અફઘાનિસ્તાન ક્રિકેટ ટીમના કેપ્ટન મોહમ્મદ નબીનો એક વીડિયો છેલ્લાં 2 દિવસથી ખૂબ વાયરલ થઈ રહ્યો છે. આ વીડિયો પર હવે વધુ મીમ્સ પણ બની રહ્યાં છે. આ વીડિયો એક પત્રકાર પરિષદનો છે. જેમાં નબી કહી રહ્યાં છે કે મારા માટે અંગ્રેજી બોલવુ ખૂબ કપરૂ છે.
પત્રકારોને કહી રહ્યાં છે, મારા માટે અંગ્રેજી બોલવુ ખૂબ મુશ્કેલ
મોહમ્મદ નબીની આ વાત સાંભળી પત્રકારોમાં હાસ્યનુ મોજુ ફરી વળ્યું
અંગ્રેજી બોલવુ મારા માટે મુશ્કેલ કામ: મોહમ્મદ નબી
પત્રકાર પરિષદની શરૂઆત ખૂબ જ રમુજી અંદાજમાં થાય છે. અહીં નબી જેવા અંગ્રેજી પત્રકારોની સામે બેસે છે તેથી સૌથી પહેલા પૂછે છે કે ભાઈ, આખરે અંગ્રેજીમાં કેટલા સવાલ હશે? આ સવાલ સાંભળી પત્રકારોની વચ્ચે હાસ્ય રેલાઈ જાય છે. વીડિયોમાં નબી કહી રહ્યાં છે કે અંગ્રેજી બોલવુ તેમના માટે મુશ્કેલભર્યુ કામ છે. નબીએ વધુમાં કહ્યું કે બસ 5 મિનિટમાં તેમની અંગ્રેજી સમાપ્ત થઇ જશે. આ વીડિયો સોમવારે યોજાયેલી અફઘાનિસ્તાન-સ્કોટલેન્ડ મેચ પહેલા થયેલી પત્રકાર પરિષદનો છે. સોશિયલ મીડિયામાં હવે ઝડપથી વાયરલ થઇ રહ્યો છે. ખૂબ જ સાદગીપૂર્વક અંગ્રેજીને પોતાના માથાનો દુ:ખાવો ગણાવનારા નબીના સોશિયલ મીડિયામાં યૂઝર્સે વખાણ કર્યા છે.
અફઘાનિસ્તાને ધમાકેદાર જીત સાથે આ વર્લ્ડ કપની શરૂઆત કરી છે. પોતાની પ્રથમ મેચમાં અફઘાનિસ્તાને સ્કોટલેન્ડને 130 રનથી કારમી હાર આપી હતી. અફઘાનિસ્તાને પ્રથમ બેટીંગ કરી સ્કોટલેન્ડની સામે 191 રનનો લક્ષ્યાંક મુક્યો. જેના જવાબમાં સ્કોટલેન્ડની ટીમ અંદાજે 60 રનના સ્કોરમાં સમેટાઈ ગઇ હતી. હવે અફઘાનિસ્તાનની આગામી મેચ 29 ઓક્ટોબરે પાકિસ્તાન સામે રમાશે.