સુશાંત સિંહ રાજપૂત હિન્દી ફિલ્મોમાં એક્ટર હોવાની સાથે થિયેટર અને ટીવીમાં કામ કરી ચૂક્યો છે. ટીવી સિરિયલ 'પવિત્ર રિશ્તા'માં કામ કરી ચૂકેલા સુશાંતને આ સિરિયલના કારણે ખૂબ લોકપ્રિયતા મળી. સુશાંત સિંહનો જન્મ 21 જાન્યુઆરી 1986ના રોજ બિહારની રાજધાની પટનામાં થયો હતો. સુશાંતે ટેલિવિઝનથી ફિલ્મોમાં એન્ટ્રી લીધી. એન્જિનિયરિંગ કરી રહેલો આ એક્ટર ફિલ્મોમાં કઈ રીતે આવ્યો, તેની કહાની ખૂબ જ મજેદાર છે. ચાલો જાણીએ.
પિતાના ટ્રાન્સફરને કારણે સુશાંતનો પરિવાર વર્ષ 2000માં પટનાથી દિલ્હી શિફ્ટ થયો અને 2 વર્ષ પછી સુશાંતની માતાનું અવસાન થયું હતું. સુશાંતની ચાર બહેનો પણ છે. સુશાંત ભણવામાં ખૂબ જ હોશિયાર હતો. સુશાંતે પટનાના સેન્ટ કેરેન્સ હાઈસ્કૂલમાંથી કર્યો હતો. આગળનો અભ્યાસ દિલ્હીના કુલાસી હંસરાજ મોડલ સ્કૂલથી કર્યો. ત્યારબાદ મિકેનિકલ એન્જિનિયરિંગનો અભ્યાસ કર્યો. તે 11 ધોરણમાં ફિઝિક્સ ઓલિમ્પિયાડ વિજેતા પણ રહ્યો છે અને તેને ગોલ્ડ મેડલ મળ્યો હતો. સ્ટડી સાથે સુશાંતને લાગ્યું કે કંઈક એક્સ્ટ્રા એક્ટિવિટી કરવી જોઈએ તો તેણે શ્યામક ડાવરનું ડાંસ ગ્રુપ જોઈન કર્યું. સુશાંતે દેશ-વિદેશમાં અનેક શોઝમાં પર્ફોર્મ કર્યું છે.
ઓસ્ટ્રેલિયામાં કોમનવેલ્થ ગેમ્સમાં સુશાંતને એશ્વર્યા રાયની સાથે જૂનિયર ડાંસર તરીકે પર્ફોર્મ કરવાની તક મળી હતી. શ્યામક ડાબરે સુશાંતની પ્રશંસા કરી અને પછી તેણે બેરી જ્હૉનનું થિયેટર ગ્રુપમાં જોઈન કરી લીધું. વર્ષ 2008માં સુશાંતને ટીવી સીરિયલ 'કિસ દેશ મેં હૈ મેરા દિલ'માં કામ કરવાની તક મળી અને પછી 'પવિત્ર રિશ્તા'માં તે લીડ એક્ટર તરીકે જોવા મળ્યો હતો. આ જ સમયે સુશાંતની કિસ્મત પલટાઈ અને તેણે ઘર-ઘરમાં ઓળખ મળી.
વર્ષ 2013માં સુશાંતે 'કાઈ પો છે' ફિલ્મથી કરિયરની શરૂઆત કરી. આ ફિલ્મમાં તેની એક્ટિંગ અને તેના કામની ખૂબ જ પ્રશંસા થઈ અને તેને ફિલ્મફેર એવોર્ડમાં બેસ્ટ મેલ ડેબ્યૂ માટે નોમિનેશન પણ મળ્યું હતું. ત્યારબાદ તેણે શુદ્ધ દેશી રોમાન્સ, ડિટેક્ટિવ બ્યોમકેશ બક્શી અને પીકે જેવી ફિલ્મોમાં કામ કર્યું. વર્ષ 2016માં તેણે 'એમ એસ ધોનીઃ ધ અનટોલ્ડ સ્ટોરી'માં ક્રિકેટર મહેન્દ્ર સિંહ ધોનીનો રોલ નિભાવ્યો હતો અને તે બોલિવૂડમાં છવાઈ ગયો. ગયા વર્ષે તેની ફિલ્મ 'છિછોરે' રિલીઝ થઈ હતી અને તેની કરિયરની આ પહેલી એવી ફિલ્મ બની જેણે 100 કરોડની કમાણી કરી.