રાજ્યમાં સ્વાઈન ફ્લૂનું સંકંટ વધી રહ્યું છે. આ મામલે સરકારે હાઇકોર્ટમાં જવાબ રજુ કર્યો છે. હાઇકોર્ટે સરકાર પાસે આ મામલે રિપોર્ટ માગ્યો હતો. સ્વાઇન ફ્લુ અંગે સરકાર શું પગલાં લીધા તે મામલે સ્પષ્ટતા કરાશે. 567 દર્દીઓ હાલ સ્વાઈન ફ્લૂની સારવાર મેળવી રહ્યા છે. સરકારે ડોર ટુ ડોર સર્વે કર્યો હોવાનો દાવો કર્યો છે.
ચાલુ વર્ષે સ્વાઈન ફ્લૂના કારણે ભાવનગરમાં 19 મોત
રાજ્યમાં ટપોટપ સ્વાઇન ફ્લૂના કારણે લોકો મોતને ભેટી રહ્યા છે. જેમાં ભાવનગરમાં સ્વાઈનફ્લૂના કારણે મહિલાનું મોત થયું છે. લાકડિયા ગામની મહિલાનું સારવાર દરમિયાન મોત થયું છે. ભાવનગર સિવિલમાં મહિલા સારવાર લઈ રહી હતી. ગઇકાલે લાઠીના દામનગરના દર્દીનું મોત થયું હતું. ચાલુ વર્ષે સ્વાઈનફ્લૂના કારણે ભાવનગરમાં 19 મોત થયા છે. હાલ જિલ્લાભરમાં કુલ 17 દર્દીઓ સારવાર હેઠળ છે.
રાજકોટ-સૌરાષ્ટ્રમાં સ્વાઇન ફ્લૂનો કહેર
રાજકોટ સહિત સૌરાષ્ટ્રમાં સ્વાઇન ફ્લૂનો કહેર યથાવત જોવા મળ્યો છે. 69 વર્ષીય પુરુષનો સ્વાઈનફ્લૂનો રિપોર્ટ પોઝિટિવ જોવા મળ્યો છે. સાથે સ્વાઈન ફ્લૂનાં વધુ 11 પોઝીટીવ કેસ નોંધાયા છે. 43 દિવસમાં સ્વાઈનફલૂનાં 187 કેસ નોંધાયા છે. આ 43 દિવસમાં સ્વાઇન ફ્લૂથી કુલ 37 લોકોનાં મોત થયા છે. 43 દિવસમાં સ્વાઈનફ્લૂના કારણે રાજકોટમાં 34 મોત થયા છે. ચાલુ વર્ષે સ્વાઈનફ્લૂના કુલ 176 કેસ દાખલ થયા છે.
વડોદરામાં સ્વાઈન ફ્લૂના વધુ 9 કેસ
રાજ્યમાં દિવસેને દિવસે સ્વાઇન ફ્લૂની ઘટનાઓ વધી રહી છે ત્યારે મધ્યગુજરાતમાં પણ સ્વાઇન ફ્લૂએ કહેર વરસાવ્યો છે. વડોદરામા સ્વાઈન ફ્લૂના વધુ 9 પોઝિટિવ કેસ નોંધાયા છે. ત્યારે આજે સ્વાઈનફ્લૂના કારણે વધુ એક દર્દીનુ મોત નિપજ્યું છે. જેને લઈને આરોગ્ય વિભાગ સતર્ક બન્યો છે.
સ્વાઇન ફ્લૂનો કહેર વધતા આરોગ્ય વિભાગ હરકતમાં
સ્વાઇન ફ્લૂનો કહેર વધતા આરોગ્ય વિભાગ હરકતમાં આવ્યું છે. કેન્દ્રીય આરોગ્ય વિભાગની ટીમ પણ ગુજરાત પહોચી છે. સેટકોમના માધ્યમથી સ્વાઇન ફ્લૂ અંગે જાગૃતિ ફેલાવવામાં આવશે. સરકારી અને પ્રાઇવેટ હોસ્પિટલના ડોક્ટરોને માર્ગદર્શન આપશે. ગામના આગેવાનો આરોગ્ય કર્મચારીઓને સારવાર અંગે માર્ગદર્શન આપશે. રાજ્ય અને કેંન્દ્ર સરકારના નિષ્ણાંતો માર્ગદર્શન આપશે.
હાઈકોર્ટની ટકોર બાદ સ્વાઈનફ્લૂને અટકાવવા તંત્ર સફાળુ જાગ્યું
હાઈકોર્ટની ટકોર બાદ સ્વાઈનફ્લૂને અટકાવવા તંત્ર સફાળુ જાગ્યું છે. સ્વાઈનફલૂના કહેરને લઈને મેયરની અધ્યક્ષતામાં બેઠક યોજાઇ છે. રાજ્યસરકારના પ્રતિનિધીઓ સાથે વિડીયો કોન્ફરન્સથી ચર્ચા કરવામાં આવી છે. સ્વાઈનફ્લૂના પ્રભાવને અટકાવવા અંગે સુચનો આપવામાં આવ્યા છે. સ્ટેન્ડિંગ કમિટી ચેરમેન ડેપ્યુટી મેયર સહિતના આગેવાનો હાજર રહ્યાં હતાં. આ બેઠકમાં હોસ્પિટલ કમિટીના ચેરમેન સહિતના આગેવાનો પણ હાજર રહ્યાં હતાં.