સ્વાઈન ફ્લૂ / દેશમાં એક વાર ફરી H1N1 વાઈરસનો પગપેસારો, જાણો શા છે તેનાં લક્ષણો અને ઉપાયો!

• રાજસ્થાનમાં નોંધાયા સૌથી વધુ 5,052 કેસ અને 206નાં મોત
• સ્વાઇન ફ્લૂને 1919માં એક મહામારી તરીકે અપાઇ હતી માન્યતા

નેશનલ સેન્ટર ફૉર ડિસીઝ કંટ્રોલના એક અહેવાલમાં, વર્ષ 2012થી અત્યાર સુધીના H1N1ના કેસના આંકડા રજૂ કરવામાં આવ્યો છે. વર્ષ 2019માં સ્વાઈન ફ્લૂ (Swine Flu) ના 27,505 કેસ નોંધાયા છે, જેમાંથી 1137 લોકોએ જીવ ગુમાવ્યો છે. રાજસ્થાનમાં સૌથી વધુ 5,052 કેસ નોંધાયા છે અને અહીં 206 લોકોએ પોતાની જિંદગી ગુમાવી છે.

ત્યાર બાદ ગુજરાતમાં 4,832 કેસ નોંધાયા હતા, જેમાંથી 149 લોકોના મોત થયા હતા. દિલ્હીમાં 3,583 કેસોમાં 31નાં મોત નોંધાયા છે, મહારાષ્ટ્રમાં 2,173 કેસોમાંથી 208 લોકો મૃત્યુ પામ્યા છે. બીજી તરફ ઉત્તરપ્રદેશમાં 14 જુલાઈ સુધી 1,057 કેસમાં 25 લોકોનાં મૃત્યુ નોંધાયા છે. કર્ણાટકમાં 30 ઓગસ્ટ સુધીમાં 1,882 કેસ નોંધાયા હતા, જેમાંથી 88 લોકોએ તેમનો જીવ ગુમાવ્યો છે.

ગયા વર્ષે સ્વાઈન ફ્લૂના દર્દીઓની આવી હતી સ્થિતિ
વર્ષ 2018માં દેશમાં સ્વાઈન ફ્લૂના 15,266 કેસ નોંધાયા હતા, જેમાં 1,128 લોકોએ જીવ ગુમાવ્યો હતો. 2018માં તામિલનાડુ (2,812), મહારાષ્ટ્ર (2,593), રાજસ્થાન (2,375), ગુજરાત (2,164) અને કર્ણાટક (1,733) આ વાઈરસથી સૌથી વધુ પ્રભાવિત થયા હતાં. 2012થી અત્યાર સુધીમાં મહારાષ્ટ્ર, ગુજરાત અને રાજસ્થાન એવા રાજ્યો તરીકે સામે આવ્યા છે, જ્યાં આ બીમારીનો પ્રકોપ સૌથી વધુ જોવા મળ્યો છે.

આખરે કેમ થાય છે સ્વાઈન ફ્લૂની ઘાતક બીમારી?
સ્વાઇન ફ્લૂ એ શ્વસન તંત્ર સાથે જોડાયેલી બીમારી છે, જે એ-ટાઈપનાં ઇન્ફ્લુએન્ઝા વાઈરસથી થાય છે. તેને 1919માં એક મહામારી તરીકે માન્યતા આપવામાં આવી હતી. H1N1 વાઈરસ સ્વાઇન ફ્લૂનું કારણ છે. તેની શરૂઆત ડુક્કરોથી થઈ હતી. સ્વાઈન ફ્લૂનાં લક્ષણોમાં તાવ, ઉધરસ, ગળામાં દુખાવો, ઠંડી લાગવી, નબળાઇ અને શરીરમાં દુ:ખાવોનો સમાવેશ થાય છે. તેનાથી બચવા માટે સ્વચ્છતા તરફ વધુ ધ્યાન આપવાની ખાસ જરૂર પડે છે.

વધુ પડતી સાવધાની અને સતર્કતા ખુબ જરૂરી
સ્વાઇન ફ્લૂ એ એક ચેપી રોગ છે, જે છીંક, ખાંસી (ઉધરસ), સ્પર્શ વગેરે દ્વારા ફેલાય છે. તેના વાઈરસ સ્ટીલ, પ્લાસ્ટિકમાં 24થી 48 કલાક, કપડાં અને કાગળમાં આઠથી 12 કલાક, ટિશ્યુ પેપરમાં 15 મિનિટ અને હાથમાં 30 મિનિટ સુધી સક્રિય રહે છે. આ વાઈરસને ખતમ કરવા માટે ડિટરજન્ટ્સ, આલ્કોહોલ, બ્લીચ અથવા સાબુનો ઉપયોગ કરી શકાય છે.

સ્વાઈન ફ્લૂના આ ઉપચાર પણ જાણી લો
- યુવાનોને તાવ અને શરદીથી બચાવવા માટે પેરાસિટામૉલ આપવામાં આવે છે.
- 16 વર્ષથી ઓછી ઉંમરના બાળકોને એસ્પિરિન જેવી દવા ન આપવી જોઈએ.
- સ્વાઇન ફ્લૂની સારવાર સામાન્ય ફલૂની જેમ જ કરવામાં આવે છે અને ઠંડી, કફ, તાવથી બચવા માટે પેરાસિટામૉલ કે એન્ટિરેટ્રોવાઈરલ જેવી એન્ટિવાઈરલ દવાઓ આપવામાં આવે છે.
- સ્વાઇન ફ્લૂથી બચવા સલામતીનાં પગલાં અનુસરો. ચેપ લાગવાની શક્યતા હોય એવી જગ્યાએ માસ્ક પહેરવાનું ખાસ યાદ રાખો. સ્વાઇન ફ્લૂ ફેલાયો હોય તેવા વિસ્તારોમાં જવાનું ટાળો.