ગુજરાતમાં દારુબંધીના ધજાગરા ઉડાડતી એક ઘટના સામે આવી છે. દારુબંધીના લીરેલીરા ઉડાવનાર બીજુ કોઇ નહી પરંતુ સરકારી બાબુઓ જ છે. મહિસાગરના વીરપુરના ડેભારી ગામે સરાકરી ઓફિસમાં દારુની મહેફિલ માણતા અધિકારીઓ ઝડપાયા. આ એજ અધિકારીઓ છે જેઓને પ્રજાના પ્રશ્નોનો ઉકેલ લાવવા , પ્રજાની સમસ્યાનું નિરાકરણ લાવવા માટે ખુરશી પર બેસાડવામાં આવ્યા છે પરંતુ આ અધિકારીઓને પ્રજાના કામમાં નહી પરંતુ દારુ પીવામાં જ આનંદ આવતો હોય તેમ લાગી રહ્યુ છે.
તલાટી દારુ પીતા ઝડપાયા
વીરપુરના ડેભારી ગામના તલાટી રમેશભાઇ પોતે દારુ પીતા ઝડપાયા. દારુની મહેફિલના તમામ દ્રશ્યો મોબાઇલમાં કેદ થયા છે જેમાં સ્પષ્ટ દેખાઇ રહ્યુ છે કે તલાટી ઓફિસમાં આવીને પગ પર પગ ચઢાવીને દારુની મહેફિલ માણી રહ્યા છે. ત્યારે અહીં સવાલ એ થાય કે તમે ઑફિસમાં કામ કરવા આવો છો કે દારુ પીવા, દારુબંધી હોવા છતાં બેફામ બનીને દારુ પીનારા તલાટી થોડી તો શરમ કરો. આ પ્રજાનું કામ, આ સરકારી જગ્યા છે. પોતાના પદની ગરિમા તો જાળવો. આ એ જગ્યા છે જ્યાં સ્થાનિકોની અવર જવર હોય પરંતુ તલાટીને સ્હેજ પણ શેહશરમ નથી.
શરમ તો ઠીક આ દારુ આવ્યો ક્યાંથી ?
સ્થાનિકો રજૂઆત કરીને થાક્યા
તલાટીના આવા વર્તનથી સ્થાનિકો અજાણ નથી. સ્થાનિકો અનેકવાર રજૂઆત કરીને થાક્યા. તલાટી વિશે અનેકવાર ફરિયાદ કરી પરંતુ કોઇ નિરાકરણ આવતુ નથી. છેક DDO સુધી સ્થાનિકોએ રજૂઆત કરી પરંતુ કોઇ ઊંચા કાન કરતુ નથી. ત્યારે અહીં સવાલ એ થાય કે શું DDO તલાટી સાથે મળેલા છે. શા માટે DDO આંખ આડા કાન કરી રહ્યા છે. શું સરકારી ઑફિસોમાં આ રીતે જ કામકાજ ચાલતુ હશે.. પ્રજા પિસાતી રહે અને બાબુઓ મહેફિલ માણતા રહે..?
વીટીવીના સવાલ
ગુજરાતમાં દારુબંધી તો પછી દારુ આવ્યો ક્યાંથી ?
શું સરકારી કચેરીમાં આવી જ રીતે કામ થાય છે ?
તલાટી રમેશ દારુની મહેફિલ માણવા આવે છે ઑફિસ ?
સ્થાનિકોની વાત પણ કોઇ સાંભળતુ નથી, કેમ ?
વીરપુરના ડેભારી ગામમાં દારુના નશામાં જ થાય છે કામકાજ ?