ICC ટી-20 વર્લ્ડ કપ 2021માં મોટી-મોટી ટીમો રમતમાં પછડાટ ખાઈ રહી છે. જેમાં અમુક હદ સુધી UAEની પિચને પણ જવાબદાર માનવામાં આવી રહી છે. ટી-20 વર્લ્ડ કપ પહેલાં UAEની પિચ પર IPL 2021 ટુર્નામેન્ટ રમાઈ હતી. સુપર 12 તબક્કામાં 6-6 ટીમોના બે ગ્રુપ બનાવવામાં આવ્યાં છે.
ટી-20 ફોર્મેટમાં કાંગારૂ ટીમનું સૌથી કંગાળ પ્રદર્શન
આ સિવાય અન્ય ત્રણ ટીમો સેમિફાઈનલમાં નહીં રમે તે લગભગ નક્કી
ઓસ્ટ્રેલિયા
દરેક ગ્રુપમાંથી 2-2 ટીમો સેમિફાઈનલ માટે ક્વોલિફાઈ કરશે. પરંતુ 4 ટીમો એવી છે, જેનું ટી-20 વર્લ્ડ કપના સેમિફાઈનલમાં પહોંચવાનું સપનું કદાચ પૂર્ણ થશે નહીં. આવો નાખીએ એક નજર 4 ટીમો પર. ક્રિકેટ જગતમાં સૌથી તગડી ટીમોમાંથી એક ગણાતી ઓસ્ટ્રેલિયા વન-ડે વર્લ્ડ કપમાં સૌથી સફળ છે. પરંતુ જ્યારે ટી-20 ફોર્મેટની વાત આવે છે ત્યારે કાંગારૂ ટીમનું નામ મજબુત ટીમની યાદીમાં આવતુ નથી. ટીમમાં આક્રમક ક્રિકેટર્સ હોવા છતાં ઓસ્ટ્રેલિયન ટીમ આ નાના ફોર્મેટમાં પોતાને શ્રેષ્ઠ સાબિત કરવામાં નિષ્ફળ રહી છે. છેલ્લાં ઘણાં સમયથી ટી-20 ફોર્મેટમાં ઓસ્ટ્રેલિયાના પ્રદર્શનમાં ઘટાડો આવ્યો છે. ઓસ્ટ્રેલિયાની ટીમ ટી-20 વર્લ્ડ કપની ફાઈનલમાં પહેલી અને અંતિમ વખત વર્ષ 2010માં પહોંચી હતી અને તેમાં ઓસ્ટ્રેલિયા ઈંગ્લેન્ડ સામે હારી ગઇ હતી. આ ટીમમાં મોટા-મોટા આક્રમક ક્રિકેટર્સ ઉપસ્થિત રહ્યાં છે. પરંતુ તેમ છતાં ઓસ્ટ્રેલિયા આ ફોર્મેટમાં પોતાનો દબદબો બનાવવામાં નિષ્ફળ રહી છે. કાંગારૂ ટીમના પ્રદર્શનને જોતા કહેવુ અયોગ્ય નથી કે ટી-20 વર્લ્ડ કપ 2021ની સેમિફાઈનલમાં પહોંચવાની સંભાવના ઓછી છે.
બાંગ્લાદેશ
ટી-20 વર્લ્ડ કપ 2021માં સુપર-12ની શરૂઆત બાંગ્લાદેશ માટે ખૂબ જ કંગાળ રહી છે. શ્રીલંકા અને ઈંગ્લેન્ડ સામે બાંગ્લાદેશે કારમી હારનો સામનો કર્યો છે. ત્યારબાદ બાંગ્લાદેશને સેમીફાઈનલમાં જવાની શક્યતા ખૂબ ઓછી છે. ટી 20 આંતરરાષ્ટ્રીય રેન્કિંગમાં બાંગ્લાદેશ ટોપ-8માં આવતી નથી. છેલ્લાં થોડા સમયમાં બાંગ્લાદેશની ટીમે ટી-20 ફોર્મેટમાં સારું પ્રદર્શન કર્યુ છે. બાંગ્લાદેશે આઈસીસી ટી-20 વર્લ્ડ કપ 2021 માટે સારી ટીમ પસંદ કરી છે. જેમાં મુસ્તાફિઝુર રહેમાન, મહમૂદુલ્લાહ, શાકિબ અલ હસન, મુશ્ફિકુર રહીમ, સૌમ્ય સરકાર જેવા સારા ક્રિકેટર્સ છે, પરંતુ ટી-20 વર્લ્ડ કપમાં આટલી સારી ટીમો હોવા છતાં બાંગ્લાદેશનું સેમિફાઈનલમાં પહોંચવુ કપરુ છે.
ન્યૂઝીલેન્ડ
ICC ટી 20 વર્લ્ડ કપ 2021માં ન્યૂઝીલેન્ડને ગ્રુપ 2માં રાખવામાં આવી છે. પૂલમાં ભારત, પાકિસ્તાન અને અફઘાનિસ્તાન જેવી ટીમોની સાથે ન્યૂઝીલેન્ડ ગ્રુપ 2નો ભાગ છે. આમ તો ન્યૂઝીલેન્ડનું આઈસીસીની ટુર્નામેન્ટમાં સારું પ્રદર્શન રહ્યું છે, પરંતુ હંમેશા ચેમ્પિયન બનવામાં થાપ ખાઈ જાય છે. ગયા વર્ષે ન્યૂઝીલેન્ડના પ્રવાસે ગયેલી ભારતીય ટીમે ન્યૂઝીલેન્ડને 5 મેચની ટી-20 શ્રેણીમાં 5-0થી હરાવી હતી. ત્યારબાદ ન્યૂઝીલેન્ડે આ ફોર્મેટમાં સારું પ્રદર્શન કર્યુ છે. જ્યારે હાલમાં બાંગ્લાદેશ પ્રવાસમાં ન્યૂઝીલેન્ડની ટીમને 3-2થી હાર પ્રાપ્ત થઈ હતી.
શ્રીલંકા
ICC ટી-20 વર્લ્ડ કપ 2021માં સૌથી નબળી ટીમોમાં શ્રીલંકાનું નામ પણ સામે આવ્યું છે. તાજેતરમાં શ્રીલંકા પ્રવાસમાં યુવા ખેલાડીઓની શ્રીલંકન ટીમે સારું પ્રદર્શન કર્યુ. અનુભવી ટીમ ના હોવા છતાં શ્રીલંકા ભારત સામેની ટી-20 શ્રેણી 2-1થી જીતવામાં સફળ રહી હતી. પરંતુ ટી-20 વર્લ્ડ કપમાં શ્રીલંકા સામે ખૂબ તગડી ટીમો છે. જેની સામે સ્પર્ધા કરવી ખૂબ મુશ્કેલ છે. આવી સ્થિતિમાં ટી-20 વર્લ્ડ કપ 2021ની સેમીફાઈનલમાં શ્રીલંકાનું પહોંચવુ ખૂબ મુશ્કેલ છે.