વળતાં પાણી? / કોરોના સામે લડવામાં મોદી સરકાર સાવ નિષ્ફળ : બીજી ટર્મ પર સર્વે

• એક સર્વે કહે છે કે લોકો છેલ્લા બે વર્ષથી તેમના કામથી નાખુશ છે 
• મોદી કોરોના સંકટ સામે એકદમ નિષ્ફળ રહ્યા
• વેક્સિનથી મોટા ભાગના લોકો સંતુષ્ટ 

એક સર્વે કહે છે કે લોકો છેલ્લા બે વર્ષથી તેમના કામથી નાખુશ છે 
પ્રધાનમંત્રી નરેન્દ્ર મોદીના બીજા કાર્યકાળના બે વર્ષ પૂરા થઈ ચૂક્યા છે, આ બે વર્ષ માત્રને માત્ર કોરોના મહામારીમાં જ પૂરા થઈ ગયા છે. પ્રધાન મંત્રી તરીકે કુલ તેમણે 7 વર્ષ પૂરા કર્યા પણ આ મહામારીના બે વર્ષ જ તેમના માટે લોઢાના ચણા ચાવવા બરાબર છે. પણ આ બે વર્ષમાં તેમની લોકપ્રિયતા, તેમનું કામકાજ અને કોરોના કાળમાં તેમણે દેશ માટે શું શું કર્યું છે તે અંગેનો સર્વે એક ન્યૂઝ ચેનલ દ્વારા કરવામાં આવ્યો હતો. 

મોદી કોરોના સંકટ સામે એકદમ નિષ્ફળ રહ્યા 
મોદી સરકારની અત્યાર સુધીની સૌથી મોટી નિષ્ફળતાની વાત કરીએ તો તે કોરોના વાયરસ છે. આ સર્વેમાં ભાગ લેનાર લોકોમાં 44 ટકા લોકો માત્ર શહેરી વિસ્તારના છે. જેમનું કહેવું છે કે કોરોનામાં મોદી સરકાર સાવ નિષ્ફળ ગઈ છે. બીજી બાજુ ગામડાના 40 ટકા લોકો પણ આ જ વાત કરી રહ્યા છે. જ્યારે ખેડૂતો માટેના કાયદા અને ખેડૂતો માટે કામ ન કર્યું હોવાનું શહેરના 20 ટકા લોકોએ કહ્યું છે. જ્યારે ગામડાના 25 ટકા લોકો ખેડૂતોના મુદ્દાને નિષ્ફળતા ગણાવી છે. ચીનના મુદ્દાને 7 ટકા શહેરના અને 10 ટકા ગામડાના લોકોને નિષ્ફળતા ગણાવી છે. 

કોરોના આ સમયે દેશ માટે સૌથી મોટી મુશ્કેલી
સર્વેમાં ભાગ લેનાર મોટાભાગના લોકોએ કોરોનાને દેશની સૌથી મોટી મુશ્કેલી ગણાવી હતી, 36 ટકા લોકો આ વાત સાથે સહમત થયા હતા. 18 ટકા લોકોએ બેરોજગારી, 10 ટકા લોકોએ મોંધવારી, અને 7 ટકા લોકોએ ભ્રષ્ટાચારને દેશની સૌથી મોટી મુશ્કેલી બતાવી હતી. 

વેક્સિનથી મોટા ભાગના લોકો સંતુષ્ટ 
આ સર્વેમાં પૂછવામાં આવ્યું કે મોદી સરકારે વેક્સિન માટે જે પ્રયત્નો કર્યા તે બરાબર હતા? તો આના જવાબમાં મોટાભાગના લોકોએ હા પાડી હતી. 51 ટકા શહેરના લોકોએ વેકસીનેશ પ્રક્રિયાથી ખુશ છે જ્યારે 45 ટકા ગામડાના લોકો કહે છે કે મોદી સરકારે વેક્સિન માટે બરાબર વ્યવસ્થા કરી છે. જ્યારે  શહેરના 29 ટકા લોકો વેકસીનેશન પ્રક્રિયાથી ખુશ નથી, અને ગામડામાં આ આંકડા 37 ટકાનો છે. જ્યારે શહેરના 17 ટકા અને ગામડાના 18 ટકા લોકો કહે છે કે કઈ પણ કહી ના શકાય.