તામિલનાડુમાં નોકિયાના મેન્યુફેક્ચરિંગ પ્લાન્ટના 42 કર્મચારીઓ કોરોના પોઝિટિવ હોવાનું જાણવા મળ્યું છે. આ કારણે કંપનીના પ્લાન્ટને બંધ કરી દેવાય છે.
નોકિયાના મેન્યુફેક્ચરિંગ પ્લાન્ટમાં આવ્યા કોરોના કેસીસ
તામિલનાડુના શ્રીપેરંબુદૂરમાં છે નોકિયાનો મેન્યુફેક્ચરિંગ પ્લાન્ટ
છેલ્લા દાયકાના સૌથી લોકપ્રિય ફોન ઉત્પાદક નોકિયાના તામિલનાડુ સ્થિત મેન્યુફેક્ચરિંગ પ્લાન્ટમાં 42 કર્મચારીઓ કોરોના પોઝિટિવ હોવાનું જાણવા મળ્યું છે. આને કારણે કંપનીએ પ્લાન્ટ બંધ કરવાનો નિર્ણય લેવો પડ્યો છે.
નોકિયા દ્વારા જારી કરાયેલા એક નિવેદનમાં કહેવામાં આવ્યું છે કે કંપનીએ ગયા અઠવાડિયે તામિલનાડુના શ્રીપેરંબુદુરના પ્લાન્ટ બંધ કરી દીધો હતો. કંપનીના કેટલાક કર્મચારીઓ કોરોના પોઝિટિવ હોવાનું જાણવા મળ્યું છે ત્યારે નોકિયાએ તેની સત્તાવાર માહિતી આપી છે. જો કે, કંપનીએ હજી સુધી ખુલાસો કર્યો નથી કે કેટલા કર્મચારીઓ કોરોના પોઝિટિવ છે. પરંતુ સમાચાર એજન્સી રોઇટર્સના અહેવાલમાં દાવો કરવામાં આવ્યો છે કે પોઝિટિવ કેસની સંખ્યા 42 છે.
લોકડાઉનમાં અપાઈ છે છૂટ
નોંધનીય છે કે 25 માર્ચથી ભારતમાં લોકડાઉન અમલમાં છે, પરંતુ છેલ્લા થોડા દિવસોથી તેમાં થોડી છૂટછાટ આપવામાં આવી છે. આ છૂટછાટમાં કંપનીઓને શરતો સાથે ખોલવાની મંજૂરી આપવામાં આવી હતી. આ જ કારણ છે કે નોકિયાએ પણ તેના તામિલનાડુ પ્લાન્ટમાં ફરીથી કામગીરી શરૂ કરી હતી. જો કે, કંપનીનું કહેવું છે કે અમે તમામ શરતોનું પાલન કર્યું છે.
નોકિયા દ્વારા કહેવામાં આવ્યું હતું કે અમે સોશ્યલ ડિસ્ટન્સિંગ જાળવવા માટે ઘણાં પગલાં અને ફેરફારો લાગુ કર્યા છે. તે જ સમયે, પ્લાન્ટમાં ઉપલબ્ધ કેન્ટિનની સેવા પણ બદલાઈ ગઈ હતી. કંપની આશા રાખે છે કે ટૂંક સમયમાં પ્લાન્ટમાં ફરી એકવાર કામગીરી શરૂ કરવામાં આવશે.
Oppoમાં પણ પોઝિટિવ કેસ મળી આવ્યા હતા
થોડા દિવસો પહેલા ઉત્તર પ્રદેશના ગ્રેટર નોઈડા સ્થિત ઓપ્પો મોબાઈલ ફોન કંપનીની ફેક્ટરીમાં 9 કર્મચારીઓ કોરોના પોઝિટિવ હોવાનું માલુમ પડ્યું હતું. આ પછી, આગામી આદેશ ન આવે ત્યાં સુધી ઓપ્પોએ આ ફેક્ટરી બંધ કરી દીધી હતી. જો કે આ કેસ બહાર આવ્યા પછી ઓપ્પોએ તેના તમામ કર્મચારીઓના કોરોના પરીક્ષણો શરૂ કર્યા હતા. નોંધનીય છે કે લોકડાઉન પછી, કંપનીનું કાર્ય 8 મેના રોજ ફરી શરૂ કરાયું હતું.