ક્રિકેટ / 'સૂર્ય કુમારના કેચે નહીં..' વર્લ્ડ કપની જીત પર રોહિત શર્માનો ચોંકાવનારો ખુલાસો

ભારતીય ક્રિકેટ ટીમે 29 જૂન 2024ના રોજ દક્ષિણ આફ્રિકાને હરાવીને 17 વર્ષ બાદ T20 વર્લ્ડ કપનો ખિતાબ જીત્યો હતો. ભારતીય ટીમની જીત બાદ વિરાટ કોહલી અને અક્ષર પટેલની ઇનિંગ્સ, બુમરાહ, હાર્દિકની બોલિંગ અને સૂર્યકુમાર યાદવના કેચના ખૂબ વખાણ થયા હતા પણ પંત ​​વિશે કોઈ ચર્ચા થઈ ન હતી. હવે આ ઘટનાના લગભગ 3 મહિના બાદ કેપ્ટન રોહિત શર્માએ આ વિકેટકીપર બેટ્સમેનને લઈને મોટું નિવેદન આપ્યું છે.

ટીમ ઈન્ડિયાના કેપ્ટન રોહિત શર્માએ T20 વર્લ્ડ કપ જીત્યા બાદ T20 ઈન્ટરનેશનલમાંથી નિવૃત્તિ લઈ લીધી છે. હાલમાં એક વાતચીત દરમિયાન રોહિત શર્માએ જણાવ્યું કે એમને વર્લ્ડ કપ ફાઈનલની હારેલી મેચ કેવી રીતે જીતી હતી. એ સમયે મેચ એવા તબક્કે પહોંચી ગઈ હતી જ્યારે એવું લાગી રહ્યું હતું કે કદાચ ટીમ ઈન્ડિયા હારી જશે પરંતુ રોહિત શર્માના મતે ઋષભ પંતની રણનીતિને કારણે એ મેચ જીતી હતી.

એ સમયે એવી પરિસ્થિતિ હતી કે દક્ષિણ આફ્રિકાને છેલ્લી પાંચ ઓવરમાં 30 રનની જરૂર હતી અને વિકેટ પણ હાથમાં હતી. હેનરિક ક્લાસેન જેવો મજબૂત બેટ્સમેન ક્રિઝ પર હતો અને તે સમયે ટીમ ઈન્ડિયા ચિંતિત હતી. આ વિશે રોહિત શર્માએ કહ્યું કે, 'એ સમયે પંતની રણનીતિ કામ કરી ગઈ.'

રોહિત શર્માએ કહ્યું, 'જ્યારે દક્ષિણ આફ્રિકાને 24 બોલમાં 26 રનની જરૂર હતી, ત્યારે એક નાનો બ્રેક હતો. પંતે રમતને રોકવા માટે થોડી રણનીતિ અપનાવી અને તેના ઘૂંટણ પર પટ્ટો લગાવ્યો હતો અને રણનીતિએ રમતને ધીમી કરવામાં મદદ કરી હતી. આ કારણે બેટ્સમેનોની લય બગડી ગઈ અને આ અમારી જીતનું મુખ્ય કારણ હતું.'

વધુ વાંચો: ભારત-બાંગ્લાદેશ વચ્ચે આજે પ્રથમ T20, આ 3 ખેલાડીઓ કરશે ડેબ્યૂ! જાણો સંભવિત પ્લેઈંગ-11

જાણીતું છે કે T20 વર્લ્ડ કપ 2024ની ફાઇનલમાં ટોસ જીતીને પ્રથમ બેટિંગ કરતા ભારતે વિરાટ કોહલીના 76 રનની ઇનિંગની મદદથી 7 વિકેટે 176 રન બનાવ્યા હતા. તેની સામે દક્ષિણ આફ્રિકા 8 વિકેટે 169 રન બનાવી શકી અને 7 વિકેટે મેચ હારી હતી.

બધાજ સમાચાર અને અપડેટ્સ મેળવવા માટે પ્લેસ્ટોર/ એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ