ટોક ઓફ ધ ટાઉન: સરપંચે બાવળ ટ્રેક્ટર શૌચાલયમાં આચર્યા કૌભાંડ

મહેસાણાઃ "વાડ જ ચીભડાં ગળે" એવુ જ કંઇક મહેસાણાના ગોઝારીયા ગ્રામપંચાયતમાં થયું છે. જયાં ગોઝારીયાના સરપંચે પોતાના હોદ્દાનો દુરુપયોગ કરી પંચાયતમાં અનેક કૌભાંડ આચર્યા છે. 

શું છે સમગ્ર મામલો
મહેસાણાના ગોઝારીયામાં વર્ષોથી રાજકારણ ગરમાયેલું જોવા મળે છે. ત્યારે હાલમાં સરપંચ રમેશ પટેલના કૌભાંડનો મુદ્દો ટોક ઓફ ધ ટાઉન બન્યો છે. સરપંચે પોતાના હોદ્દાનો દુરૂપયોગ કરી પંચાયતને લાખોનું નુકશાન પહોંચાડ્યું હોવાની ફરિયાદ કરાઈ છે. સરપંચે પોતાના આર્થિક ફાયદા સારૂ થઇ પંચાયતને પારાવાર નુકશાન પહોચાડ્યું છે. ગામના પૂર્વ સરપંચ રમેશ પટેલ ઉર્ફે ડોન અને શોભનાબેન શાહે સરપંચ સામે કૌભાંડ આચર્યું હોવાના આક્ષેપો કર્યા છે.


ગોઝારીયાના સરપંચ રમેશ પટેલે આચરેલા અનેક કૌભાંડની વાત કરીએ તો પહેલા 300 વીઘામાં 95 નંગ બાવળ કાપી બારોબાર વેચી માર્યા છે. 2017ની ચૂંટણીમાં પંચાયતના પૈસાથી ટ્રેક્ટર ખરીદ્યું હતું. ટ્રેકટર ખરીદી કોંગ્રેસ ઉમેદવાર જીવા પટેલને ભેટમાં આપ્યું હતું. 


તો વળી પંચાયત હસ્તકનો RO પ્લાન્ટ મળતિયાને મફતમાં આપી દીધો હતો. શૌચાલય યોજનામાં ગેરકાયદે લાભ લીધો હતો. BPL કાર્ડનો ઉપયોગ પુત્રવધુની પ્રસુતિ માટે કર્યો હોવાના ગંભીર આક્ષેપ થયા છે. BPL યાદીમાં સરપંચનું નામ વર્ષ 2011ના સર્વેમાં બહાર આવ્યું હતું. જ્યારે બીજી તરફ સરપંચ રમેશ પટેલે આ તમામ બાબત ખોટી હોવાનું કહ્યું હતું.


ગોઝારીયા ગ્રામ પંચાયતના સરપંચ સામે થયેલા કૌભાંડના આક્ષેપો કેટલા સાચા અને કેટલા ખોટા એતો પૂર્ણ તપાસનો વિષય છે. પરંતુ વિરોધીઓ દ્વારા પ્રસ્તુત કરાયેલા પુરાવાઓ સરપંચ કૌભાંડી હોવાનો દર્શાવી રહ્યા છે. હવે જોવાનું રહ્યું કે સરપંચ વિરુદ્ધ કરાયેલા આક્ષેપો અને ફરિયાદો કેટલા સાચા સાબિત થાય છે.