અફઘાનિસ્તાનમાં નવી તાલિબાન સરકારે શપથ ગ્રહણ સમારોહ માંડી વાળવાનો નિર્ણય લીધો છે.
તાલિબાન સરકારે શપથ ગ્રહણ સમારોહ માંડી વાળ્યો
શપથગ્રહણ સમારોહનું આયોજન પૈસાનો વેડફાટ-તાલિબાન
11 સપ્ટેમ્બરે શપથગ્રહણ સમારોહ રાખ્યો હોવાનું જણાવાયું હતું
તાલિબાને જણાવ્યું કે શપથગ્રહણ સમારોહનું આયોજન કરવું પૈસાનો વેડફાટ છે.
તાલિબાને 11 સપ્ટેમ્બરે શપથગ્રહણ સમારોહ રાખ્યો હોવાનું મીડિયા રિપોર્ટમાં જણાવાયું હતું. આ જ દિવસે અમેરિકામાં 20 વર્ષ પહેલા 9-11 નો આતંકી હુમલો કર્યો હતો જેની આજે વરસી મનાવાઈ રહી છે જેને તાલિબાને બીજા કોઈ દિવસે ટાળી દીધી હતી. તાલિબાને અમેરિકાના ઘા પર મીઠું ભભરાવવા માટે આવું કર્યું હોવાનું કહેવાયું હતું.
પરંતુ હવે તાલિબાન સરકારે શપથગ્રહણ સમારોહ જ રદ કરી નાખ્યો છે તેથી તાલિબાનના આ પગલાં અંગે અટકળબાજીનો દોર શરુ થયો છે. અફઘાનિસ્તાનની તાલિબાન સરકારમાં સિરાજુદ્દીન હક્કાનીને મંત્રી બનાવાતા અમેરિકા ભડક્યું છે. અમેરિકાએ સિરાજુદ્દીન હક્કાનીને આતંકી જાહેર કરેલો છે.
આતંકીને મંત્રી કેવી રીતે બનાવી શકાય, અમેરિકાએ તાલિબાનને જણાવ્યું
આતંકીને સરકારમાં મંત્રી બનાવાતા અમેરિકાએ જણાવ્યું કે તાલિબાન નહોતું કરવું જોઈએ. ખરાબ ટ્રેક રિકોર્ડ ધરાવનારને સરકારમાં સ્થાન ન આપી શકાય. અમેરિકાની ચેતવણી બાદ તાલિબાન પણ ભડકી ઉઠ્યું છે. તાલિબાન દ્વારા જારી નિવેદનમાં કહેવાયું કે આ પ્રકારનું નિવેદન અથવા બેન સહન નહીં કરવામાં આવે.
અમેરિકા અમારી સરકારની વિરૃદ્ધ કોઈ નિવેદન ન આપે-તાલિબાન
તાલિબાને કહ્યું કે હક્કાની સાહેબનો પરિવાર પણ ઈસ્લામિક અમીરાત સરકારનો હિસ્સો છે તેઓ અલગ નથી. તેથી દોહા એગ્રિમેન્ટ પ્રમાણે અમીરાતના તમામ સભ્યોને સંયુક્ત રાષ્ટ્ર અને અમેરિકાના બ્લેકલિસ્ટમાંથી હટાવી નાખવા જોઈએ. તાલિબાને અમેરિકાને સ્પસ્ટ સંભળાવી દીધું કે અમારી સરકારની સામે જે પણ નિવેદનો આપવામાં આવી રહ્યાં છે તે સહન કરવા લાયક નથી. આ પ્રકારના નિવેદનો ન આપવા જોઈએ. અમેરિકાએ તેની નીતિમાં ફેરફાર કરવો જોઈએ.
સિરાજુદ્દીન હક્કાનીના માથા પર 10 મિલિયન ડોલરનું ઈનામ
ઉલ્લેખનીય છે કે અફઘાનિસ્તાનની તાલિબાન સરકારમાં એવા ઘણા નેતાઓ છે જેમના નામ સંયુક્ત રાષ્ટ્રના ગ્લોબલ આતંકીઓની યાદીમાં સામેલ છે અથવા તો અમેરિકાએ તેમના માથા પર ઈનામ જાહેર કરી રેખેલું છે. સિરાજુદ્દીન હક્કાનીને તાલિબાન સરકારમાં ગૃહમંત્રી બનાવાયા છે. અમેરિકાએ હક્કાનીના માથા પર 10 મિલિયન ડોલરનું ઈનામ રાખ્યું છે. સિરાજુદ્દીન આતંકી સંગઠન હક્કાની ગ્રુપનો વડો છે.