ટી-20 વર્લ્ડ કપ 2021નો ઉત્સાહ હવે ધીમે-ધીમે વધી રહ્યો છે. આ ટુર્નામેન્ટની રાઉન્ડ 1ની મેચ હવે પૂર્ણ થવાના આરે છે અને ટૂંક સમયમાં સુપર 12ની મેચો શરૂ થવાની છે. જ્યાં ટી-20 વર્લ્ડ કપ જીતવા માટે ઘણી ટીમો દાવેદાર છે. આવી સ્થિતિમાં બેટ્સમેન અને બોલરનું યોગદાન મહત્વપૂર્ણ રહેશે. આવો જાણીએ એવા બેટ્સમેનો અને બોલરો વિશે જે ચાલુ વર્ષે સૌથી વધુ રન અને વિકેટ પ્રાપ્ત કરી શકે છે.
ઓસ્ટ્રેલિયાના પૂર્વ ફાસ્ટ બોલરનું નિવેદન
ટી-20 વર્લ્ડ કપમાં આ ભારતીય બેટ્સમેન બનાવશે સૌથી વધુ રન
બંને ખેલાડીઓએ આઈપીએલ દરમ્યાન કર્યુ છે સારું પ્રદર્શન
ટીમ ઈન્ડિયાના આ બે ખેલાડી પાસેથી સારી અપેક્ષા
ઓસ્ટ્રેલિયાના પૂર્વ ફાસ્ટ બોલર બ્રેટ લીનું માનવુ છે કે ભારતના કેએલ રાહુલ અને મોહમ્મદ શમી ટી-20 વિશ્વ કપના સુપર 12 સ્ટેજમાં સૌથી વધુ રન બનાવનારા બેટ્સમેન અને સૌથી વધુ વિકેટ પ્રાપ્ત કરનાર બોલર બની શકે છે. રાહુલ આઈપીએલ દરમ્યાન સારા ફોર્મમાં હતા અને સૌથી વધુ રન બનાવનારાની યાદીમાં ત્રીજા સ્થાને રહ્યાં છે. પંજાબ કિંગ્સ ટીમના તેમના સાથી શમીએ છેલ્લાં કેટલાંક સમયમાં સારી બોલિંગ કરી જેમાં ઈંગ્લેન્ડ સામેની અભ્યાસ મેચમાં આક્રમક પ્રદર્શન પણ સામેલ છે.
લીએ આઈસીસી માટે કોલમમાં લખ્યું, મને લાગે છે કે ટોપના ચાર અથવા પાંચ બેટ્સમેન અને બોલિંગ આક્રમણની સાથે ભારત સંભવત: ચેમ્પિયનશિપ માટે પ્રબળ દાવેદાર છે. છેલ્લાં થોડા મહિનાનું પ્રદર્શન જોઈએ તો મારી નજરમાં કેએલ રાહુલ ટુર્નામેન્ટનો ટોપ સ્કોરર અને મોહમ્મદ શમી સૌથી વધુ વિકેટ લેનાર બોલર હશે. તેથી જો તેઓ અપેક્ષા મુજબ પ્રદર્શન કરશે અને ભારતની પાસે ટોપ સ્કોરર અને સૌથી વધુ વિકેટ લેનાર ખેલાડીમાં સામેલ થશે તો આ સારી શરૂઆત રહેશે. આ સાથે લીનું માનવુ છે કે યુએઈની સ્થિતિમાં ભારતીય ઉપખંડની ટીમો સારું પ્રદર્શન કરશે.
લીને આશા છે કે ઓસ્ટ્રેલિયા પોતાની પ્રથમ ટી-20 વિશ્વ ચેમ્પિયનશિપ જીતવામાં સફળ રહેશે. ઓસ્ટ્રેલિયા પોતાના મહા અભિયાનની શરૂઆત શનિવારે દક્ષિણ આફ્રિકા સામે કરશે. લીએ કહ્યું, આ ફોર્મેટમાં અમને કોઈ સફળતા મળી નથી. હવે સમય આવી ગયો છે કે અમે તેમાં ફેરફાર કરીએ અને અમારી પાસે એવી ટીમ છે, જે ચેમ્પિયન બની શકે છે.