દમણ / બાળકને થાંભલા સાથે બાંધીને ઢોર માર મારનારા 3 આરોપી ઝડપાયા, આ શંકાને લઇ આપી હતી તાલિબાની સજા

• સંઘ પ્રદેશ દમણની ઘટનાથી ચકચાર 
• સગીરને નિર્વસ્ત્ર કરી બાંધીને માર માર્યો 
• વિડીયો વાયરલ,પોલીસે કરી ત્રણની ધરપકડ 

વલસાડ જિલ્લાની નજીકના  સંઘપ્રદેશ દમણના બામણપૂજા વિસ્તારમાં એક સગીર સાથે કેટલાક લોકોએ જાહેરમાં કરેલા અમાનુષ અત્યાચારનો વીડિયો વાઈરલ થતાં ચકચાર મચીગઈ હતી.  સગીર કિશોર પર ચોરીનો આરોપ મૂકી કેટલાક લોકોએ તેને નિર્વસ્ત્ર કર્યા બાદ જાહેરમાં ફટકાર્યો હતો. આળ ચઢાવાયેલા બાળકને પોલીસને સોંપવાને બદલે લોકોએ જાતે જ ન્યાય તોળી આપતા ચકચાર મચી ગઈ હતી. મોટી દમણ પોલીસે વીડીયોના આધારે 3 શખ્સોની ઓળખ કરી તેની પ્રાથમિક પૂછપરછ કર્યા બાદ ધરપકડ કરવામાં આવી છે.

અમાનુષ અત્યાચાર 

વીડિયો જે સોશિયલ મીડિયામાં  વાઈરલ થઈ રહ્યો છે તેમાં  કેટલાક લોકો પીડિત કિશોર પર ચોરીનો આરોપ મૂકી રહ્યા છે. ચોરી અંગે ક્ષુલ્લક પૂછ પરછ બાદ  લોકોએ પૂરી હકીકત જાણ્યા વગર જાતે જ ન્યાય કર્યો હતો, એ પણ તાલીબાન જેવો.  કિશોર રડતો રડતો છોડી દેવાની આજીજી  કરતો રહ્યો, પણ ઉપસ્થિત લોકોમાંથી એકપણ વ્યકિતબાળકને બચાવવા આગળ ના આવ્યો. બાળકને  એક બોર્ડની એંગલ સાથે બાંધી દીધો. ત્યાર બાદ પીડિતને જમીન પર પછાડી તેના પગ પર એક વ્યકિત ઊભો રહી માર મારતો જોવા મળી રહ્યો છે.

ત્રણ ઝડપાયા,સગીરની શોધ 

સગીર સાથે અમાનુષ અત્યાચાર આચરનારા  તત્વોમાંથી ત્રણ શખ્સોની અટકાયત કરાઈ છે. પોલીસે નાનુભાઈ પટેલ, દિલીપ પટેલ અને નરેશ પટેલની ધરપકડ કરી છે. આ કેસમાં  પોલીસ દ્વારા પીડિત સગીરની પણ શોધખોળ શરૂ કરાઈ છે