ફરિયાદ / પૂર્વ IAS અધિકારી ગૌરવ દહિયાએ લીનુ સિંહ સામે FIR કરી દાખલ, કુલદીપ નામના શખ્સ સાથે 2015માં લગ્ન કર્યાનો આરોપ

• પૂર્વ IAS ગૌરવ દહીયાએ કથિત પૂર્વ પત્ની લીનુ સિંઘ સામે કરી ફરિયાદ
• લીનુ સિંઘ સામે ખંડણી અને હેરાન કરવાનો આક્ષેપ
• લીનુ સિંઘે અન્ય એક વ્યક્તિ સાથે લગ્ન કર્યાનો ફરિયાદમાં ઉલ્લેખ

એક વર્ષ પહેલા ગુજરાત કેડરના સસ્પેન્ડેડ IAS ગૌરવ દહિયાએ દિલ્હીમાં માલવીયનગર પોલીસમાં કથિત પૂર્વ પત્ની લીનુ સિંઘ અને કુલદીપ દિનકર સામે પોલીસ ફરિયાદ નોંધાવી છે. આ ફરિયાદ મુજબ તેની કથિત પૂર્વ પત્ની લીનુસિંહે 2015માં કુલદીપ દિનકર નામના વ્યક્તિ સાથે લગ્ન કરી લીધા હતા. ત્યાર બાદ આ બન્નેએ ભેગા મળી ગૌરવ દહિયાને ફસાવી અને પૈસા પડાવવા માટે કાવતરું ઘડ્યું હતું. દિલ્હી પોલીસની તપાસના તથ્યો બાદ દહીયાએ પોલીસ ફરીયાદ નોંધાવી હતી. જોકે ગૌરવ દહિયા અને લીનુસિંહ વચ્ચેના કથિત પ્રેમ સંબંધોના વિવાદ પાછળનું કારણ શું છે તે તો તપાસ બાદ જ બહાર આવી શકશે.

અત્રે ઉલ્લેખનીય છે કે, એક વર્ષ પહેલા દિલ્હીની મહિલા લીનુ સિંઘે ગુજરાતના આરોગ્ય વિભાગના પૂર્વ કમિશનર ગૌરવ દહિયા સામે ગંભીર આરોપ લગાવ્યા હતા. લીનુસિંઘે આરોપ લગાવતા કહ્યું હતું કે, દહિયા પરણિત હોવા છતાં તેમણે તેને બીજા લગ્ન કરવા દબાણ કરી છેતરપિંડી કરી હતી. તેમને સોફ્ટ ડ્રિન્ક પીવડાવી અર્ધબેભાન કરી તેના બિભત્સ ફોટા-વીડિયો ઉતારી તેને વાયરલ કરવાની તેમજ જાનથી મારી નાખવાની ધમકીઓ આપી લગ્ન માટે દબાણ કર્યું હતું. જે બાદ 2018માં લગ્ન કર્યા હતા.

જોકે દહિયાએ પણ ત્યારે લીનુ સિંઘ સામે બ્લેકમેઈલની ફરિયાદ નોંધાવી હતી. જેમાં દહિયાએ જણાવ્યું હતું કે, ફેસબુકના માધ્યમથી દિલ્હીની મહિલાના સંપર્કમાં આવ્યા હતા. ત્યારબાદ દિલ્હી જવાનું હતું ત્યારે મહિલા સાથે મુલાકાત થઈ હતી. આ મહિલા સાથે દિલ્હીની એક હોટલમાં મુલાકાત થઇ હતી. આ મુલાકાત દરમિયાન પોતે પરિણિત હોવાનું કહેવા છતા મહિલાએ સંબંધ બાંધવા દબાણ કર્યું હતું. ત્યારે મહિલાની આર્થિક સ્થિતિ ખરાબ હોવાથી મદદ પણ કરી હતી. પરંતુ થોડા સમય બાદ તેણે બ્લેકમેઈલ કરીને નાણાં પડાવવાના પ્રયાસો શરૂ કર્યા હતા. આ મહિલાએ આત્મહત્યાનો પ્રયાસ કરીને તેમની પ્રથમ પત્ની સાથે છૂટાછેડા પણ લેવડાવ્યા હતા. ત્યારે હવે પૂર્વ IAS ગૌરવ દહીયા કેસ ફરીથી ચર્ચામાં આવ્યો છે.