તેલંગણાના કામારેડ્ડી જિલ્લામાં વિદેશથી પાછા ફરેલા એક શખ્સમં મંકીપોક્સના લક્ષણો જોવા મળ્યા છે.
દેશમાં વધી રહ્યા છે મંકીપોક્સ વાયરસના કેસ
તેલંગણામાંથી એક શખ્સમાં જોવા મળ્યા છે લક્ષણો
હાલમાં દર્દીને હોસ્પિટલમાં દાખલ કરાયો
તેલંગણાના કામારેડ્ડી જિલ્લામાં વિદેશથી પાછા ફરેલા એક શખ્સમં મંકીપોક્સના લક્ષણો જોવા મળ્યા છે. રાજ્યના સ્વાસ્થ્ય અધિકારીઓએ રવિવારે જણાવ્યું હતું કે, દર્દી હૈદરાબાદની સરકારી હોસ્પિટલમાં ભરતી છે. આ શખ્સ 6 જૂલાઈએ કુવૈતથી આવ્યો હતો અને 20 જૂલાઈએ તેને તાવ આવ્યો હતો.
તાવ આવ્યા બાદ હોસ્પિટલમાં ભરતી થયો
રાજ્યના જન સ્વાસ્થ્ય નિર્દેશક જી શ્રીનિવાસ રાવે જણાવ્યું કે, શખ્સના શરીર પર 23 જૂલાઈના રોજ ચકામા પડ્યા, જે બાદ તેને કામારેડ્ડી જિલ્લાની એક ખાનગી હોસ્પિટલમાં ભરતી કરવામાં આવ્યો. રાવે જણાવ્યું છે કે, ખાનગી હોસ્પિટલના ડોક્ટર્સે મંકીપોક્સના લક્ષણો દેખાવા પર કામારેડ્ડી જિલ્લાની સરકારી હોસ્પિટલમાં રેફર કરી દીધો અને ત્યાંથી દર્દીને જ્વર હોસ્પિટલમાં લાવવામાં આવ્યો છે.
દર્દીના સેમ્પલ લીધા બાદ તેને પુણેની લેબમાં મોકલી દેવામાં આવ્યા છે અને રિપોર્ટ આવે ત્યાં સુધી આઈસોલેશન વોર્ડમાં રાખવામાં આવ્યો છે. વરિષ્ઠ સ્નાસ્થ્ય અધિકારીએ જણાવ્યું છે કે, અમે આ શખ્સના સંપર્કમાં આવેલા છ લોકોની ઓળખાણ કરી છે. જો કે, તેમનામાં કોઈ લક્ષણ દેખાતા નથી અને તેમને પણ આઈસોલેશનમાં રાખવામાં આવ્યા છે. તેલંગણાના સ્વાસ્થ્ય મંત્રી ટી હરીશ રાવે સ્થિતિની સમીક્ષા કરી છે અને તેમના નિર્દેશોના આધાર પર જરૂરી ઉપાય કરવામાં આવી રહ્યા છે.
દેશમાં મંકીપોક્સના કુલ 4 કેસ થયા
દિલ્હીમાં એક કેસ મળ્યા બાદ હવે દેશમાં કુલ મંકીપોક્સના કેસ ચાર થઈ ગયા છે. ત્રણ કેસ દક્ષિણ રાજ્ય કેરલમાં નોંધાયા છે.
WHO એ મંકીપોક્સને વૈશ્વિક આરોગ્ય કટોકટી જાહેર કરી
કોરોના મહામારીની વચ્ચે હવે દુનિયામાં મંકિપોક્સને ગ્લોબલ હેલ્થ ઈમરજન્સી જાહેર કરવામાં આવી છે. 70થી વધુ દેશોમાં ફેલાયેલા મંકિપોક્સને લઈને આખરે વિશ્વ આરોગ્ય સંગઠને મોટો નિર્ણય લીધો છે.
દુનિયામાં વધી રહેલા કેસોને ધ્યાનમાં રાખીને વિશ્વ આરોગ્ય સંગઠને મંકિપોક્સને વૈશ્વિક આરોગ્ય કટોકટી જાહેર કરી દીધો છે. WHOના ડીજી Tedros Adhanomએ એવું જણાવ્યું કે મંકિપોક્સ 70થી વધુ દેશોમાં ફેલાયો છે અને તેથી મેં તેને વૈશ્વિક કટોકટી જાહેર કરવાનો નિર્ણય લીધો છે.
તેમણે કહ્યું કે મંકીપોક્સનો પ્રકોપ આંતરરાષ્ટ્રીય સ્તરે ચિંતાનો વિષય બનશે. જાહેર આરોગ્ય કટોકટી લાદવામાં આવી રહી છે.
70થી વધુ દેશોમાં ફેલાયો
મંકિપોક્સ હાલમાં 70થી વધુ દેશોમાં ફેલાયો છે અને દિનપ્રતિદિન કેસ વધી રહ્યાં છે. આને કારણે વિશ્વ આરોગ્ય સંગઠનને વૈશ્વિક હેલ્થ ઈમરજન્સી જાહેર કરવાની ફરજ પડી છે.
શું છે મંકીપોક્સના લક્ષણો
મોટા ભાગે આ રોગમાં તાવ, ચામડી પર દાણા, અને સોજા જેવા લક્ષણો જોવા મળે છે. કેટલીય વાર શરૂરમાં દુખાવો અને ચામડી પર ફોલ્લી જોવા મળે છએ. શરીર પર લાલ ચકામા પણ પડી જાય છે. મોટા ભાગના કેસોમાં દર્દી કોઈ પણ સારવાર વગર ઠીક થઈ જાય છે.
મંકીપોક્સ શું છે
મંકીપોક્સ એક વાયરસ છે. જે સૌ પ્રથમ વાંદરાઓમાં જોવા મળ્યો હતો. 1970માં પહેલી વાર સાઉથ આફ્રિકામાં આ વાયરસની પુષ્ટિ થઈ હતી. અત્યાર સુધી 70થી વધુ દેશોમાં વાયરસના 7 હજારથી વધુ કેસ સામે આવી ચૂક્યા છે.
શા માટે મંકિપોક્સને ગ્લોબલ હેલ્થ ઈમરજન્સી જાહેર કરાયો
(1) WHO ટેડ્રોસ અધાનોમ ઘેબ્રેયેસસે આજે એક પત્રકાર પરિષદમાં જણાવ્યું હતું કે, "મેં નક્કી કર્યું છે કે વૈશ્વિક મંકીપોક્સનો ફેલાવો જાહેર આરોગ્ય પર આંતરરાષ્ટ્રીય ચિંતા દર્શાવે છે
(2) WHOએ જણાવ્યું હતું કે વિશ્વભરમાં ઝડપથી ફેલાઈ રહેલા મંકીપોક્સનો રોગચાળો યોગ્ય જૂથોમાં યોગ્ય વ્યૂહરચનાથી અટકાવી શકાય છે.
(3) આ વર્ષે અત્યાર સુધીમાં ડબ્લ્યુએચઓના 70 સભ્ય દેશોમાંથી મંકીપોક્સના 16,000 થી વધુ કેસ અને પાંચ મૃત્યુ નોંધાયા છે.
(4) WHOએ કહ્યું કે અમે મંકિપોક્સને કટોકટી જાહેર કરી રહ્યાં છીએ કારણ કે તે જરૂરી છે કે તમામ દેશો મંકીપોક્સનો સામનો કરવા માટે અસરકારક માહિતી અને સેવાઓ ડિઝાઇન કરવા અને પહોંચાડવા માટે નજીકથી કામ કરે.
(5) હાલમાં મંકીપોક્સની કોઈ ખાસ સારવાર નથી. દર્દીઓને સામાન્ય રીતે નિષ્ણાત હોસ્પિટલમાં રહેવાની જરૂર હોય છે જેથી ચેપ ન ફેલાય અને સામાન્ય લક્ષણોની સારવાર થઈ શકે.