કૌભાંડ / સુરતમાં 1500 કરોડની જમીનના દસ્તાવેજોમાં એન્ટ્રી કૌભાંડનો મામલો, સબ રજિસ્ટ્રારની કચેરીની શંકાસ્પદ ભૂમિકા

• સુરતમાં દસ્તાવેજોમાં એન્ટ્રી કૌભાંડનો મામલો
• અઠવા સબ રજિસ્ટ્રારની કચેરીની શંકાસ્પદ ભૂમિકા
• 38 એકર જમીનના દસ્તાવેજો સાથે ચેડા કરાયા

સુરતમાં 61 વર્ષ જૂના દસ્તાવેજોમાં એન્ટ્રી કૌભાંડનો મામલે અઠવા સબ રજિસ્ટ્રારની કચેરીની શંકાસ્પદ ભૂમિકા સામે આવી છે. કુલ 1500 કરોડની 38 એકર જમીનના દસ્તાવેજો સાથે ચેડા કરાયા.  કુલ 14 જેટલા દસ્તાવેજોમાં ફેર બદલ કરાયાનું સામે આવ્યું છે.  રેકોર્ડ રૂમમાંથી જૂના દસ્તાવેજો ગાયબ કરવામાં આવ્યા અને તેની જગ્યાએ નવા દસ્તાવેજો મુકાયા હતા.  ગાંધીનગર ખાતે ફેર ચકાસણી દરમિયાન ભાંડો ફૂટ્યો હતો. હાલ સમગ્ર કેસની તપાસ સુરત ક્રાઇમ બ્રાન્ચને સોંપવામાં આવી છે. જમીન માલિકો અને રજિસ્ટ્રાર કચેરીના કર્મચારીઓના નિવેદન નોંધીને વધુ કાર્યવાહી હાથ ધરવામાં આવી છે. 

શું છે કૌભાંડ ?

મહત્વનું છે કે સુરતની અઠવા સબ રજીસ્ટ્રાર કચેરીમાં નોંધાયેલા દસ્તાવેજ નં. 1143, 1144, 1889, 1890 અને 1897 ના દસ્તાવેજના રેકર્ડમાં કંઇક ખોટું થયાની શંકા વ્યકત કરતી અરજી એક અરજદારે ગાંધીનગર સ્થિત સર નિરીક્ષક કચેરીને કરી હતી,પરંતુ આશ્ચર્યની બાબત એ હતી કે અરજદારે અરજી સાથે દસ્તાવેજની જે નકલ રજૂ કરી હતી તેમાં અને ગાંધીનગર સર નિરીક્ષકની કચેરીમાં નોઁધાયેલા દસ્તાવેજમાં વિસંગતતા જોવા મળી હતી. અઠવા સબ રજીસ્ટ્રાર કચેરીમાં 60 વર્ષ અગાઉ ડુમસ, વેસુ, ખજોદ અને સિંગણપોરની જમીનના નોંધાયેલા દસ્તાવેજના વોલ્યુમમાંથી અસલ દસ્તાવેજ ગાયબ કરી બોગસ દસ્તાવેજની એન્ટ્રી કરાવ્યાનો મસમોટું કૌભાંડ બહાર આવ્યું હતું. 

બંને કચેરીના વોલ્યુમ મિસમેચ થતા કૌભાંડ બહાર આવ્યું

જેથી સર નિરીક્ષક કચેરી દ્વારા અઠવા સબ રજીસ્ટ્રાર કચેરી પાસે નકલ મંગાવતા દસ્તાવેજના વોલ્યુમમાં ફોટો નકલની પેજની જાડાઇ વધુ હતી અને પક્ષકારોના નામો પણ અલગ હતા અને તે અંગેની મામલતદાર કે સિટી સર્વેમાં આજ દિન સુધી એન્ટ્રી પડી ન હતી. આ બાબત પરથી ફલિત થયું હતું કે અજાણ્યા ભેજાબાજોએ સબ રજીસ્ટ્રાર કચેરીમાંથી ઓરીજનલ રેકર્ડનો નાશ કરી તેના બદલે બનાવટી દસ્તાવેજનો ખરા તરીકે ઉપયોગ કરવામાં આવી રહ્યો છે.