પંચમહાલના પરૂણા ગ્રામપંચાયતના મહિલા તલાટીએ આવાસ યોજનાના નામે લોકો પાસેથી રૂપિયા ઉઘરાવ્યા હતા. જેનો ઓડિયો હાલ સોશિયલ મીડિયામાં ઘણો વાયરલ થયો છે.
પરૂણા ગ્રામ પંચાયતના મહિલા તલાટીનો ઓડિયો વાયરલ
ગ્રામજનો પાસેથી મહિલા તલાટીએ 2 વખત લીધા રૂપિયા
મહિલા તલાટી ગ્રામ પંચાયતમાં નથી આપતા હાજરી
પંચમહાલના પરૂણા ગ્રામપંચાયતના મહિલા તલાટીની ફોન પર વાત કરતી ઓડિયો ક્લીપ વાયરલ થઈ છે. જે હાલમાં ઘણો ચર્ચાનો મુદ્દો બન્યો છે. ઓડિયો ક્લીપમાં એ વાતનો સ્પષ્ટ ઉલ્લેખ છે, કે મહિલા તલાટી દ્વારા આવાસનો લાભ આપવાને બહાને રૂપિયાની લેતી દેતી કરવામાં આવી છે.
સરકાર પાસે ગ્રાન્ટ નથી : તલાટી
ઓડિયો ક્લીપમાં જે વ્યક્તિએ ફોન કર્યો હતો તેણે એવો સવાલ કર્યો હતો કે કામ શરૂ થયું નથી તો તમે રૂપિયા શેના લીધા છે દરેક ઘર પાસેથી, ત્યારે મહિલા તલાટી દ્વારા એવો જવાબ આપવામાં આવ્યો કે હુ મારા પોતાના રૂપિયા થોડીને નાખવાની હતી. સરકાર પાસે હાલ ગ્રાન્ટ નથી. તેવું મહિલા તલાટીએ નિવેદન આપ્યું હતું.
આવાસ દીઠ 3500 રૂપિયા દરેક ઘર પાસેથી લીધા
આ મામલે ગ્રામજનો સાથે વાતચીત કરવામાં આવી ત્યારે તેમણે કહ્યું કે તલાટી આટલા સમયમાં ક્યારેય પણ ગામમાં નથી આવ્યા. ગ્રામજનોએ એવા પણ આક્ષેપ કર્યા છે કે આવાસ દીઠ કુલ 3500 રૂપિયા દરેક ઘર પાસેથી ઉઘરવામાં આવ્યા છે. તેમ છતા ગામમાં હજું પણ કોઈ પણ વ્યક્તિને આવાસનો લાભ નથી મળ્યા.
ગ્રામ પંચાયતમાં તલાટી નથી આપતા હાજરી
ગ્રામજનોનું કહેવુ છે કે આવાસ યોજના માટે પહેલા તલાટી સુનિતાબેન 2 હજાર રૂપિયા લઈ ગયા હતા. તેમ છતા ફરી બીજી વાર પણ તેમણે 2 હજાર રૂપિયા માગ્યા હતા. તેમ છતા તેમને કોઈ પણ પ્રકારનો લાભ નથી મળી રહ્યો, વધુંમાં ગ્રામજનોએ એવું પણ કહ્યું કે તલાટી જ્યારથી આવ્યા છે ત્યારથી તેઓ ગ્રામ પંચાયતમાં હાજરી પણ નથી આપતા.
તલાટી દ્વારા નથી કરવામાં આવતી કોઈ કામગીરી
ઉલ્લેખનીય છે કે ગામમાં લોકોના મકાનની યોગ્ય વ્યવસ્થા નથી. જેથી તેઓ આવાસ યોજનાને લઈને આશા લઈને બેઠા છે કે તેઓને રહેવા માટે ઘર મળશે. પરંતુ ગ્રામપંચાયતના તલાટી દ્વારા કોઈ પણ કામગીરી આગળ વધારવામાં નથી આવી રહી. સાથેજ તેમણે ગ્રામજનો પાસેથી રૂપિયા પણ ઉઘરાવ્યા હોવાનું સામે આવ્યું છે.,