ધનુષ / 30 સેકન્ડમાં દુશ્મનનો ખેલ સમાપ્ત! સ્વેદશી તોપ 'ધનુષ'નું સેનામાં આગમન

પહાડી વિસ્તાર અને રણમાં દુશ્મનોને ધૂળ ચટાડવામાં સક્ષમ એવી સ્વદેશી ધનૂષ તોપ આજથી સેનામાં સામેલ થશે. ગન કેરિજ ફેકટરી (જીસીએફ) જબલપુરમાં યોજાનારા ઔપચારિક કાર્યક્રમમાં અંદાજે 6  જેટલી ધનૂષ તોપ સેનાના ઓફિસરોને સોંપવામાં આવશે. જેનું નિર્માણ કાનપુર (ઓએફસી) અને ફીલ્ડ ગન ફેકટરી દ્વારા સંયુક્ત મળીને કરવામાં આવ્યું છે. 
 

ધનૂષ તોપ બોફોર્સનું સ્વદેશી સંસ્કરણ છે. જેના 95 ટકાથી વધુ પાર્ટસ સ્વદેશી છે. સેના દ્વારા દરેક મોસમમાં કરવામાં આવેલ પરીક્ષણમાં આ તોપ યોગ્ય રહી છે. તેનું ઓર્ડનન્સ ફેકટરી કાનપુર અને ફીલ્ડ ગન ફેકટરીમાં મોટા પાયે ઉત્પાદન શરૂ થઇ ગયું છે. આ અંગે ભારતીય સેના અને રક્ષા વિભાગે 19 ફેબ્રુઆરીએ જ મંજુરી આપી દીધી હતી. 2022-23 સુધીમાં અંદાજે 114 જેટલી તોપ સેનાને સોંપવામાં આવશે. 
 

ધનૂષ તોપ પર એક નજર નાંખીએ તો બેરલનું વજન 2692 કિલો છે, જ્યારે બેરલની લંબાઇ આઠ મીટર જેટલી છે. જ્યારે રેન્જ 42-45 કિલોમીટર તેમજ પ્રતિ મિનિટમાં બે વખત ફાયરિંગ કરી શકે છે. જ્યારે સતત બે કલાક સુધી ફાયરિંગ કરવાની ક્ષમતા છે. જ્યારે આ તોપમાં વાપરવામાં આવતા ગોળાનું વજન 46.5 કિલો છે.