T-20 વર્લ્ડકપના ફાઇનલ મુકાબલામાં ઑસ્ટ્રેલિયાએ 8 વિકેટથી ન્યૂઝીલેન્ડને હરાવી જીત મેળવી છે. ઑસ્ટ્રેલિયા પ્રથમવખત વર્લ્ડ ચેમ્પિયન બન્યું છે.
ઓસ્ટ્રેલિયા બન્યું ટી-20 વર્લ્ડ ચેમ્પિયન
ફાઈનલમાં ન્યૂઝીલેન્ડને હરાવીને રચ્યો ઈતિહાસ
કિવી ટીમને આપ્યો 8 વિકેટથી પરાજય
દુનિયાને નવા ટી20 વર્લ્ડ ચેમ્પિયન મળ્યો છે. ઓસ્ટ્રેલિયાએ રવિવારે રમાયેલા ફાઈનલ મુકાબલમાં ન્યૂઝીલેન્ડને 8 વિકેટથી હરાવીને ટી-20 વર્લ્ડ કપ પોતાને નામે કરી લીધો છે. આ ફોર્મેટમાં ઓસ્ટ્રેલિયાનો પહેલો વર્લ્ડ કપ છે. ઓસ્ટ્રેલિયાએ ન્યૂઝીલેન્ડને 8 વિકેટથી હરાવીને ઈતિહાસ રચ્યો છે.
ટી-20 વર્લ્ડ કપ ફોર્મેટમાં ઓસ્ટ્રેલિયા પહેલી વાર વર્લ્ડ ચેમ્પિયન
ન્યૂઝીલેન્ડે પહેલા બેટિંગ કરીને 4 વિકેટ પર 172 રન બનાવ્યાં હતા. કેન વિલિયમસને સૌથી વધારે 85 રન બનાવ્યાં હતા. જવાબમાં ઓસ્ટ્રેલિયાએ 18.5 ઓવરમાં 2 વિકેટના નુકશાન પર રન પૂરા કરી લીધા હતા. મિચેલ માર્અશે શાનદાર 77 રન કર્યાં તે ઉપરાંત ડેવિડ વોર્નરે પણ 53 રન બનાવ્યાં હતા. ટી-20 વર્લ્ડ કપ ફોર્મેટમાં ઓસ્ટ્રેલિયા પહેલી વાર વર્લ્ડ ચેમ્પિયન બન્યું છે. આ પહેલા વેસ્ટ ઈન્ડીઝ, ભારત, પાકિસ્તાના, ઈંગ્લેન્ડ અને શ્રીલંકા ટી-20 વર્લ્ડ કપ પર કબજો કર્યો હતો.
T-20 વર્લ્ડ કપની ફાઇનલમાં 173 રનના ટાર્ગેટને ચેઝ કરવા ઉતરેલી ઓસ્ટ્રેલિયન ટીમની શરૂઆત ઘણી ખરાબ રહી હતી. 15 રનના સ્કોર પર કેપ્ટન ફિંચ પેવેલિયન ભેગો થઈ ગયો હતો. તો બીજી બાજુ ટ્રેંટ બોલ્ટે આ મહત્ત્વપૂર્ણ વિકેટ લઈ NZને પહેલી સફળતા અપાવી હતી. ત્યારપછી મિચેલ માર્શ અને ડેવિડ વોર્નરે ઈનિંગ સંભાળી હતી. તેમણે 59 બોલમાં 92 રનની પાર્ટનરશિપ નોંધાવી હતી. જોકે ત્યારપછી ટ્રેંટ બોલ્ટે વોર્નર (53 રન)ને આઉટ કરી આ જોડી તોડી હતી.
ટોસ હાર્યાપછી ન્યૂઝીલેન્ડની શરૂઆત સતર્ક રહી હતી. પહેલી વિકેટ માટે ડેરિલ મિચેલ અને માર્ટિન ગપ્ટિલ વચ્ચે 23 બોલમાં 28 રન કર્યા હતા. તેવામાં ઓસ્ટ્રેલિયન ફાસ્ટ બોલર જોશ હેઝલવુડે મિચેલ (11 રન)ને આઉટ કરી આ પાર્ટનરશિપ તોડી હતી. ઉલ્લેખનીય છે કે પહેલી વિકેટ પછી કીવી ટીમ ધીમી બેટિંગ કરતી જોવા મળી હતી. તેવામાં આક્રમક શોટ રમવા જતા માર્ટિન ગપ્ટિલ 28 રન કરી પેવેલિયન ભેગો થયો હતો.
11મી ઓવરમાં કીવી ટીમના કેપ્ટન કેન વિલિયમ્સનનો કેચ છૂટ્યો હતો. ત્યારપછી તેને 3 ચોગ્ગા માર્યા હતા. કેપ્ટન કેન વિલિયમ્સને 31 બોલમાં પોતાની અર્ધસદી પૂરી કરી હતી. તેણે મેક્સવેલની ઓવરમાં સિક્સ મારી ફિફ્ટી ફટકારી હતી. ત્યારપછી કેન વિલિયમ્સન આક્રમક બેટિંગ કરતો જોવા મળ્યો હતો.