ટેલિવિઝન જગતની સૌથી પોપ્યુલર કોમેડી સીરિયલ તારક મહેતા કા ઉલ્ટા ચશ્માનો ચાહક વર્ગ દરેક ઉંમરનો છે. છેલ્લા 12 વર્ષથી આ શો લોકોને ખડખડાટ હંસાવી રહ્યો છે. ગોકુલધામ સોસાયટીમાં દરેક ફેસ્ટિવર ધામધૂમથી ઉજવાય છે. એવી જ રીતે હવે વેલેન્ટાઈન ડેના અવસરે ટપૂ સેનાનો લીડર એટલે કે ટપૂએ સોસાયટીમાં એક પાર્ટીનું આયોજન કર્યું છે, પરંતુ ખાસ વાત એ છે કે, આ પાર્ટીમાં શું થશે એ વાત ટપૂએ ટપૂ સેના અને બેસ્ટ ફ્રેન્ડ સોનૂથી પણ છુપાવી રાખી છે.
ટેલિવિઝન જગતના સૌથી પોપ્યુલર શોમાં વેલેન્ટાઈન ડેની ઉજવણી
હકીકતમાં ટપૂએ વેલેન્ટાઈન ડેની પાર્ટીમાં સોનૂ માટે એક ખાસ સરપ્રાઈઝ પ્લાન કર્યો છે. ટપૂ જ્યારે ગોલી અને પિંકૂથી સોનૂને સરપ્રાઈઝ આપવાની વાત કરે છે ત્યારે ભિડે ઝાડની પાછળ સંતાઈને સાંભળી લે છે અને ટેન્શનમાં આવી જાય છે. જ્યારે ભિડેથી રહેવાતું નથી ત્યારે ભિડે જેઠાલાલને મળીને ટપૂની પાર્ટી કેન્સલ કરવાનું કહે છે. પણ જ્યારે જેઠાલાલ અને મહેતા સાહબ તેને પાર્ટી કેન્સલ કરવાનું કારણ પૂછે છે તો તે સોનૂનું નામ લીધા વિના ત્યાંથી કંઈપણ કહ્યા વગર જતો રહે છે.
બીજી બાજુ ભિડે પાર્ટી પહેલાં સોનૂને ગોકુલધામથી બહાર લઈ જવાનો પ્લાન બનાવી લે છે. સોનૂને ભિડે સાથે બહાર જતા જોઈ ટપૂ તેને રોકવાનો પ્રયાસ કરે છે. તો શું ટપૂ સોનૂને બહાર જતાં રોકી શકશે કે નહીં એ જોવાનું રહ્યું.
જોકે, તારક મહેતામાં અવાર-નવાર ટ્વિસ્ટ એન્ડ ટર્ન ચાલતા રહે છે. હવે આગામી એપિસોડમાં એ જોવાની મજા પડી જશે કે ટપૂ વેલેન્ટાઈનની પાર્ટી પહેલાં સોનૂને જવા દેશે કે નહીં. જે પણ હોય, શોમાં કંઈપણ સીધું અને સરળતાથી થતું નથી, જેથી સોનૂ, ટપૂ અને ભિડે વચ્ચે જે કંઈ પણ થશે, તમારા માટે તો ભરપૂર મનોરંજન જ હશે અને દર્શકો ખૂબ એન્જોય કરશે.