ક્રાઈમ / PI અજયની મિલકતની તપાસ જરૂરી, મોંઘીકાર ગીફ્ટમાં આપવા રૂપિયા ક્યાંથી આવ્યા હતાઃ સ્વિટી પટેલના ભાઈ જયદીપ

• વડોદરામાં સ્વીટી પટેલ હત્યા કેસનો મામલો
• આરોપી PI અજય દેસાઇ સામે ACBમાં ફરિયાદ
• સ્વીટી પટેલના ભાઈ જયદીપ પટેલે કરી ફરિયાદ 

વડોદરામાં સ્વીટી પટેલ હત્યા કેસમાં આરોપી PI અજય દેસાઇ સામે વધુ એક  ફરિયાદ ACBમાં નોંધાઈ છે.  સ્વિટી પટેલના ભાઈ જયદીપ પટેલે ફરિયાદ કરીને આરોપી PIની મિલકતોની તપાસ રજૂઆત આપી છે. આરોપી PI મહિને લાખોનો વહીવટ કરતો હોવાનો આક્ષેપ પણ કર્યો છે. જયદીપ પટેલે ACBના વડાને લેખિતમાં ફરિયાદ આપી છે. સાથે કિરીટસિંહ જાડેજા સાથેના આર્થિક વ્યવહારોની તપાસ કરવા પણ માંગ કરી છે. અજય દેસાઈએ ગત વર્ષે સ્વિટી પટેલને કાર ગીફ્ટમાં આપી હતી. અજય દેસાઈ મોંઘીદાટ કાર ક્યાંથી લાવ્યાં તે અંગે સવાલ પણ ઉઠાવ્યા છે. 

કેવી રીતે કરી હત્યા અને શું હતું કારણ

સ્વિટી પટેલ હત્યા મામલે પોલીસ દ્વારા સમગ્ર ક્રાઈમનો ખુલાસો કરવામાં આવ્યો છે. જેમાં પોલીસે જણાવ્યું કે, 5 જૂન 2021ના દિવસે સ્વિટી પટેલ ગુમ થયા હોવાની જાણ થઈ હતી. જે બાદ પોલીસે ટેક્નિકલ તપાસના આધારે જાણ્યું કે, PI અજય દેસાઈ અને સ્વિટી પટેલ વચ્ચે ગુમ થવાના એક દિવસ અગાઉ 4 જૂને લગ્ન સંબંધિત ઝઘડો થયો હતો. ઉગ્ર ઝઘડામાં PI અજય દેસાઈએ આવેશમાં આવી સ્વિટી પટેલનું ગળું દબાવી હત્યા કરી હતી. અને સ્વિટી પટેલના મૃતદેહને બાથરૂમમાં છૂપાવી દીધો હતો. 

સ્વિટી પટેલના મૃતદેહને કર્યો ઠેકાણે

એક રાત્રી મૃતદેહને પોતાના ઘરના બાથરૂમમાં છૂપાવી રાખ્યા બાદ બીજા દિવસની સવારે 11 કલાકે PI અજય દેસાઈએ પોતાની બ્લેક જીપનો ઉપયોગ કર્યો હતો. જીપને ઘરના ગેટ સુધી રિવર્સ લઈ મૃતદેહને બ્લેન્કેટમાં કવર કર્યા બાદ જીપની ડેકીમાં મૂકી દીધી હતી. આ બાદ ગાડીને બાજુના મકાનના કમ્પાઉન્ડમાં રાખી પોતાના સાળા જયદીપને કહ્યું કે, તેમના બહેન સ્વિટી પટેલ ગુમ થઈ ગયા છે. 

અટાલીની એક બંધ હોટલ પાછળ મૃતદેહને સળગાવાયો

સ્વિટી પટેલના ભાઈને જાણ કર્યા બાદ અજય દેસાઈએ મૃતદેહને ઠેકાણે લગાવવાની તજવીજ હાથ ધરી હતી. આ માટે PI અજય દેસાઈએ પોતાના મિત્ર કિરીટસિંહ જાડેજા કરજણવાળાની મદદ લીધી હતી. અને 5 જૂનની સાંજે 4 વાગ્યે કરજણ-આમોદ-વાગરાથી દહેજ હાઈ-વે પર અટાલી ગામના પાટી પાસે કિરીટસિંહ જાડેજાની બંધ હોટલ પર પહોંચ્યા હતા. આ હોટલ લાંબા સમયથી બંધ હતી. અને હોટલના પાછળના ભાગે આવેલા ખુણામાં ગાડીને લઈ મૃતદેહને સળગાવી દેવાયો હતો. આ કેસમાં PI અજય દેસાઈની સાથે કિરીટસિંહ જાડેજાને પણ આરોપી બનાવવામાં આવ્યા છે. 

શા માટે કોંગ્રેસ નેતાની પોલીસે કરી હતી પૂછપરછ

કરજણના રાજકીય નેતા કિરીટસિંહ જાડેજા અને સ્વિટી પટેલના પતિ PI દેસાઈ વચ્ચે સારી મિત્રતા હોવાની સૂત્રોકીય માહિતી હતી. અને થોડા દિવસ પહેલા પોલીસને અટાલી નજીક જે ઈમારત પાછળ બળેલા હાડકા મળ્યા હતા. તે જમીનના દસ્તાવેજની પણ પોલીસે તપાસ હાથ ધરી હતી. આ મામલે સૂત્રોએ માહિતી જણાવી કે, તેમાં 15 જેટલા ભાગીદારો છે. અને કિરીટસિંહ પણ એક ભાગીદાર છે. 10 વર્ષ અગાઉ આ જમીન પર હોટલનું બાંધકામ શરૂ કરાયું હતું. જે પૂરું થઈ શક્યું નહોતું.