- ટેબલ ટેનિસ સ્ટાર હરમીત દેસાઈ રમશે વર્લ્ડ ચેમ્પિયનશિપમાં
- દોહામાં રમાયેલી એશિયન ટેબલ ટેનિસ સિલેક્શન મેચમાં જીત્યો હરમીત
- મે મહિનામાં વર્લ્ડ ચેમ્પિયનશિપમાં રમવા જશે સાઉથ આફ્રિકા
સુરતનું ગૌરવ અને ટેબલ ટેનિસ સ્ટાર હરમીત દેસાઈની સિદ્ધિઓની યાદીમાં વધુ એક સફળતાનો ઉમેરો થયો છે. સાઉથ આફ્રિકામાં મે મહિનામાં યોજાનારી ટેબલ ટેનિસની વર્લ્ડ ચેમ્પિયનશિપ માટે તેની પસંદગી થઈ છે. આ માટે હરમીતે કતારના દોહામાં રમાયેલી એશિયન ટેબલ ટેનિસ સિલેક્શન મેચ જીતીને પોતાની દાવેદારી પાક્કી કરી લીધી છે.
હરમીતનું સિલેક્શન થતાં પરિવારમાં ખુશીનો માહોલ
સાઉથ આફ્રિકા ખાતે મે મહિનામાં યોજાનાર ટેબલ ટેનિસ વર્લ્ડ ચેમ્પિયનશિપ માટે એશિયન ખેલાડીની સિલેક્શન પ્રક્રિયા ચાલી રહી હતી. કતારના દોહા ખાતે એશિયન ટેબલ ટેનિસ સિલેક્શન મેચ રમાઈ રહી હતી. જેમાં સુરતના હરમીત દેસાઈએ જીત હાંસલ કરી છે. હરમીત દેસાઈ હવે વર્લ્ડ ચેમ્પિયનશિપ સુધીની સફર નક્કી કરી ચૂક્યો છે. હરમીત દેસાઈ વર્લ્ડ ચેમ્પિયનશિપમાં રમવા જનાર ગુજરાતનો પ્રથમ ખેલાડી બનશે. હરમીતનું સિલેક્શન થતાં પરિવારમાં ખૂબ જ ખુશી અને આનંદ છવાઈ ગયો છે.
ખૂબ જ ગર્વ અને આનંદ થઈ રહ્યો છેઃ અર્ચનાબેન
હરમીતની માતા અર્ચનાબેન દેસાઈએ જણાવ્યું કે, વર્લ્ડ ચેમ્પિયનશિપમાં હરમીતનું સિલેક્શન થતા ખૂબ જ ગર્વ અને આનંદ થઈ રહ્યો છે. હરમીતનું સિલેક્ટ થવું અને ત્યારબાદ સાઉથ આફ્રિકાના ડરબન રમવા જવું એ ખૂબ જ મોટી વાત છે.
અગ્રણી દેશોમાંથી પસંદગી
એશિયામાંથી વર્લ્ડ ચેમ્પિયનશિપ માટે ક્વોલિફાય થવું એ મોટી વાત છે. નોંધનીય છે કે ટેબલ ટેનિસની દુનિયામાં આમ પણ એશિયન દેશોનો પરંપરાગત દબદબો રહ્યો છે. ચીન, હોંગકોંગ, મલેશિયા, જાપાન, કોરિયા, સિંગાપોરના દિગ્ગજ ખેલાડીઓને ટક્કર આપીને ક્વોલિફાય થવું એ મોટી ઉપલબ્ધિ છે.
કોણ છે હરમીત દેસાઈ?
- હરમીત મૂળ ગુજરાતના સુરતનો વતની છે.
- B.COM અને M.B.A(H.R)નો અભ્યાસ કર્યો છે.
- હરમીતના પિતા રાજૂલ દેસાઈ પણ સ્પોર્ટ્સમાં રસ ધરાવે છે.
- પિતા રાજૂલ દેસાઈ ગુજરાત લેવલે ટેબલ ટેનિસ રમી ચૂક્યા છે.
- 6 વર્ષની ઉમરથી હરમીત ટેબલ ટેનિસ રમે છે.
- 8 વર્ષની ઉમરમાં અંડર-10નું સ્ટેટ લેવલનું ટાઈટલ મેળવ્યું.
- 14 વર્ષ સુધી પિતા જ હરમીતના કોચ હતા.
- 15 વર્ષની ઉમરમાં સ્વીડનમાંથી આંતરરાષ્ટ્રીય તાલીમ લીધી.
- હરમીતે અનેક વખત રાષ્ટ્રીય, આંતરરાષ્ટ્રીય, એશિયન ટેબલ ટેનિસ સ્પર્ધામાં ગોલ્ડ મેડલ હાંસિલ કરીને ગુજરાત અને દેશનું નામ રોશન કર્યું છે.
- રોજ ફિટનેસ પર ત્રણથી ચાર કલાક કામ કરે છે.
- ખેલજગતમાં રફાલ નડાલ હરમીતનો આદર્શ છે.
- બોલિવૂડમાં શાહરુખ ખાન અને રાજકારણમાં નરેન્દ્ર મોદી પસંદ છે.
