T20 World Cup 2024 / IND vs USA મેચમાં ભારતના જ બે બોલરોનો સામનો કરશે ટીમ ઇન્ડિયા, બધાની નજર રોહિત-વિરાટ પર

T20 વર્લ્ડ કપમાં ભારતની ત્રીજી મેચ યજમાન અમેરિકા સામે છે. બંને ટીમો છેલ્લી બે મેચ જીત્યા બાદ ઉત્સાહમાં છે. ત્યારે હવે આજે (12 જૂન) રમાનાર મેચ ખૂબ જ રોમાંચક રહેવાની આશા છે. આ મેચમાં રોહિત શર્મા અને વિરાટ કોહલીનો લિટમસ ટેસ્ટ થવાનો છે. તેની સામે ભારતના બે બોલર હશે, જેઓ અમેરિકા તરફથી જબરદસ્ત રમી રહ્યા છે. આ જોડીએ પાકિસ્તાનને હરાવીને ટુર્નામેન્ટમાં મોટો અપસેટ સર્જ્યો હતો. આવી સ્થિતિમાં અમેરિકન ટીમ વધુ એક અપસેટની તૈયારી કરી રહી છે. ભારત અને અમેરિકા વચ્ચેની આ મેચ ન્યૂયોર્કના નાસાઉ કાઉન્ટી ઈન્ટરનેશનલ ક્રિકેટ સ્ટેડિયમમાં રમાશે.

પાકિસ્તાન સામે નેત્રવલકરની શાનદાર બોલિંગ

ભારત માટે અંડર-19 વર્લ્ડ કપ રમી ચુકેલા સૌરભ નેત્રવલકર T20 વર્લ્ડ કપમાં તબાહી મચાવી રહ્યો છે. તેણે પોતાની શાનદાર બોલિંગથી પાકિસ્તાનને હરાવવામાં મહત્ત્વની ભૂમિકા ભજવી હતી. પાકિસ્તાન સામેની મેચમાં તેણે 4 ઓવરમાં માત્ર 18 રન આપીને 2 વિકેટ ઝડપી હતી. જેમાં મોહમ્મદ રિઝવાનની મોટી વિકેટ પણ સામેલ હતી. એટલું જ નહીં, સુપર ઓવરમાં પહોંચેલી મેચમાં અમેરિકાને જીત અપાવનાર નેત્રવલકર જ હતો, જેણે 18 રન ડિફેન્ડ કર્યા. એવામાં હવે એ જોવાનું રોમાંચક રહેશે કે ભારતીય ઓપનરો તેની સામે કેવા વલણ સાથે રમે છે.

નોસ્તુશ કેંજીગે સામે બેટ્સમેન લાચાર

એક તરફ સૌરભ નેત્રવલકર અને બીજી તરફ નોસ્તુશ કેંજીગેએ પાકિસ્તાની બેટ્સમેનોને સંપૂર્ણ રીતે બાંધી દીધા હતા. જણાવી દઈએ કે કેંજીગે ભારતનો છે અને તે અભ્યાસ માટે અમેરિકા ગયો હતો. ક્રિકેટ પ્રત્યેનો તેનો જુસ્સો અને તેની પ્રતિભાએ તેને રાષ્ટ્રીય ટીમમાં સ્થાન અપાવ્યું. આ બોલરે પાકિસ્તાન સામેની મેચમાં 3 મહત્ત્વની વિકેટ લીધી હતી. તેણે આઝમ ખાન, શાદાબ ખાન અને ઉસ્માન ખાનની વિકેટ લીધી હતી. આવી સ્થિતિમાં ભારતીય બેટ્સમેનો સામે તેનું પ્રદર્શન જોવા જેવું રહેશે.

બધાની નજર રોહિત પર

આયર્લેન્ડ સામે અડધી સદી ફટકારનાર ભારતીય કેપ્ટન રોહિત શર્મા પર પણ બધાની નજર ટકેલી છે. તે પાકિસ્તાન સામે કેટલાક સારા શોટ રમીને આઉટ થઈ ગયો હતો. આ મેચમાં રોહિતે 13 રન બનાવ્યા હતા. એવામાં રોહિત પોતાના જ દેશના અમેરિકન બોલરોનો સામનો કેવી રીતે કરશે, એ જોવું રસપ્રદ રહેશે.

વિરાટ કોહલી પાસેથી મોટી ઇનિંગની અપેક્ષા

ભારત માટે મોટી વાત એ છે કે અત્યાર સુધી રમાયેલી બંને મેચમાં વિરાટ કોહલીનું બેટ ચાલ્યું નથી. રોહિત શર્મા સાથે ઓપનિંગ કરવા આવેલા કોહલી આયર્લેન્ડ સામે માત્ર 1 રન જ બનાવી શક્યો હતો, જ્યારે પાકિસ્તાન સામે તેણે માત્ર 4 રન બનાવ્યા હતા. એવામાં અમેરિકા સામે તેની પાસેથી મોટી અને શાનદાર ઇનિંગની અપેક્ષા રાખશે.

વધુ વાંચો: આજે ટીમ ઈન્ડિયાની વર્લ્ડ કપની સુપર-8માં એન્ટ્રી થશે? અમેરિકા બગાડી શકે છે ખેલ

જે જીતશે એ પહોંચી જશે સુપર-8માં

ભારત અને પાકિસ્તાન મેચની વિજેતા ટીમ 6 પોઈન્ટ લઈને સુપર-8ની ટિકિટ મેળવી લેશે. અત્યાર સુધીમાં બે ટીમો સુપર-8માં સ્થાન મેળવવામાં સફળ રહી છે. દક્ષિણ આફ્રિકાએ ગ્રુપ-ડીમાંથી સુપર-8માં અને ઓસ્ટ્રેલિયાએ ગ્રુપ-બીમાંથી સુપર-8માં જગ્યા બનાવી છે. ભારત અને અમેરિકા ગ્રુપ-એમાં છે. બંનેને 4-4 પોઈન્ટ્સ છે અને તે અનુક્રમે પ્રથમ અને બીજા સ્થાને છે.