અમેરિકાના રાષ્ટ્રપતિ ડોનાલ્ડ ટ્રમ્પ તેમના પરિવાર સાથે ભારત યાત્રાએ આવ્યા છે ત્યારે આજરોજ તેમણે અમદાવાદ અને આગ્રાની મુલાકાત લીધી હતી. જેમાં તેમણે અમદાવાદ ખાતે નમસ્તે ટ્રમ્પ કાર્યક્રમને સંબોધન કર્યું હતું તો ત્યારબાદ પ્રેમનું પ્રતિક ગણાતા આગ્રા ખાતે આવેલા તાજમહલના દીદાર પણ કર્યા હતા. નોંધનીય છે કે, ટ્રમ્પની આ મુલાકાતને પગલે 300 વર્ષથી બંધ રહેલ શાહજહાં અને મુમતાજની કબરનું મડપેક થેરાપીથી સાફ સફાઇ કરવામાં આવી હતી.
ટ્રમ્પ આવ્યા ભારતની મુલાકાતે
તાજમહલમાં રહેલી કબરની કરવામાં આવી સાફ-સફાઇ
300 વર્ષના ઇતિહાસમાં પ્રથમ વખત બની ઘટના
ટ્રમ્પ અને તેમની પત્નીની આગ્રા મુલાકાત પહેલા ભારતના પુરાતત્વીય વિભાગ (ASI) 300 વર્ષ પહેલાં તાજમહલમાં બનાવેલી જૂની કબરોને ધોવાનું કામ હાથ ધર્યું હતું. આ કબરો પર મુલ્તાની માટીથી બનેલા વિશેષ પેકનો નવો પડ લગાવવામાં આવ્યો છે અને ડિસ્ટીલ વોટરથી ધોવામાં આવેલ.
300 વર્ષ બાદ પ્રથમ વખત કબરની કરાઇ સાફ-સફાઇ
તાજમહલના નિર્માણના 300 વર્ષ પછી આ પહેલી ઘટના છે, જ્યારે એએસઆઈએ કબરો પર મુલ્તાની માટી લગાવીને મડપેક ટ્રીટમેન્ટથી સફાઇ શરૂ કરી છે. સોમવારે એએસઆઈ સુપરિટેન્ડિંગ પુરાતત્ત્વીય રસાયણવિદ ડો.એમ.કે.ભટનાગર દ્વારા બંને કબરો પર મડપેકનું કામ શરૂ કરાયું હતું. આ સાથે કબર ઉપર લાગેલ ફર્નિચરને ઉતારીને કેમિકલ ટ્રીટમેન્ટથી ચમકાવવામાં આવી હતી. આ ફર્નિચર લોડ કર્ઝન દ્વારા 1908 માં ભેટ કરવામાં આવ્યું હતું. ઇજિપ્તના કાઇરોની મસ્જિદ જોઈને લેમ્પની રચના કરીને ભેટ કરવામાં આવી હતી.
મુખ્ય દરવાજાની પણ કરાઇ રાસાયણિક ટ્રીટમેન્ટ
અમેરિકન રાષ્ટ્રપતિ ડોનાલ્ડ ટ્રમ્પની મુલાકાત માટે રોયલ ગેટનું રેડ સેન્ડ સ્ટોન પ્લેટફોર્મ અને રોયલ ગેટની અંદરના પથ્થરો પણ સાફ કરવામાં આવ્યા હતા. રોયલ ગેટથી આરસના ગુંબજ સુધી ફુવારાઓની બંને બાજુ પાથવે પત્થરોને રાસાયણિક ટ્રીટમેન્ટ દ્વારા ચમકાવવામાં આવ્યા હતા.
અમદાવાદમાં 22 કિમી. લાંબો રોડ શો યોજાયો હતો
ડોનાલ્ડ ટ્રમ્પના એરપોર્ટ પર ગ્રાન્ડ વેલકમ બાદ ભવ્ય રોડ શો યોજાયો હતો. જેની એક ઝલક જોવા માટે લાખોની સંખ્યામાં ગુજરાતીઓ ઉમટયાં હતા. ટ્રમ્પ-PM મોદીનો મેગા રોડ શો 22 કિમી સુધી લાંબો હતો.
અમેરિકન રાષ્ટ્રપતિ ડોનાલ્ડ ટ્રમ્પે સાબરમતી આશ્રમની લીધી હતી મુલાકાત
અમેરિકન રાષ્ટ્રપતિ ડોનાલ્ડ ટ્રમ્પના સ્વાગતમાં સાબરમતી આશ્રમને સજાવવામાં આવ્યો છે. ત્યારે પીએમ મોદી, અમેરિકન રાષ્ટ્રપતિ ડોનાલ્ડ ટ્રમ્પ, મેલેનિયા ટ્રમ્પે સાબરમતી આશ્રમની મુલાકાત લીધી હતી. અહીં તેમણે પરંપરા અનુસાર પોતાના બુટ ઉતારીને આશ્રમમાં પ્રવેશ કર્યો હતો.
અમેરિકાના રાષ્ટ્રપતિ ડોનાલ્ડ ટ્રમ્પનું ગાંધી આશ્રમમાં ખેસ પહેરાવીને સ્વાગત કરવામાં આવ્યું હતું. મોદી હ્રદય કુંજમાં ટ્રમ્પના ગાઇડ બન્યા. પીએમ મોદી અને ટ્રમ્પે ગાંધીજીની તસ્વીરને સૂતરની આંટી પહેરાવી વંદન કર્યા. ત્યાર બાદ ગાંધીજીના ચરખાને પણ કાત્યો હતો. આ પ્રસંગે મેલેનિયા ટ્રમ્પે પણ ચરખો કેવી રીતે ચાલે છે તે નિહાળ્યું હતું. તો સમગ્ર મુલાકાતમાં વડાપ્રધાન મોદી તેમના ગાઈડ બન્યા હતા. ગાંધી આશ્રમની વિઝીટર બૂકમાં ટ્રમ્પે ખાસ મેસેજ પણ લખ્યો હતો. ટ્રમ્પે લખ્યું કે મારા મિત્ર નરેન્દ્ર મોદીનો અદભુત મુલાકાત બદલ આભાર.