મહારાષ્ટ્ર / સુશાંત સિંહ કેસની તપાસ પર CM ઉદ્ધવ ઠાકરેએ આપ્યું નિવેદન, કહ્યું કે...

મહારાષ્ટ્રના મુખ્યમંત્રી ઉદ્ધવ ઠાકરેએ કહ્યું કે મુંબઇ પોલીસ અસર્મથ નથી. જો કોઇ પાસે આ મામલે કોઇ પૂરાવો હોય તો અમારી પાસે લઇને આવો અમે પૂછપરછ કરીશું. દોષિતોને સજા આપીશું. પરંતુ કૃપા કરી આ મામલે મહારાષ્ટ્ર અને બિહાર બંને રાજ્ય વચ્ચે વિવાદ ઉભો કરવા માટે તેનો ઉપયોગ ન કરો.

આ અગાઉ મહારાષ્ટ્રના પૂર્વ મુખ્યમંત્રી દેવેન્દ્ર ફડણવીસે કહ્યું હતું કે સુશાંત સિંહ કેસમાં રાજ્ય સરકાર લાપરવાહી બતાવી રહી છે. જેના પર ઉદ્ધવ ઠાકરેએ કહ્યું કે વિપક્ષ ઇન્ટરપોલ અથવા નમસ્તે ટ્રમ્પના ફોલોઅર્સને પણ તપાસ માટે લાવી શકે છે. 

સીએમ ઠાકરેએ ફડણવીસ પર આકરા પ્રહાર કરતાં કહ્યું કે ફડણવીસે સમજવું જોઇએ કે આ એ જ પોલીસ છે જેમની સાથે તેઓએ પાંચ વર્ષ કામ કર્યું છે. આ એ જ પોલીસ છે જેમણે કોરોનાની સાથે લડાઇ દરમિયાન ઘણા બલિદાન આપ્યાં છે. 

સીએમ ઉદ્ધવ ઠાકરેએ કહ્યું કે સુશાંતના મૃત્યુ પર રાજનીતિ કરવાનો ગંભીર આરોપ લગાવ્યો છે. સીએમ ઠાકરેએ કહ્યું કે અમે સુશાંતના પરિવારજનો, ચાહકોની ભાવનાઓને સમજીએ છીએ. પરંતુ હું આ બધાને અપીલ કરુ છું કે તેઓ ભાવનાઓને વ્યક્ત કરે પરંતુ અજાણતાં આ મુદ્દાને લઇને રાજનતી કરનારાઓનો ભાગ ન બને.