અમદાવાદમાં સફાઇ કર્માચારીઓ સતત 6 દિવસથી હડતાળ પર હતા. બોડકદેવ વોર્ડ ઓફિસ ખાતે સફાઈ કર્મીઓ વિરોધ કર્યો હતો. ત્યાર બાદ સફાઈ કામદારોએ AMC ઓફિસની બહાર ઉગ્ર દેખાવો કર્યા હતા. ત્યારે અંતે AMCએ સફાઇ કર્મચારીઓની માંગો સ્વીકારી હોવાની વાત સામે આવી હતી. જ્યારબાદ કર્મચારીઓએ હડતાળ સમેટી લીધી છે. જોકે હવે હડતાળ ફરી યથાવત રહેશે તેવી જાહેરાત કરવામાં આવી છે. સમગ્ર મામલે વળાંક આવ્યો છે. મહત્વનું છે કે, 6200 કર્મચારીઓના વારસાઈ હક માટે લેખિતમાં ખાતરી માગી હતી.
છેલ્લા 6 દિવસથી સફાઈ કામદારોની હડતાળ સમેટાઇ
પડતર પ્રશ્નનોને લઈને સફાઈ કામદારોએ કરી હતી હડતાળ
AMCએ કર્મચારીઓની માંગો સ્વીકારી, લેખિતમાં આપી બાહેંધરી
અમદાવાદ મ્યુનિ. સફાઈ કર્મચારીની હડતાળનો આજે છઠ્ઠો દિવસ હતો. સફાઈકર્મીઓની હડતાળને પગલે શહેરમાં ગંદકીનું સામ્રાજ્ય થયું હતું. ત્યારે આજે AMC ઓફિસની બહાર મોટી સંખ્યામાં કર્મચારીઓએ દેખાવો કર્યા હતા. મોટી સંખ્યામાં કામદારોએ AMC દાણાપીઠને ઘેરાવો કર્યો હતો. સાથે સરકાર અને કમિશનર વિરૂદ્ધ સુત્રોચ્ચાર પણ કર્યા હતા. વારસાઇ હક અને અન્ય માંગણીઓને લઇને કામદારો હડતાળ પર હતા. મનપા કમિશનર, ડે.મ્યુનિસિપલ કમિશનરની કમિટી બનાવી હતી. જોકે આજે તેનું નિરાકરણ આવ્યું છે. AMCએ સફાઈ કામદારોની માંગો સ્વીકારી અને લેખિતમાં બાહેંધરી આપી હોવાનું જણાયું હતું. જેને લઇને કર્મચારીઓએ હડતાળ સમેટી લેવાનો નિર્ણય કર્યો હતો. તેવામાં હવે અમદાવાદમાં સફાઈ કામદારોના વિરોધ બાદ ફરી યુ-ટર્ન આવ્યો છે. સફાઈ કામદારોના યુનિયનમાં બેફાંટા પડ્યા છે. અગાઉ સફાઈ કામદારોની હડતાલ સમેટાઈ હોવાની જાહેરાત કરી હતી. જોકે હવે સફાઈ કામદારોની હડતાલ ચાલુ રાખવાની જાહેરાત કરવામાં આવી છે. અમદાવાદ મ્યુનિ.કમિશનરના પત્રમાં માગણી સ્વિકારવાનો ઉલ્લેખ ન હોવાથી સફાઇ કામદારોએ ફરી હડતાળ ચાલુ રાખવાનો નિર્ણય કર્યો છે. સફાઈ કામદારોએ મ્યુનિ.કમિશનરની કાર રોકીને વિરોધ વ્યક્ત કર્યો છે.
વિરોધ દરમિયાન મહિલા બેભાન થઇ હતી
AMC ઓફિસની બહાર મોટી સંખ્યામાં સફાઇ કર્મચારીઓએ એકઠા થઇને દેખાવો કર્યા હતા. સૂત્રોચ્ચાર સાથે વિરોધ કરવામાં આવી રહ્યો હતો. આ દરમિયાન એક મહિલા બેભાન થઇ ગઇ હતી.
6,200 સફાઈ કર્મચારીઓના વારસાઈ હકના મામલે કોકડું ગૂંચવાયું હતું
આ અગાઉ બોડકદેવ ખાતેની ઉત્તર-પશ્ચિમ ઝોનની કચેરીમાં સફાઈ કર્મચારીઓનાં ધરણાં પ્રદર્શન કર્યું હતું. ગઈકાલે મ્યુનિ. કમિશનર મૂકેશકુમાર સાથેની બેઠક નિષ્ફળ જતાં આંદોલન યથાવત્ રખાયું હતું. જોકે કમિશનરે નિમેલી ત્રણ સભ્યની કમિટી સમક્ષ બેઠક યોજાઇ હતી. જેમાં સફાઈ કર્મચારીઓ વારસાઈ હક માટે તંત્ર પાસે ફરીથી લેખિતમાં માગણી કરવામાં આવી હતી. આમ 6,200 સફાઈ કર્મચારીઓના વારસાઈ હકના મામલે કોકડું વધુ ગૂંચવાયું હતું
6,200 કર્મચારીઓના વારસાઈ હક માટે લેખિતમાં ખાતરી માગી હતી
ગઈકાલે સફાઈ કર્મચારીઓના અગ્રણીઓએ કમિશનર મૂકેશકુમાર સાથેની બેઠકમાં 6,200 કર્મચારીઓના વારસાઈ હક માટે લેખિતમાં ખાતરી માગી હતી.