રજૂઆત કરી છે. ઉમેદવારોને વધુ એક ભરતીમાં તક આપવાની રજૂઆત કરવામાં આવી છે. રાજ્યભરમાંથી 2018-19ના TAT પાસ ઉમેદવારો ગાંધીનગર પહોંચ્યા છે અને સત્યાગ્રહ છાવણી ખાતે વિરોધ કરી રહ્યા છે. આજે ઉમેદવારો દ્વારા રામ ધૂન બોલાવીને દેખાવો કરવામાં આવ્યા હતા.  

અનેક વખત કરી ચૂક્યા છીએ રજૂઆતઃ ઉમેદવાર
આ તકે વિવેકભાઈ બાવળિયા નામ ઉમેદવારે જણાવ્યું કે, અમે અનેક વખત રજૂઆત કરી ચૂક્યા છીએ કે એકવાર અમારી TAT પાસની ધોરણ 9થી 12 સુધીની ભરતી બહાર પાડો અને અમને એકવાર ચાન્સ આપો. અમે છેલ્લા દોઢ વર્ષથી ભરતીની રજૂઆત કરી રહ્યા છીએ. જીતુભાઈ વાઘાણી જ્યારે શિક્ષણ મંત્રી હતા, ત્યારે અમે ઘણીવાર રજૂઆત કરી હતી કે ધોરણ 9થી 12ની ભરતી બહાર પાડો. જે બાદ જીતુ વાઘાણીએ અમને આશ્વાસન આપ્યું હતું કે જૂન મહિનામાં તમારી ભરતી અમે બહાર પાડશું. 

સરકાર અમને વારંવાર આશ્વાસન જ આપે છેઃ ઉમેદવાર
તેમણે જણાવ્યું કે, વર્તમાન શિક્ષણ મંત્રી કુબેરભાઈને પણ અમે 50 કરતા વધુ વખત રજૂઆત કરી ચૂક્યા છીએ. દર વખતે અમને આશ્વાસન આપવામાં આવે છે કે તમારી ભરતી માટે વિચારીશું. દરેક ઉમેદવાર દિવસ-રાત મહેનત કરીને પરીક્ષા પાસ કરે છે. આટલી તૈયારી કર્યા પછી ટાટ પરીક્ષામાં પાસ થવાય છે. 

' અમારે અમારા હક માટે આવું કરવું પડી રહ્યું છે'
અમે પરીક્ષામાં પાસ થઈને બેઠા છીએ. અમે સરકારને વિનંતી કરીએ છીએ કે અમને એક ચાન્સ આપો. અહીંયા બેઠેલા બધા શિક્ષક દરજ્જના વ્યક્તિઓ છે. તેમણે આંદોલન કરવાની અને સત્યાગ્રહ છાવણી ખાતે આવવાની જરૂર નથી. એને બાળકને ભણાવવાનું છે. છતાં પણ અમારે અમારા હક માટે આવું કરવું પડી રહ્યું છે.