ઈન્ટરનેશનલ / અમેરિકી સૈનિકો હજુ તો પરત ફર્યા જ છે ને ત્યાં અફઘાની સૈનિકોની હાલત તો જુઓ કેવી થઈ

• અફઘાનિસ્તાનમાંથી અમેરિકી અને નાટોના સૈનિકોની વિદાય થઈ
• તાલિબાનોએ મોટાભાગના જિલ્લા પર કબજો જમાવ્યો
• ડરના માર્યા અફઘાન સેનાના જવાનો ભાગીને તજાકિસ્તાન જતા રહ્યાં 

તજાકિસ્તાનની સ્ટેટ કમિટી ફોર નેશનલ સિક્યુરીટીએ જારી કરેલા નિવેદનમાં જણાવાયું કે તાલિબાની લડાકૂઓએ ઉત્તર અફઘાનના ઘણા જિલ્લા પર કબજો જમાવી દીધો છે. અફઘાનિસ્તાનના બદખ્શાં પ્રાંતમાંથી 300 કરતા પણ વધારે અફઘાની સૈનિકો ભાગીને તજાકિસ્તાન જતા રાહ્યાં છે. 

તજાકિસ્તાનના અધિકારીઓએ જણાવ્યું કે માનવતા અને સારા પડોશીનો ધર્મના નાતે અમે અફઘાની રાષ્ટ્રીય સુરક્ષાદળોના જવાનોને દેશમાં આવવા દીધા છે. 

અમેરિકા અને નાટો દેશોએ અફઘાનિસ્તાનમાંથી સૈનિકો ખસેડવાનું શરુ કર્યું 

અમેરિકા અને નાટો દેશોએ અફઘાનિસ્તાનમાંથી સૈનિકો ખસેડવાનું શરુ કરી દીધું છે. શનિવારે અમેરિકી સેનાની એક છેલ્લી ટૂકડી પણ રવાના થઈ હતી. પરંતુ જેવા અમેરિકી સૈનિકો રવાના થયા કે તરત જ જાણે રાહ જોઈને બેસી રહ્યાં હોય તેમ સ્થાનિક લોકો ઘુસી આવ્યાં અને એરપોર્ટની મોટી મોટી અનેક બિલ્ડિંગોમાંથી જે કંઈ હાથમાં લાગ્યું કે લઈને રવાના થવા લાગ્યાં. લોકો પ્લાસ્ટિક અને મેટલની ચીજો પણ લઈ ગયા હતા અને ઘણા કલાકો સુધી લોકોએ લૂંટ ચલાવી હતી. જોકે અંતે અફઘાન નેશનલ સિક્યુરીટી અને ડિફેન્સ ફોર્સિસે લૂંટફાટ કરનાર લોકોને ખદેડી મૂક્યા હતા અને એરપોર્ટનો કબજો સંભાળી લીધો હતો.

અમેરિકી પ્રમુખ જો બાઈડને સૈનિકો ખસેડવાની જાહેરાત કરી ચૂક્યા છે 

ઉલ્લેખનીય છે કે કાબુલની ઉત્તરે 30 માઈલ દુર આવેલો બગરામ એરબેઝ પર અમેરિકાએ થાણુ સ્થાપી રાખ્યું છે. અમેરિકી પ્રમુખ જો બાઈડને 11 સપ્ટેમ્બર 2021 સુધી અફઘાનિસ્તાનમાંથી તેમના દેશના સૈનિકોને સંપૂર્ણપણે હટાવી લેવાની જાહેરાત કરી છે. જે હેઠળ છેલ્લી એક ટૂકડી શનિવારે બગરામમાંથી સ્વદેશ રવાના થઈ હતી.